Connect with us

Indice di Prijs di Consumo pa luna di Maart 2022

Aruba

Indice di Prijs di Consumo pa luna di Maart 2022


E CPI pa luna di Maart 2022 ta 101.47, loke ta representa un subida di 1.0% compara cu e indice di Februari 2022 (100.44) y acumulando un subida di 0.9% te cu na Maart di e aña aki. E cambio di e CPI pa e ultimo diesdos (12) lunanan (Maart 2021 te cu Maart 2022) ta 4.0%, un subida di 5.1 punto di porcentahe (ppt) compara cu e periodo corespondiente di aña pasa (-1.1%).
E promedio anual di e tasa di inflacion pa e periodo di Maart 2021 te cu Maart 2022 ta 2.1%, un subida di 4.4 ppt compara cu e -2.3% registra den e periodo di Maart 2020 te cu Maart 2021.
Durante e luna aki, nuebe (9) di e diesdos (12) sectornan a registra subida di prijs. E subidanan cu tawata tin e mayor efecto riba e CPI a wordo registra pa e sectornan di “Transporte” (4.2%) y “Paña y sapato” (6.7%), causando un efecto di 0.57 y 0.17 ppt, respectivamente. E subidanan den e sectornan restante a contribui cu un efecto di 0.43 ppt riba e CPI di Maart 2022.
E subidanan aki a wordo contraresta parcialmente door di principalmente un caida den e indice di e sector di “Comunicacion” (-1.4%) cu a contribui cu un efecto di -0.12 ppt riba e CPI di Maart 2022. E caida den e sector restante a contribui cu un efecto di -0.03 ppt riba e CPI di Maart 2022.
E subida den e sector di “Transporte” a wordo causa door di principalmente subida den e categorianan “Gasto relaciona cu uso di vehiculo di transporte personal” (3.7%) y “Compra di vehiculo” (5.4%), causando un efecto di 0.32 y 0.24 ppt, respectivamente. E subida den e sector di “Paña y sapato” a wordo causa principalmente door di un subida di 6.6% den e categoria “Paña”, causando un efecto di 0.13 ppt.
E caida den e sector di “Comunicacion” a wordo causa door di un caida den e categoria “Ekipo di telefon y fax” (-26.9%), causando un efecto di -0.12 ppt.
Canasta di consumo
E canasta di consumo di e CPI ta consisti di 408 bienes y servicionan. Compara cu Februari 2022, 58.6% di e bienes y servicionan aki a conoce un aumento di prijs causando un efecto di 1.79 ppt, mientras cu 24.0% ta mustra un caida di prijs, cu a contribui cu un efecto di -0.76 ppt y pa e restante 17.4% no tawata tin cambio den prijs. Prijsnan di bienes a subi cu 1.6% y a causa un efecto di 0.93 ppt. Prijsnan di servicionan a conoce un subida di 0.2% y a causa un efecto di 0.10 ppt riba CPI di Maart 2022.
Core inflation
E CPIC (core inflation) – CPI excluyendo e efecto di energia y cuminda – a registra na Maart 2022 un subida di 0.8%. E indice di energia – cu ta consisti di e productonan: electricidad, awa, gasolin y diesel a registra un subida di 8.7%. E indice di cuminda a registra un subida di 2.0%.
Bestaansminimum
E bestaansminimum pa un hogar consistiendo di dos (2) adulto y dos (2) mucha (edad 0-14 aña) na Maart 2022 ta Afl. 4,980, un subida di Afl. 239 compara cu Maart 2021 (Afl. 4.741). E bestaansminimum pa un hogar di un (1) adulto ta Afl. 2,372, un subida di Afl. 114 compara cu Maart 2021 (Afl. 2.258).





Source link

More in Aruba

To Top