Mas di 70 pareha a renoba nan voto matrimonial na Fort Zoutman

Pa algun aña caba Aruba Tourism Authority (A.T.A.) ta organisa e evento di ‘I Do Vow Renewal.’ E evento aki ta unda cu e parehanan, sea local como turista, ta bini hunto pa renoba nan votonan matrimonial. Diahuebs atardi hopi pareha hunto cu nan famia a reuni na Museo Historico Fort Zoutman pa asina “I DO.” E parehanan a tuma e momento aki pa bisa si na otro, unda nan a renoba nan matrimonio.

Marisol Sanchez, communications manager na A.T.A., a splica cu nan a organisa e di seis edicion di e evento ‘I Do Vow Renewal.’ E ta un evento cu nan a organisa caba na Eagle Beach y e aña aki a dicidi di sac’e di beach pa hacie na Museo Historico Fort Zoutman. A opta pa duna un tono distinto, pensando riba e dos shen aña di Oranjestad. Tambe nan kier a bay for di e ‘vow renewal’ mas grandi. Aña pasa nan tabatin 300 pareha pa e ‘vow renewal’ mas memorabel. E biaha aki nan tabatin 75 pareha. A hacie special pa cada pareha, unda a enfoca riba e detayenan y cu cada pareha por a sinti nan mes no como un number, pero como un momento special pa nan mes por a bolbe bisa si na otro.

Nilka Franca tabata e persona cu a oficialisa e ceremonia. El a indica cu esaki ta di seis biaha cu A.T.A. ta organisa e evento di ‘I Do’, unda ta invita hopi pareha pa nan haci renobacion di voto (renewal of vows).

E biaha aki e ceremonia tabata algo diferente, mirando cu nan a hacie tanto na Ingles como Spaño. Hilda tabata sumamente entusiasma p’e oportunidad aki.

Mas o menos 60 pareha a renoba nan voto matrimonial. Shen cincuenta pareha a registra, pero asina mes rond tin esunnan cu a cana yega y a acepta nan. Pa por forma parti ta cu mester bay riba e website di A.T.A. y aki tin e mandera cu ta registra, aki ta tuma e datonan y nan mester bin Aruba pa ta presente.

Clyde y Anely Robles a bisa si na otro. Esun cu a tuma e decision pa haci esaki tabata Anely. El a tuma e decision aki pasobra esaki ta algo cu semper e kier a haci. Nan no tabatin e oportunidad, pero awo si a haci esey. A pasa 34 aña y nan tabata kier a renoba nan votonan. Nan otro amistadnan a haci esey den exterior y pa nan esaki tabata algo bunita recuerdo.

Clyde a exprsa cu e mes no tabata cu esaki ta algo cu ta existi. Anely a bis’e di e voto y kico e ta, y Clyde a bay di acuerdo. Nan conoce otro pa 35 aña y tin 34 aña casa. Nan matrimonio ta perfecto, ta biaha hunto.

Reynaldo Díaz hunto cu su casa ta di Venezuela y nan ta bibando na Uruguay. Nan tin seis aña bibando eynan. Aña pasa nan a casa y a dicidi di bin pasa nan luna di miel (honeymoon) aki na Aruba. Nan a haya sa di e actividad aki via internet. Su casa a anima pa bolbe bisa ‘Si.’ Nan a scoge Aruba pasobra e ta un luga hopi turistico y casual pa un luna di miel.