Connect with us

Investigacion ta bin den ELMAR y STA ta sosten’e!

Caribe

Investigacion ta bin den ELMAR y STA ta sosten’e!


WhatsApp Image 2024 07 10 at 10.45.41 AM

“Minister a yama mi ayera y a confirma cu ayera mes of awe lo sali un carta pa Utilities Aruba den cual ta instrui nan pa haci un investigacion forensico den NV ELMAR.”, asina Diego de Cuba, presidente di e sindicato STA, a admiti un rato pasa. El a confirma cu for di luna di mei caba nan a denuncia e mesun tipo di practicanan dudoso den e compania y a informa minister tambe, pero no a haci nada. Awo cu e carta di trahadonan preocupa a sali, a opta pa investiga. “Y nos ta sostene e investigacion tambe. Ta ora pa pasa un basora den NV ELMAR y den Utilities Aruba, pasobra ta fiesta tin”, segun Diego de Cuba

E sindicalista a sigura cu nan miembronan constantemente ta trece denuncia na nan di algun hacimento di negoshi of practicanan dudoso. Pero e realidad ta cu e relacion cu e director di NV ELMAR ta fastioso. No tin un maneho di porta habri eyden y Diego de Cuba mes ta kere cu Anthony Irausquin ta e director di compania estatal cu mas ta biaha. “E ta biaha mas cu director di ATA y di Airport mes. Constantemente e ta afo. Ta ki tempo e ta resta pa maneha e compania aki, cu ta yena di reto y desafionan”, asina e sindicalista ta puntra su mes.

Fuentenan yega na e asunto aki a sigura cu Minister Glenbert Croes no ta contento cu e situacion. Obviamente ta saliendo na cla, segun e trahadonan, cu tanto na Utilities Aruba y na NV ELMAR tin asuntonan cu merece un investigacion. Si no ta ladronicia, ta practicanan no integro cu ta carece di etica y transparencia den direccion di Gobierno di Aruba como doño. Cu trahadonan ta insisti cu tanto e director di NV ELMAR y di Utilities ta konkel cu pagamento di nan recibo di coriente di nan cas of negoshi, ta un asunto cuestionabel y condenabel. Pero, tur esaki mester investiga pa yega na e berdad y si ta asina, Gobierno lo mester asumi su responsabilidad.

For di Cocolishi no tin mucho informacion mas cu djis “Glenbert ta rabia”. Loke cu si a yega na nos redaccion ta cu lo a acerca Anthony Croes di Plus Accountant pa realisa e investigacion forensico. Cu si el a acepta of no, ainda no ta conoci. E unico reto aki ta cu Gobierno lo kier pasa e instruccion via Utilities Aruba, cu de facto tambe ta formando parti di e fiesta. Pues, ta recomendabel pa como “aandeelhouder” ordena un investigacion directamente pa verifica si e acusacionnan ta corecto of no.

Den seno di NV ELMAR awor por deduci cu ambos sindicato a activa, tanto ALVAST como STA. Y ambos ta papia e mesun idioma, cu e funcion di Anthony Irausquin cada dia ta birando “onhoudbaar” den e compania. A pidi gobierno pa prohibi su entrada despues di vakantie na Spaña, pa e investigacion por tuma luga den tur trankilidad y transparencia. Ta wardando riba contesta y instruccion di gobierno, de lo contrario trahadonan di NV ELMAR ta prepara pa sali afo diabierna awo.

Tocante STA

A funda Sindicato di Trahadonan di Aruba (STA) na aña 1964. E tempo ey como “Gouvernements Arbeiders Bond Aruba” pues GABA y cu tempo a cambia pa STA. E presidente actual ta Diego de Cuba, cu a tuma timon di e sindicato over na aña 2009 ora nan tabatin solamente dos compania afilia. Despues di 14 aña, awe e sindicato ta conta cu hopi compania afilia y cu un lista largo di miembro, haciendo nan un di e sindicatonan di mas grandi di Aruba. Nan ta representa un cantidad di miembro den sector priva, den gobierno y hasta den companianan priva di gobierno.





Source link

More in Caribe

A2Z ADMINISTRATION

AD

To Top