“Mama, nos a logra!”: Clayton Raven a firma su prome contract profesional di kickboxing

Cu lagrima di alegria na wowo, Clayton Raven a celebra e firmamento di su prome contract profesional di kickboxing cu e organisacion Glory Kickboxing, gradiciendo profundamente su famia, coachnan y tambe su siguidonan pa nan sosten incondicional. “Esaki t’e soño cu b’a desea, mama,” el a expresa emociona.

Den un publicacion riba Facebook, Clayton a expresa su gratitud profundo y e importancia di fe den su caminda: “Mi kier t’e prome pa gradici Dios p’e talento cu el a duna mi, pasobra sin djE mi no ta nada.” Tambe el a dedica palabra di gradicimento n’e organisacion Glory Kickboxing p’e confiansa deposita den dje, sigurando cu nan a tuma e decision corecto. Fuera di esey, el a reconoce e esfuerso di su ekipo di entrenamento @arjtrainingen pa nan sosten incondicional y tur cu nan a haci p’e den poco tempo: “Mi stima boso, mi rumannan,” el a añadi cu entusiasmo.

E no a lubida di menciona su famia, kendenan e ta considera su mayor fuente di apoyo: “Mi famia, mi stima boso! Sin boso mi no ta nada: mi prinses recien naci, mi pareha, mi rumannan, mi tanta Loutiza, mi tionan, mi ta carga boso den mi curason!” Tambe el a extende su gradicimento na su siguidonan, primintiendo pa hiba nan cu ne den cada paso di e etapa nobo aki.

Emociona, el a conclui cu un sentimento tremendo: “Ainda mi no por kere! Esaki ta solamente e comienso di e caminda den kickboxing profesional. See you very soon, Glory,” el a termina bisando.