Leonardo Figaroa: Aruba tin un gobierno cu falta di integridad

Bon gobernacion, Kico esaki ta? Awendia bo puntra mi como politico mi no kier ni uza e palabra cu tanto biaha a wordo mal uza.

Pueblo claramente ta perde mas confiansa den politiconan na momento cu tin un sentencia cu ta mancha un biaha mas no solamente nos poder ehecutivo, pero ta mustra con fragil nos poder legislativo ta na momento di actua. Awe nos ta wak cu Aruba tin 5 politico condena cu veredicto. Esaki ta fortifica e pensamento cu hopi tin na Aruba di no tene confiansa den politiconan. Partido AVP cu 3, MEP cu 2 sospechoso, Partido POR cu 2 politico condena y 1 sospechoso den e caso flamingo. 

Unda nos ta bayendo? Kico nos a haci asina robes pa confia politiconan cu ta haci abuso di nan poder y nan posicion. Nos mester reforma serio pa por garantisa un tipo di restauracion di e confiansa cu durante e ultimo 4 gobiernonan a keda demostra cu Integridad ta un palabra grandi cu tiki peso na dje. 

Pakico e ta importante pa tin ‘accountability’ & ‘Check and balances’? Pa mi e ta importante cu nos tin un Parlamento cu ta pro-activo, cu ta tene e ministernan responsabel ora algo bay robes. Durante Gabinete Evelyn Wever Croes nos no por lubida: E caso di Eagle LNG, Overbruggingstoelage, Fase, loonsubsidie, Korting di 12.6% den e bezoldiging di ambtenaar, caso di Touffaneli y exoneracion di Edison Briezen. Unda e responsabilidad tabata? E ta increibel cu ainda na Aruba nos no tin cuenta anual desde 2019. Responsabilidad financiero ta e accion mas importante den un pais cu financieramente tin hopi reto. Nos Parlamento ta drumi, pero mi tin speransa cu Aruba lo vota 2025 pa un direccion corecto. Pa un representacion mas digno y mas enfoca riba tene su gobierno responsabel. 

Pa contesta e pregunta aki tin dos componente importante, integridad y corupcion. Corupcion ta causa cu ⅓ parti di placa y fondo publico ta bay den man di un grupito, mientras cu esaki por a wordo inverti den Pueblo. Integridad y bon gobernacion ta e fundeshi di un gobierno, paso pueblo ta confia su representantenan cu ta duna e confiansa di pueblo na e gobierno pa asina e por goberna. E principio di confiansa ta e base fundamental di nos estado di democracia. 

Nos proposicion pa restaura e confiansa perdi di hopi votado ta: 

Primeramente, un landsverordening Instelling Ministeries, cu ta regla e responsabilidad ministerial manera e conseho di Raad van Advies di 25 april 2024. Pa di dos, ancra e codigo di comportamento di un ley nobo cu PDP kier propone. E ley aki lo mester percura pa tin un profielschets pa cada minister. Den nos vision e ta inaceptabel cu un minister di pais Aruba no tin un estudio pa e cartera cu nan ta responsabel pele. E den e gobierno actual e cantidad di persona cu no tin un diploma pa ta minister ta 4, cuatro minister cu no tin diploma y estudio pa por ta den e funcion cu nan ta. Esaki ta inaceptabel !!!

Banda di esaki nos ta propone pa fiha e LIM na 12 aña, cu lo por wordo solamente cambia cu un mayoria cualifica den parlamento (14 di 21 parlamentario) pa percura cu e siguiente gabinete no ta djis cambia e LIM politicamente. Esaki lo garantisa cu cada departamento cu ta resorta bou di e ministerio lo conoci continuidad, algo cu Aruba no tabatin pa e ultimo 4 decadanan. Esaki a resulta den fondonan publico wordo uza di un forma ineficiente ora gobierno ta cambia di asignatura y ta stop tur proyecto, maneho y ley cu e gobierno anterior a laga atras. Pa es motibo aki, ta esencial pa introduci e Secretaris-Generaal di cada Ministerio. Esaki lo caba cu nepotismo y ‘vriendjes politiek’ e lo percura cu tin continuidad, consistencia y unidad den e maneho cu lo keda garantisa.

Esaki ta loke no tin aworaki, cu nombramento di ‘friends & family’ den e ministerionan. E responsabilidad di e Secretaris-Generaal lo ta pa percura cu tin coordinacion riba e ‘hoofdlijnen’ di e preparacion di maneho y ehecucion di esaki dentro di cada ministerio. E lo finalmente, garantisa tambe cu tin mas unidad, continuidad di maneho.