Connect with us

Mervin Wyatt Ras: Ta primordial pa evita hoben cay den criminalidad

Aruba

Mervin Wyatt Ras: Ta primordial pa evita hoben cay den criminalidad


Parlamentario drs. Mervin Wyatt-Ras ta trece padilanti cu durante un dia cu diferente reunion, fraccion di AVP a entrega un carta cu peticion pa yama un reunion publico encuanto di e medida di eigenbijdrage y austerisacion di lista positivo di remedi. 

Wyatt-Ras ta sigui menciona cu parti mainta a  reuni cu tres instancia regardando criminalidad y castigo pa hobennan(jeugdstrafrecht). A reuni cu KIA, Stichting Reclassering en Kinderbescherming y Sociale Zaken. 

Aki cada instancia a duna nan presentacion.

Prevencion ta keda e yabi importante pa evita cu hobennan ta cay den e trayecto hudicial y sigui den e trayecto aki. Ta necesario pa hues tene cuenta cu circumstancia individual di e hobennan ora di castigo. Castigo mas halto no ta garantisa cu e hoben no ta bolbe comete actonan di criminalidad.

Hobennan bou guia di Reclassering pa 50% ta dropouts y 65 % ta bin di famia cu ta consisti di un solo mayor of mayor soltero. Ta haci uzo mas y mas di sanccionan alternativo entre otro trabou pa comunidad. Tin ademas castigo di trabou y leerstraffen. 

Wyatt-Ras ta haya necesario cu ta haci un investigacion di e tipo di problematica cu ta haci cu e hobennan ta drenta den e circuito di criminalidad. Uzo di droga tambe ta un aspecto. Pasobra ora nan sali bek y bay den nan famia cu e mesun problematica ta cay bek. Tin di e mayornan tambe ta den criminalidad of ta bende droga door di cual e hoben cu no por haya trabou door di stigmatisacion tambe ta sigui den mesun patronchi y ta bay bende droga of anda cu mesun amigonan cu ta influenci’e negativo y push’e bek den criminalidad. 

Necesario segun Wyatt-Ras ta registracion di e muchanan den categoria di risico y monitorea nan. A inverti 36 miyon florin den un Crisisplan pero no a haci nada na registracion y ni cooperacion entre e instancianan.

Ta necesario p’e instancianan sali for di nan isla y uni mas cu otro pa por atende e problematica di nos hubentud. Ta necesario pa nos comunidad cambia su forma di pensa pa loke ta trata e hobennan cu a haya nan mes confronta cu husticia. Mester kita e stempel/stigma riba e hoben. 

Den KIA ta necesario mas atencion pa e hoben y su necesidadnan, mas profesional specialisa riba e tereno di hubentud y opleiding pa forma hobennan den bon direccion. 

En bista cu e gastonan pa un hoben deteni y permanence den KIA ta casi 100.000, ta necesario y urgente pa inverti den prevencion en bes di laga yega asina leu cu hobennan ta end up den KIA.  

E di dos reunion cu a inicia atardi, tabata referente e relatonan di e reaccionan y preguntanan di diferente fraccion riba e dos leynan di reino RAft y COHO. Parlamento lo manda nos reaccion pa Hulanda. Ta lastima cu Hulanda a duna asina tiki tempo pa bin cu reaccion. E leynan di reino menciona ta mina autonomia di nos pais y ta haci nos rol como parlamento uno suak y insignificante. Nos fraccion ta contra di ambos ley.

A conclui e dia cu e reunion cu director y profesionalnan di AZV tocante nan relato financiero, eigenbijdrage y positieve lijst. Durante e reunion Wyatt-Ras a trece padilanti cu awor cu entrada di AZV, despues di e temporada di COVID, a cuminsa aumenta dor cu mas hende tin empleo y e entrada di primanan y BAZV a aumenta, por tene cuenta cu nos pueblo cu no tin pan ni pa come y cu costo di bida halto pa no tuma e medida mas. 

E medidanan aki di tres wave lo encera cu ora un ciudadano cu ya no tin suficiente placa den su cartera yega na Spoedeisende Hulp e lo mester paga 15 florin. Ora e yega Huisarstenpost e tin cu paga 15 florin. Na specialista e lo paga 5 florin, na botica 2 florin pa cada receptregel y na laboratorio 1 florin pa cada test. 

Si suma tur esaki ta hopi e pashent mester paga. Wyatt-Ras a tuma nota di declaracion di director di AZV encuanto cobramento di BAZV y e ta urgi tur hende pa pidi nan recibo of slip ora nan paga pa yuda cu control di pago di BAZV. Aki sigur cu lo por haci mas, segun Wyatt-Ras pa haya entrada pa AZV door di cual no mester bay over na mishi cu cartera di nos ciudadanonan cu ya caba ta bashi. 

Tambe segun Wyatt-Ras mester por busca otro formanan pa mehora y corta vet otro caminda, p.e. pa haci compra central di medicina, pa mihor cooperacion y referencia di pashentnan pa evita cu mucho lihe un pashent ta pasa pa tweede lijn. Tambe por evalua e estadia di e pashentnan den exterior di cual un cantidad ta keda mucho dia, hasta luna y aña den exterior sin ricibi tratamento. Nan tin cu keda warda prome cu haya cuido. 

Wyatt-Ras a puntra tambe tocante sociaal vangnet y si AZV ta na altura si lo bin un vangnet social pa esnan di menos recurso. Ademas el a cuestiona cu no ta tene cuenta cu stakeholders cu a trece padilanti na Parlamento y. Minister cu nan no ta equipa pa cobra pashent nan cual ta trece cun’e extra trabou administrativo y preocupacion cu ne. Tin cu evita klassezorg y cu cuido ta bay atras netamente awor cu covid a trece cu ne diferente consecuencia negativo di salud pa e pashent. 

Wyatt-Ras a menciona alabes cu Raad van Advies ta cuestiona cu no ta aclarea con introduccion di eigenbijdrage lo tin un remmende werking riba crecemento di gastonan di cuido. Ta menciona cu gobierno ta consciente cu di loke ta menciona den literatura cu eigenbijdrage por conduci na zorgmijding. A pidi aclareacion riba esaki. 

Wyatt-Ras ta trece dilanti cu ya caba e landsbesluit pa regla e medidanan di eigenbijdrage y austerisacion di lista positivo di remedi a drenta Parlamento y segun ley lo mester keda den parlamento pa dos siman y despues di dos siman lo ehecuta e landsbesluit. Fraccion di AVP ta haci un peticion na presidente di parlamento pa yama un reunion publico den presencia di minister di salubridad pa por discuti tocante e LB. 

Ta importante pa pueblo ta na altura di e medidanan di eigenbijdrage y austerisacion di e lista di remedi cu gobierno lo impone y sin ningun sosten pa esunnan mas vulnerabel den nos comunidad. Fraccion di AVP no ta di acuerdo pa introduci e medidanan aki. No por saca mas for di cartera di nos ciudadanonan.





Source link

More in Aruba

AD

Advertisement

Trending

Advertisement
To Top