Linda Orman na Minister Ursell Arends: “Shon bo ta corupto caba”

Durante mas cu un luna di encuentro entre Minister di Transporte (demisionario) Ursell Arends y un delegacion di sector di taxi, por bisa cu ainda nan ta mes of mas leu for di otro. E grupo di taxista ta insisti cu e mandatario a subi un cabay cu e no kier baha for di dje . Y banda di esaki a yam’e pa un politico corupto.

Linda Orman, taxista y representante di un grupo di su colega a duna un declaracion den Enfoke di Nelson Speed Andrade y Patrick Paskel y a expresa palabranan fuerte contra e mandatario.

Orman a expresa cu e mandatario ta bini cu un maneho di transporte “sin consulta cu nos. Y nos por proba esaki cu e diferente emailnan cu nos a manda pidiendo pa papia riba e problematica den transporte. E no a duna oido y tampoco a duna nos un afspraak”, Orman a comenta.

E problema di taxistanan aki a cuminsa na inicio di augustus momento cu Minister Ursell Arends a anuncia maneho nobo pa cu transporte. Algo cu no a cay den bon tera pa motibo cu e taxistanan ta sinti nan mes perhudica y a bay den accion pidiendo pa “revoca” e dos MB-nan cu e cambionan en cuestion. Pero te awo no a cumpli cu e exigencianan di e taxistanan.

Segun Orman, e maneho di e mandatario ta bay en contra di e Ley di Transporte Publico. “Su maneho ta perhudica nos como taxista. P’esey ultimo nos a bis’e cu lo no sinta na mesa mas cu ne. E ta keda intransigente, e no kier hala atras y no kier sinta na mesa pa negosha bek. E kier keda riba su cabay sinta  y nos a bis’e cu nos no kier sinta mas cu ne di e forma ey.”

Pa e taxistanan e lema di e minister “Nos no ta nan” ta algo di hari y  nan ta kere cu e ta pio. Ora cu a puntra Orman riba e expresion aki, e no por a evita di hari y a splica lo siguiente.  Pa cuminsa te ainda e mandatario no a mustra nan e rapport cu consehonan cu el a ricibi. El a papia di lo saca 200 vergunning di taxi. Segun el a bisa, riba conseho di DTO (Departamento di Transporte Publico). Den un siguiente reunion, e cantidad di vergunning cu e kier saca a baha na 50. Pero, Orman ta bisa, e no a presenta ningun rapport.

Nan por corda ainda cu den un conferencia di gobierno Minister Ursell Arends a bisa cu e lo no bay ta e di cuater politico corupto. “Shon bo ta caba. Locual cu bo ta haciendo, bayendo contra nos leynan ta mustra caba cu bo ta corupto. Bo ta bypass nos leynan y bo ta trapando nos derecho den constitucion, bo ta corupto e ora.”

E taxistanan no ta mira con e por bay duna mas permiso awo, si no tin hotel nobo cu a habri ainda. El a duna e ehempel di tres edificio  hotelero cu ta bay habri nan portanan. Pero nan ta situa  na “walking distance” di e area. Tin Arubus y autobus ta mobilisando den e area ey, cu ta esun mas druk despues di Oranjestad. Pues no ta mira e necesidad pa mas taxi, manera e mandatario a bisa.