Connect with us

Mester elimina recorte di 12.6%: Esunnan di KIA a protesta

Aruba

Mester elimina recorte di 12.6%: Esunnan di KIA a protesta


Mainta trempan esunnan cu ta traha na KIA como di CEA a bay den protesta contra e recorte di 12.6%. Gobierno a informa cu e recorte aki tabata pa yuda esunnan cu lo haya FASE, pero awo a stop esey. Pero gobierno ta sigui cu e recorte y esey no a cay den bon tera cu e trahadonan publico y semi-publico.

Kim Maduro, shop steward, a bisa cu nan a sali pa e mustra cu nan kier pa kita e recorte di 12.6%. Aki e trahadonan di KIA, CEA, Sero Colorado y CEDEM a uni n’e accion aki. Na comienso tur hende a acepta e recorte, pero awo cu a para tanto FASE como loonsubsidie Maduro ta haya cu nan por haya bek e 12.6%. Na comienso nan a cumpli 24/7 teniendo siguridad, a coopera y sin keha.

Mester elimina recorte di 12.6%: Esnan di KIA na Santo di Patia den protesta

Posted by 24ora on Wednesday, December 8, 2021

Jasmine Croes, shop steward, a splica cu nan a bini hunto pa sostene e lucha di tur colega cu tin un solo meta. E meta cu nan tin ta pa stop e 12.6% y respeta nan. Tin di elimina e 12.6% y dun’e bek na e trahadonan. E punto primordial ta pa nan siña trata e trahadonan cu respet, pasobra ta biba riba un isla democratico. Nan niun no ta acepta di ta obliga, impone y despues ta papia pa sinta na mesa. Te awo no a yama niun sindicato pa dialoga, pero a yama nan na mesa pa duna informacion riba e stapnan cu a tuma. Niun dia a puntra ningun sindicato y trahado publico “kico ta nos opinion”. Tambe unda nan por trece un bijdrage pa yega n’un solucion.

Edmundo Marlin di SEPPA a indica cu e sindicatonan a haya mandato di e trahadonan pa elimina e 12.6%. A tene e walk out pa un ora pero si gobierno no ta duna oido na e yamada aki, lo por spera mas accion. E forma con gobierno ta atende cu e situacionnan aki, SEPPA ta mira cu gobierno ta terco. Pasobra nan ta impone y esey ta loke no ta acepta mas. SEPPA ta kere cu ta biba riba un pais democratico y p’esey por sinta na mesa negosha.

Hubert Dirksz, miembro directiva di FTA, a indica cu nan tin varios miembro como ambtenaar, den N.V. di gobierno y fundacion. Ta considera cu nan tambe ta afecta y pa 21 luna a aporta. A respeta e yamada di gobierno pa ta solidario y yuda. Despues di tanto discusion, e sindicatonan a consulta cu e miembronan. Aki a tuma e decision pa exigi gobierno kita e 12.6% y despues bay sinta na mesa pa mira unda ta saca e 12.6%.

Pa un cobertura mas amplio lesa e edicion di TREMPAN di mañan.





Source link

Click to comment

Leave a Reply

Your email address will not be published. Required fields are marked *

More in Aruba

To Top