Connect with us

Labamento di pia den misa: Un tradicion di humildad

Aruba

Labamento di pia den misa: Un tradicion di humildad


“E no ta un sacramento, sino un muestra di humildad cu nos Señor a siña nos. E tabata kiermen cu el a bin pa sirbi y no pa wordo sirbi”, asina pastoor Jairo Maduro di e parokia Inmaculada Concepcion na Santa Cruz a splica. Hopi fiel no conoce e tradicion aki, cu ta forma parti di e ritual rond di e ceremonia rond di Huebs Santo. Tur ta parti di e institucion di e eucaristia.

E prome imagennan di Corsou, di obispo Luis Antonio Secco di Obispado di Willemstad, labando pia di preso, a hala hopi atencion. Pa hopi e tabata algo straño of nobo, pero e berdad ta cu esaki ta un tradicion for di hopi aña caba. Es mas, e ritual ta encera laba pia di hende homber y ultimamente hasta a cuminsa laba pia di hende muhe tambe.

Durante e fin di siman aki, rond di celebracion di misa di Huebs Santo, Bierna Santo y Pasco di Resureccion, ta organisa hopi ceremonia catolico pareu. Ta recorda institucion di e eucaristia, sacerdocio y e mandamento di amor. Ta corda tur esaki durante e misanan cu ta ofrece den tur parokia, tur rond di nos isla. Den e misa crismal, pastoornan ta renoba nan consagracion.

Huebs Santo

Huebs Santo tin un nificacion special pa tur catolico. Riba e dia aki ta conmemora e institucion di dos sacramento masha importante y cu na mesun momento ta fundamento di misa catolico, esta e eucaristia y sacerdocio. E prome ta e alimento spiritual pa excelencia y e di dos ta pa celebra e sacramentonan.

Durante e misa crismal di Huebs Santo ta bendiciona e azetanan cu ta uza durante e consagracion di catoliconan. Ta celebra e misa di “Cena del Señor” durante oranan di atardi pa mas tanto parokiano posibel por participa. Segun e tradicion, riba dianan asina ta prohibi misanan bashi y sin fiel den dje. Den pasahe di bijbel ta papia di institucion di e eucaristia.

Durante e mesun misa aki tambe ta laba pia di fielnan. Segun e tradicion, riba e dia ey ta laba pia di 12 hende homber representativo di comunidad. E acto aki ta nifica e servicio y amor cu Hesus a bin, no pa ser sirbi, sino pa e sirbi otronan.

Misa crismal

Mainta ta celebra e misa crismal, un acto masha importante pa e pastoornan, pasobra durante e acto ta renoba nan compromiso asumi durante e consagracion. E pastoornan ta reuni cu obispo pa corda e institucion di sacerdocio.

Durante celebracion ta bendiciona e azeta cu ta uza ora di consagracion di e cristiannan ora di bautismo, confirmacion, santa oleo pa enfermo y ora di consagracion di pastoornan nobo.

Bierna Santo

Riba e dia aki ta conmemora e pasion y morto di Cristo. Misa ta habri su portanan trempan pa permiti presencia di fielnan, cu door di tradicion ta acudi na masa riba e dia aki. For di merdia, ta contempla e crucificacion, e lectura di shete palabra, sigui pa e acto principal cu ta e celebracion di e pasion. Tambe lo realisa e adoracion di cruz y e camind’i cruz. Bierna Santo, mescos cu e diaranson di shinishi, ta dos dia cu creyente catolico ta yuna y abstene di come carni.

Diasabra Santo

Diasabra, tur expectativa ta riba e anuncio di e vigilia pascual cu ta proclama e resureccion di Hesus.





Source link

More in Aruba

To Top