John Hart di Fundacion Mito Croes: Tin plan grandi y concreto pa un gobierno unda turismo y naturalesa ta move hunto

” frameborder=”0″ allow=”autoplay” allowfullscreen>

Como presidente di e Fundacion Mito Croes pa Estudio Social Cristian Aruba (FESCA), John Hart a indica diamars mainta cu a desaroya un plan di accion pa AVP ehecuta cu e obhetivo di consolida industria di turismo, mientras ta salvaguardia e producto Aruba tambe.

Esey ta forma parti di e tarea di e fundacion, basa riba rapport di Raad van Advies, entre otro y estadistica di entidad den e sector manera ATA y AHATA, formula e miho maneho; uno cu ta berdaderamente ta traduci e prosperidad di turismo den e prosperidad pa pueblo.

“Ora mi drenta un hotel y wak con nos ta trata nos bishitantenan, e ta yena mi di orguyo pasobra mi sa cu ta esey ta ken nos ta como Arubiano. Pero den e siman aki di turismo, ta importante tambe pa nos tin un momento di reflexion,” e hoben politico hoben a indica.

Raad van Advies den su cuenta anual di aña pasa, tambe a haci un analisis, y esey ta cu, aunke turismo ta bayendo bon na Aruba, e no ta traduci den un miho calidad di bida. Hogarnan ta bou di hopi presion y e cost of doing business ta hopi halto. Consequentemente esaki ta traduci su mes na e consumidor. Mescos cu localnan, turista tambe ta experiencia e efecto di e costo di bida halto na Aruba. E crecemento di nos economia mester traduci su mes bek den prosperidad di nos ciudadanonan. Sinembargo, gobierno actual no ta mustra di reconoce cu nos tin reto grandi  y ta importante pa tuma paso concreto.

Aunke cu Dia Internacional di Turismo ta diabierna, 27 di november, no a sinti cu gobierno a duna atencion special na e tema aki. Mas pasobra turismo ta e principal pilar economico di Aruba. E partido den oposicion AVP a dedica nan conferencia na esaki.

A bini dilanti, unda cu e hoben politico Hart tabata presente, e metanan di e partido berde pa cu e principal pilar economico di Aruba. E prome punto ta yega na un dialogo social cu e meta pa yega na un acuerdo nacional pa logra 5 punto importante. “Ta trata di prosperidad comparti, high season henter aña, reduci cost of doing business, control di crecemento y proteccion di producto

AVP tabatin diferente encuentro di e forsa laboral den e sector turistico aki y mayoria ta bisa mesun cos: e industria cu a construi cu trabou duro y sodo, no ta brinda suficiente prosperidad; cu no ta gosando di e prosperidad cu turismo ta crece. AVP ta kere cu mester yega na miho salario, miho condicion di trabou y miho oportunidad pa esunnan cu ta traha den turismo por crece.

E partido ta kere den formulanan uza den pasado, manera duna mas bida na e temporada di off-season biniendo cu iniciativanan, manera a haci den pasado introduciendo International Hi-Winds Compitition y Jazz Festival durante off-season. “Esaki a sirbi como inspiracion pa otro competencianan den deporte manera Beach Tennis y festivalnan musical. Asina a cuminsa logra e tempo ey cu incentivo y eventonan pa cuminsa yena e epoca di low season. Esaki ta lunanan masha dificil caminda hotel y restaurant apenas por sobrevivi y industria crucero ta bay di 10 barco pa siman dia pa 1 barco pa siman.”

Tambe a papia di mitiga of controla e crecemento di capacidad. Esaki ta duna tempo y espacio pa ahusta tur otro factor den comunidad.

Hart ta kere cu e partido na cual e ta pertenece lo no tin problema cu e reto aki, mirando con a atende cu situacion similar den pasado, biniendo cu proyectonan manera Avenida Watty Vos, Green Corridor y mudamento di waf pa Barcadera. Tur esaki a evita stancamento continuo di trafico. A haci mega onversion cu e meta di mehora y embeyece Aruba pa crea un miho producto y drechando calidad di bida di e ciudadanonan.

John Hart ta un hoben cu ta aparece pa prome biaha riba un lista politico. El a splica cu e partido na cual e ta afilia kier yega na un acuerdo nacional cu pa 5 aña largo ta haci un “inhaalslag” grandi pa percura cu e prosperidad ta yega cerca e hendenan; cu e infrastructura di Aruba por carga e crecemento y percura pa proteccion di naturalesa. E partido ta consciente cu industria turistico ta pone un presion enormemente grandi riba loke nos ta stima di nos pais cu ta nos naturalesa.

P’esey e hala cientifico di partido, Fundacion Mito Croes, ta trahando dia y anochi riba e temanan aki y ta asina leu cu AVP por anuncia cu ta preparando un raamwet. Den e prome 100 dia di gobernacion e mester pasa na Parlamento y ta compromete gobierno. Ta preparando e raamwet aki cu otro entidad cientifico internacional di filosofia Cristian Democrata.

Pa mehora calidad di bida di cada persona cu ta biba riba e isla aki, Hart ta haya cu mester inclui tur den e plannan.