Marco Berlis (MEP): Local tambe por haci uzo di e palapanan sin problema

E percepcion bou di e poblacion ta cu nan ta perdiendo e derecho pa uzo di e beachnan. Hotel of companianan ta pone palapa y gazebonan cu e local no tin acceso na nan tampoco. E ta un preocupacion di un grupo di manifestante pero tambe otronan cu a yega di pasa den un situacion incomodo unda ta core cu nan.

Un hotel tin derecho riba su propiedad, manera areanan di pool, etc. Otro cos ta e beach. Esaki semper ta publico, parlamentario Marco Berlis a bisa den un conferencia di prensa. E hotel ta haya permiso di gobierno pa instala e palapanan riba e beach. Pero e area ey ta uno publico. Esaki ta nifica cu un local por yega cu su mesun stoel y pone bou di e palapanan. Unico cos cu no por uza ta e stoel di e hotel.

“E lo ta un acto contra ley pa laga siguridad core cu cualkier ciudadano of intimida nan. Esaki pasobra ta actuando contra ley y esaki por tin su consecuencianan.”

El a recorda un sucedido di algun siman atras ora un grupo a haya nan den un problema riba beach pa uzo di palapa. A bay asina leu pa pidi presencia di polis cu a recorda e hotel cu e beach ta un area publico.

Di otro banda, e parlamentario ta haya cu e hotel mester ta mas responsabel di su banda y corda cu beach ta patrimonio di pueblo. Y e palapa ta poni riba un beach cu ta di pueblo.

Ya caba Gabinete Wever Croes a pone como maneho no mas camber di hotel. Incluso a logra baha e construccion di cambernan adicional di 7000 te na 2000. Un logro cu nan fraccion ta haya como logronan grandi. E restonan no por a haci nada, pasobra e lo a trece consecuencianan financiero grandi pa pais Aruba.

Su conseho na e gruponan cu ta manifesta riba e tema aki pa no solamente protesta pero bay den un dialogo efectivo. Di e forma aki lo por yega mas cerca di otro. Dialogo ta e miho manera.