Connect with us

Miguel Mansur (ACCION21): “Gobierno nobo pero cu mesun pantomina di semper”

Aruba

Miguel Mansur (ACCION21): “Gobierno nobo pero cu mesun pantomina di semper”

Mientras formacion ta drentando su di cuatro siman, lo ta bon pa reflexiona ariba resultado di eleccion 25 di juni 2021. MEP a saca 20,700 voto, AVP a saca 18,335 voto, e otro partidonan hunto a saca 19,575 voto. Si tur voto tabata conta igual, Aruba lo a inaugura un parlamento 7-7-2-2-1-1-1. E leynan electoral anticua y inhusto a otorga dos restzetel na MEP aunke nan tabata patras di RAIZ, MAS, PPA, RED y AVP den cantidad di voto pa e siguiente asiento. 

Mirando cu tur dos partido grandi a bay atras den voto, Miguel Mansur a haci un yamada na lidernan di RAIZ y MAS pa dialoga. Hunto nan ta representa e un tercio di electorado cu a vota contra geel y berde. Ursell Arends, lider di RAIZ, a nenga di reuni y acusa ACCION21 di ta forma parti di un complot. Logica ta dicta cu cinco of cuater asiento tin mas peso cu dos. E ora Miguel Mansur ta puntra su mes ken realmente tabata forma parti di un complot? MEP sikiera a acerca ACCION21 inoficialmente, algo cu RAIZ no a purba. 

Durante e crisis mas grandi den Aruba su historia, ta remarcabel cu MEP/RAIZ a opta pa forma e gobierno cu e base inicial mas chikito den historia. Stabilidad no por ta e motibo paso sentido comun ta obliga reconoce cu mas asiento den Parlamento ta mas sosten. Goberna cu 11 ta hopi diferente di forma cu 11, algo cu Prome Minister demisionario Evelyn Wever-Croes ta bibando actualmente. “Mi ta puntra mi mes si e decision di forma cu 11 no ta pa maximalisa e cantidad di minister pa ambos partido?”, tabata e palabranan di Miguel Mansur, lider di ACCION21.  Esey lo ta un tristo comienso pa e proximo gobierno di sigui pone interes partidario prome cu interes nacional.  

E intentando partnernan di coalicion, MEP/RAIZ ta representa 26,174 voto entre nan. E supuesto oposicion ACCION 21/MAS/AVP ta representa 26,426 voto. Oposicion tin un mandato electoral mas grandi di voto cu coalicion, con esaki por ta? Mansur a suplica Arends di por fabor inclui modernisacion di Aruba su kiesverordening den cualkier acuerdo di gobernacion. Si no logra esaki lo ta un traicion di e 19,575 persona cu a vota pa cambio real. 

Ultimo dianan por a nota movecion pa kita e directornan di WEB a pesar cu Prome minister a  declara den parlamento di no ta na altura di ningun plan di retiro. Tambe el a declara durante tratamento di presupuesto 2021 cu no tin infiltracion politico den Utilities N.V. Awo ta  menciona posibel reemplasante y Mansur ta wanta su curason cu berdad e politica di fix cos pa friends and family lo caba manera lider di RAIZ a priminti durante campaña. 

Durante e prome reunion publico di Parlamento 11, Presidente Vrolijk a purba silencia democracia door di cera e lista di orador, algo sin precedente na Aruba. Imparcialidad di e presidente nobo a keda cuestiona y tambe kico realmente tabata su proposito, sigur no crea un ambiente constructivo. RAIZ y MAS a introduci punto di ordo pa habri e lista di orador y mirando cu si nan tambe bandona sala e reunion lo perde quorum, Vrolijk a recapacita. Atardi a mira lider di RAIZ, cu no tabata tin ningun pregunta den prome tanda, declara cu gaña rabia y bandona sala ta politica di pasado. 

Honestidad ta politica nobo, e resto ta e mesun pantomina di semper aunke disfrasa di un capa nobo. Den tratamento di presupuesto Minister di Turismo y Salubridad Publico a declara cu no tin ningun plan pa hisa edad di pensioen aunke e ta parti di e acuerdo cu Hulanda. Nos a tende Minister di Finanza y Asuntonan Economico declara, cu curason y caracter, cu no mester preocupa cu e landspakket paso ta solamente estudio te awor. Realidad ta cu landspakket ta un serie di medida cu ta sigura cu Aruba lo por cumpli cu su obligacionnan financiero.

Politica nobo ta a base di honestidad paso pueblo merece e berdad. E medidanan specifico di e landspakket ta esunnan cu Aruba y Hulanda a negocia pa ta mas suave y cu miho efecto pa funcionamento di nos pais y finansas publico. Pretende cu no lo tin cambionan severo ta nenga di comparti e berdad cu pueblo, Mansur a sigui bisa. Recientemente p.e. a sali den noticia cu hisando edad di pensioen te cu 66 kisas no lo ta suficiente pa salvaguardia solvencia di SVB. 

Awo cu ta negociando reparticion di cartera ministerial, ta importante nota cu cada ministerio ta costa Land Aruba mas o menos 1 miyon pa aña. Den landspakket ta claramente indica cu gastonan di personal di sector publico mester baha te cu 10% di GDP. Prome minister declara den parlamento cu esaki lo inclui esunnan cu ta traha den un fundacion subsidia pa gobierno. Esey ta nifica cu mas minister e proximo gobierno tin, mas ambtenaar lo mester bay cas. 

Den Parlamento ACCION 21 a vocifera nan disposicion di traha cu e proximo Ministro di Finansas y ofrece e plan di reforma fiscal. ACCION21 su plan ta logra hisa entrada di gobierno, baha prijs pa consumidor y haci Aruba e destinacion mas atractivo pa capital den nos region y Reino. Politica nobo ta pone interes nacional prome cu interes partidario, ban cuminsa biba esey. 



Source link

More in Aruba

IMPORTANT ANOUNCEMENT

Advertisement
Advertisement

Trending

Advertisement
Advertisement
To Top