Marisol Tromp (MAS): Problema riba presidencia di comision a causa falta di quorum

E reunion di parlamento yama pa awe, diamars, a keda na nada. E tabata un encuentro yama pa instala e diferente comisionnan. Pero e ex-partnernan di coalicion no por a yega na un consensus riba presidencia di diferente comision.

Principalmente MEP tabata partidario pa haya e comisionnan cu tin di haber cu e ministerionan cu ta cay bou di partido Raiz.

Na final a combersa cu drs. Marisol Tromp, di e fraccion di MAS.

Mester bisa cu e reunion no por a ni inicia, pasobra no tabatin tur e parlamentarionan di MEP y Raiz presente. E presidente, di partido Raiz, si tabata na e reunion yama. No a logra habri e reunion publico pasobra no tabatin 11 miembro presente pa forma e quorum.

Di oposicion tabata presente e fraccion di MAS cu dos miembro y drs. Mervin Wyatt-Ras, di AVP. Di e fraccion di MEP no tabata completo tampoco.

Banda di e problema ey, tambe a surgi esun di presidencia di e comision. Segun Tromp a declara, e por a compronde cu MEP tabata desea presidencia di comision manera esun di Transporte Publico, cu semper tabata den man di e fraccion di Raiz y esun di Medio Ambiente. Partido MAS di su  banda a pidi si e por haya presidencia di Comision di Nos Grandinan.

Ta prome biaha, segun Tromp, e ta mira cu e partnernan di e coalicion no por a ni forma quorum pa un reunion por tuma luga. E acuerdo di kende ta haya presidencia di cual comision, mester a acorda prome cu e reunion publico tuma luga.  

A yama e reunion dos biaha pa despues schors esaki. Awo no sa ainda riba ki otro fecha e encuentro aki lo por tuma luga.

Aunke cu ta den campaña, e parlamentarionan mester presenta na trabou. E Presidente di Parlamento, Raymond Kamperveen, a cuminsa yama diferente reunion bieu, cual peticionnan a keda den lachi warda. Loke ta remarcabel ta algun di e peticionnan aki ta te hasta dos aña bieu. Fraccion di MAS tambe tin diferente peticion y cu nan por a compronde cu e presidente nobo ta analisa pa mira si nan ta vigente ainda.