Connect with us

Marco Berlis (MEP): Mester restructura y agilisa e proceso di permiso na Dimas

Aruba

Marco Berlis (MEP): Mester restructura y agilisa e proceso di permiso na Dimas


Nos dushi pais Aruba ta dilanti retonan grandi. Esaki no ta djis den e area economico y social, sino tambe den e forma cu cierto servicionan di departamentonan ta funcionando actualmente. Nos pais tin cierto maneho den lugar cu ta asina complica cu e no ta brinda e servicio eficientemente ni tampoco e ta agilisa e sistema pa esakinan por cana efectivamente. Gobierno mester haci esaki un prioridad y mester traha duro riba e aspecto aki.

Desde principio cu mi a cuminsa den politica mi a menciona cu esaki ta e caso cu por ehempel e departamento di Dimas. Dimas mester restructura y agilisa e proceso di permisonan na su clientenan. E proceso cu ta den lugar actualmente simplemente no ta aceptabel. Como parlamentario mi a cuminsa sigui e proceso di cerca pa wak cu enberdad ta haci tur lo posibel pa sigura cu e cambio lo tuma lugar. Tambe den e area economico, pa cu inversionistanan y negoshinan nobo cu kier bin inverti na Aruba, nos sistema mester wordo agilisa. Mester investiga y reevalua con e procesonan ta core y kico nos por haci pa trece cambionan contundente pa asina nos por atrae inversionista y wak pa nos economia sigui crece. Nos mester haci esaki intencionalmente y rigurosamente.

Sinembargo, apesar cu nos ta lucha cu e procesonan aki, esaki hamas por ta un excusa of motibo pa kibra leynan existente. Nos frustracion cu cualkier proceso of dienst hamas por hustifica accionnan contra di ley y abuso di poder. Y mi kier subraya esaki, pasobra cualkier persona decente y serio por compronde esaki. Esaki sigur no tin nada di haci cu colornan politico, sino cu caracter, etica y procedimentonan cu nos mester sigui corectamente na tur tempo. Specialmente como lidernan den nos comunidad y e responsabilidad cu nos a asumi, nos mester ta un voorbeeld functie pa pueblo. Pesey e ta mustra un gran falta di respet pa pueblo, ora cu cierto politiconan di oposicionta trata na hustifica esnan cu a kibra ley, pasobra e sistema mester di cambio. E tipo di narativa aki ta hopi dañino y no ta yuda nos pais cu nada.

Integridad ta algo cu tur dia mester lucha pe atrabes di tur nos accion y palabranan. Hamas otronan por wordo reprendi pa un acto y mal decision di un otro persona. Enbes di hunga politica, ban traha uni, ban pone nos forsa hunto, ban crea oportunidadnan pa nos pais. Ta pesey nos a wordo posiciona como parlamentario, no solamente pa ta critico y controla gobierno, pero pa contribui activamente pa por haci un diferencia. For di den Parlamento nos por propone y traha riba leynan y propuestanan cu por trece cambio den e areanan cu mester mehoracion y otronan cu ta desfuncional. Lidernan berdadero no ta papia solamente di e problemanan existente, nan ta ofrece solucionnan y ta dirigi nan esfuersonan pa por implementa esakinan.

Mi speransa ta cu un dia politiconan lo realisa, cu si kier sigui hunga politica di e forma destructivo aki, esaki lo sigui dividi nos forsa; e forsa y oportunidad cu nos tur tin pa por reconstrui y revitalisa nos pais.  Laga nos pasion pa nos pais motiva nos pa traha riba un nivel hopi mas halto. Tanten politica ta e motor principal riba e agenda y ta traha pa logra ambicionnan personal y no e interes nacional y general di Aruba, nos pais no por avansa manera cu mester ta. Nos por haci e diferencia! Abo politico, bo tin e curashi pa haci’e?





Source link

Click to comment

Leave a Reply

Your email address will not be published. Required fields are marked *

More in Aruba

To Top