Connect with us

Lito Lacle: “E arma di candela no ta peligroso, t’e persona su tras ta e peliger”

Aruba

Lito Lacle: “E arma di candela no ta peligroso, t’e persona su tras ta e peliger”


Diabierna manece diasabra siman pasa a registra un otro caso di drive-by shooting den area di Palm Beach. Esaki a sosode dilanti un establecimento nocturno basta frecuenta. Polis di Noord a confisca diferente huls y cuminsa cu un investigacion al instante. No a tarda mucho cu e siguiente dia, diasabra manece diadomingo, a drenta otro melding relaciona cu arma di candela. Den careda di 4:50 am un of mas persona lo a los tiro dilanti otro club nocturno den area di hotel.

Pa duna un bista amplio riba e fenomeno di drive-by shooting a tuma contacto cu Lito Lacle pa asina duna e comunidad un bista riba con a atende cu e situacion di parti Cuerpo Policial. Tin di menciona cu Lacle tin amplio trayectoria y experticio den diferente departamento policial. Lito Lacle ta di klas 1 augustus 1989, ta Onderinspecteur eerste klasse, a fungi como polis trahando den Straatdienst Oranjestad, SJPO (Recherche Oranjestad), SVC (Sectie Veelvoorkomende Criminaliteit), Straatdienst San Nicolas, RST, Commandant Observatieteam, CID, varios di nan den combinacion cu otro y actualmente coordinator BCVP (Bureau Communicatie Voorlichting & Preventie) na e momento aki den funcion como vocero policial.

Diferente caso di drive-by shooting, na mas di un localidad of area riba nos isla, ta pone autoridad riba pia mesora pa asina atende cu e situacion cu man duro. A confisca diferente huls, vehiculo, arma y tambe algun sospecho deteni pendiente investigacion, mientras ta sigui presenta mas caso relaciona cu arma di candela.

1n6262ca3b6f7659.67751294

Locual cu ta resalta ta e echo cu no ta tur caso ta yega den publicidad. Di 10 caso cu tin di haber cu arma di candela, kisas menos di mita ta bira publico mientras e resto ta informacion cu no ta bin dilanti. Esaki ta pasobra cu gran mayoria ta despues di e echo. E tin di haber cu den cierto caso, tin hende ta lanta mainta y encontra huls dilanti cas, of a ricibi tiro pero a purba di sconde e incidente, of a los tiro riba nan pero no a bin dilanti pa haci denuncia. Tur ta scenario cu ta pone cu hopi di e informacionnan aki ta limita.

Lito Lacle a enfatisa cu e cooperacion di comunidad ta di sumo importancia pa yega na pista valioso. Tin reaccion, ta ricibi cierto informacion via tiplijn, tin detencion ta tuma luga y pesey ta enfatisa e importancia di e tipnan aki pa asina continua cu e esfuerso pa kita arma for di riba caya. No ta descarta cu lo tin mas detencion na caminda, ta locual cu Lito Lacle ta sigura.

Ta papia di 8 asesinato den aña 2021

Presencia y actuacion di polis den situacion asina no ta uno facil, ta opta semper pa yega cu mas polis uniforma posibel pa pone e situacion bou control. Si mira e incidentenan di e dianan tras di lomba, tin di bisa cu ta trata di hende di edad relativamente jong (entre 14 cu 25 aña) caminda hopi tin di haber cu asesinato, cual ta crimen hopi severo di castigo hopi halto.

Den aña 2021 tin un cifra di 8 asesinato caminda cu practicamente tur tabata ocasiona of cu envolvimento di un persona hoben. Di e casonan aki shete ta resolvi y cu a resulta den culpabilidad di un persona hoben.

Tur cos no ta cifra

Lito a indica tambe, cu den su experiencia, cifra no ta un idicator factibel. Cu transcurso di tempo por a nota cu cambio di generacion y cultura con e individuo a reserva su mes compara cu antes. Locual cu ta mira awendia no ta e generacion cu lo presenta na un warda di polis pa informa cu a tira riba nan, no ta entrega keho, no ta yama un central di polis pa informa di bashamento di bala den bario y no ta duna indicacion cu por yega na conclui cu un caminda un crimen a tuma luga. A indica tambe cu no kier uza e palabra sconde pero mas bien resolve entre nan mes sin midi consecuencia, no solamente pa nan mes pero pa un victima inocente.

Inocente por muri asina’ki

Vocero di polis Lito Lacle a remarca claramente: “E arma di candela no ta peligroso, ta persona su tras ta peligroso”, cu ayuda di comunidad lo logra kita mas arma posibel for di riba caya. Pa finalisa Lito a duna di conoce cu e ta tristo cu si acaso nan cu nan ta tira otro, cu esey no ta e problema, ta ora cu un inocente ricibi tiro y fayece cruelmente a consecuensia di esaki. Gran parti debi na un acto iresponsabel di hende cu ta anda cu arma.

A uza como ehempel e caso di Jaburibari, un area residencial caminda cu e situacion por tabata dramatico, caminda cu hende ta sali for di nan cas pa mira kico ta pasando y inocentemente por a bira victima di un drive-by shooting. Nan no ta pensa riba consecuencia cu esaki por tin. Pesey ta asina importante pa ricibi e ayudo di pueblo pa kita e hendenan aki for di riba caminda.





Source link

More in Aruba

To Top