Kousa promé ta kontra militarisashon di korsou

Ku hopi tamtam Hulanda a anunsiá yegada di 2 “MQ-9 Reaper-drones” na base merikano FOL
na Hato. E “MQ-9 Reaper-drone” ta un avion sin tripulante ku por keda 27 ora largu den laira pa
spioná, eksplorá i opservá moveshonnan sivil i militar. E “Reaper-dronenan” aki ta kombertí tur
e datonan kolektá i tin kapasidat pa drenta den atake aéreo. Por stür e aparatonan aki for di
distansia grandi. Segun  Ellen Maduro-Jeandor, Indira Boelbaai, Giselle Rosalia di Kausa prome , Sintá na Hulanda por dirigí e drone-nan te aki na Kòrsou. Ya Hulanda ku Merka
a duna un demostrashon festivo di e drone-nan den presensia di mandatario i prensa.
Resientemente un mayoria den Tweede Kamer a ekspresá ku nan lo ke pa ekipá e drone-nan aki
ku arma. Nan ke pa kombertí nan den “killerdrone”. Drone pa mata hende, anto operá aki na
Kòrsou. Esaki despues ku komandante di forsanan di kombate hulandes a trese e asuntu aki. E
ta haña ta lógiko pa ekipá e drone-nan ku arma, den bista di e guera di Ukraina i Rusia. Minister
Presidènt señor Pisas a bisa ku e no tabata sa nada nada di asuntu di harmamentu di e
dronenan. Ta na e presentashon di e promé training el a tende esaki.
Si Hulanda komo parti di OTAN ta haña ku e mester ta enbolbí den guera entre Rusia ku
Ukrania, ta asuntu di Hulanda. E problema ta ku Hulanda ku Merka ta militarisando Kòrsou. Nan
ta sasia nan set di violensia, guera i agreshon aki riba nos teritorio. Hulanda tin un base militar
na Suffisant, un na Parera i tin e base merikano FOL na Hato. Trabounan di konstrukshon pa un
di kuater base militar na Wakawa ta den ful swing. Anto tur esaki a base di un maneho
unilateral di Hulanda ku Merka.
Nos tur ta kòrda e lucha di e piskadónan ku pa años ta piska den e awanan na Wakawa. Un
lucha pa nan derechi di por gana nan pan di kada dia honradamente. Miéntras gobièrnu tabata
na mesa ku e piskadónan pa yega na un areglo, por a tuma nota ku asombro di un roster ku ta
indiká e dianan ku militarnan tin tiramentu na Wakawa. Ta kasi tur dia tin tiramentu den e área
di Wakawa. No ta sobra práktikamente niun dia den siman pa piskadónan sali bai piska sin kore
peliger di tiramentu di militarnan di OTAN. Miéntras e situashon di militarismo na Wakawa
tabata andando, pueblo por a tuma nota di un barku di guera merikano misterioso ku a drenta
haf di Kòrsou sin ku tabatin niun informashon riba e asuntu aki.
Otro aktividat militar ta e transportenan di material misterioso den gran sekresia riba
kareteranan di Kòrsou. Awor ta “drone” di guera pa vigilá i eventualmente ataká tin instalá riba
nos suela. KIKO TA PASANDO. Ta ku ken Kòrsou tin guera? Ken ta nos enemigu? Niun hende
tòg?
Kousa Promé ta kontra militarisashon di nos teritorio. Nos no ta den guera ku niun pais i nos lo
NO drenta guera hamas ku niun pais riba e mundu aki. Kousa Promé ta kontra ku ta uza nos
teritorio komo base militar i kontra tur e desaroyonan rondó di esaki. Kousa Promé ta para pa e
prinsipio di promové Kòrsou i Caribe komo un zona di pas. Nos ta un pais ku no ta provoká

guera i ku no mester di base militar. Tin un Karta Magno di Caribe kaminda pueblonan di Caribe
a hura ku otro ku ta mantené Caribe komo Zona di Pas. No ta ataka otro i lo biba ku otro den
harmonia i pas. Kòrsou mester tene su mes na e kombenio aki i rechasá tur violensia i agreshon
militar riba su suela. Ban mantené Kòrsou dushi, amabel i pasífiko manera semper nos tabata.
Kousa Promé ta hasi un yamamentu pa stòp militarisashon di Kòrsou.