Connect with us

Kontribushon balioso di studiantenan yu di Kòrsou den di dos guera mundial durante Siklo Patriotismo APES

Korsou

Kontribushon balioso di studiantenan yu di Kòrsou den di dos guera mundial durante Siklo Patriotismo APES


Akademia Popular Errol Scoop tabatin otro lès edukativo i impreshonante. E biaha aki tabata dosente drs. Trevor Bakhuis ku a mustra riba importansia di historia den e proseso di patriotismo i a analisá kurashi, determinashon i balentia di algun yu di Kòrsou ku a demostrá amor profundo pa nan próhimo durante guera na Hulanda. El a trata e.o. Tirso Sprockel, Luis de Lannoy, Evert Newton i Tarcisio Kroon. Nan idea tabata pa kaba di studia i bai bèk pa edifiká nan pais. Ora nan a regresá Kòrsou nan a kontribuí meritoriamente na desaroyo di nan pais natal.

Sr. Bakhuis a mustra ku historia kolektivo a hasi e pueblo aki loke e ta awe.

Na entrada di su lès sr. Bakhuis ta analisá e kantika “Nos ta bai Hulanda den bapor franses” i e ta mustra ku mester analisá material históriko ku ta uza hopi profundo pa evitá mal interpretashon di historia. Análsis di historia ta mustra ku e tempu ei ta ku bapor studiantenan tabata bai Hulanda bai studia. Pa falta di konosementu ta kanta: “bonchi riba bonchi enbes di ponchi riba ponchi”.Historia ta mustra ku e tempu ei ta ponchi tabata uza den haf.

Drs. Bakhuis a mustra ku idioma materno ta instrumental den resistensia. Por ehèmpel studiantenan ku a bai studia den añanan 40 na Hulanda, un pais kompletamente straño pa nan, a keda huntu pa motibu di e region for di kua nan ta bini i e idioma ku nan tabata kompartí huntu.

Den e periodo ku Alemania a okupá Hulanda diferente studiante yu di Kòrsou a duna un kontribushon hopi balioso na aliadonan. Drs. Bakhuis ta duna un relato di algun di e yunan di Kòrsou ku a duna nan kontribushon durante periodo di guera.

Tirso Sprockel tabata balente. El a skonde sòldá i piloto di aliadonan i yuda hudiunan maske su bida tabata kore peliger. Pa e akshon heroíko aki Sr. Sprockel a risibí dos karta di gradisimentu i apresio.  Unu serka General Eisenhower i unu di forsa aéreo ingles. Na Kòrsou sr. Sprockel a traha despues komo dosente. E tabata un linguista ku a studia i hasi hopi esfuerso pa rekonosementu di Papiamentu. El a risibí tambe e distinkshon di dòkter honoris causa pa su esfuersonan pa idioma Papiamentu.

E yu di Kòrsou Tarcisio Kroon tabata un sargento ku hopi kurashi. El a enfrentá batayanan intenso. E tabata dominá ingles i hulandes i tabata e konekshon stratégiko entre trupanan hulandes i ingles. Tarcisio Kroon tabata e promé kardiólogo yu di Kòrsou profeshonal i spesialista di pulmon. Antes tabata yama e kuido intensivo na su nòmber.

Luis De Lannoy a pasa den situashon hopi kruel durante guera. A ser’é den un prizòn na Utrecht kaminda lunanan largu a tortur’é, a batié te hasié surdu i a zuai e dor di glas pa oblig’é di papia. Apesar di esei Luis de Lannoy no a sukumbí pa e preshon di alemannan i no a revelá nada. El a tèrmina su estudio di botikario i bolbe Kòrsou pa yuda su pais. E tabata aktivo ku e.o. plan di vakashon pa muchanan di ménos rekurso.

Evert Maria Newton tambe a forma parti di e grupo di resistensia antiano huntu ku Boy Ecury di Aruba, Luís de Lannoy i Tirso Sprockel. E base di atake tabata situá na e penshun kaminda Newton tabata biba.

Johnny Mauricio a skonde pasó e no tabata ke pa sòldánan di Hitler kaptur’é i mandé Alemania pa hasi trabou pisá. Nan a logra kaptur’é después i ser’é den Oranje hotel. Despues a mand’é un kampamentu di konsentrashon. Aki den nan a tortur’é. Mauricio su determinashon a pone ku el a logra hui bai.

George Maduro tabata un érue di lucha di resistensia ku durante di dos guera mundial a dirihí diferente atake riba alemannan. El a liberá villa Leeuwenberg i a kue alemannan parashutista prezu. El a entregá su bida pa e pueblo hulandes.

Drs. Trevor Bakhuis ta enfatisá ku durante di dos guera mundial ta hopi kos algun yu di Kòrsou ku tabata studia i biba aya a hasi.

I e ta sera su lès indikando un situashon hopi tristu i falta di patriotismo relashoná ku e manera ku a trata e graf kaminda ku nos érue Luis Brion tabata derá. Despues ku a saka e kurpa di Luis Brion i traslad’é pa e Panteon na Venzuela, no a dediká tempu mas na e graf di Luis Brion. A laga esaki para deteriorá i bai kompletamente atrás. Yerba ku nèshi grandi di maribomba a krese tapa e graf. Esaki ta muestra kla di falta di patriotismo di gobièrnunan di turno. Esaki ta un komportashon bèrgonsoso.

E siklo aki mester yuda promové e sentido di patriotismo i lanta sintimentu di orguyo di tal manera ku nos ta balorá, kuida i defendé nos patrimonionan i ta evitá ku e tipo di kosnan aki ta ripití.

Djadumingu 26 di sèptèmber partisipantenan ta bai den área di St. Martha pa será konosí ku patrimonionan masha bunita di Kòrsou pero ku lástimamente ta den man di stranhero.

Djaluna 27 di sèptèmber e siklo ta sigui ku dosente drs. Hubert Scherptong, ku ta bai amplia riba un vishon patriótiko pa ekonomia di Kòrsou.



Source link

Click to comment

Leave a Reply

Your email address will not be published. Required fields are marked *

More in Korsou

To Top