Connect with us

Hospital: Recientemente a opera tres pashent pa recobra nan oido

Aruba

Hospital: Recientemente a opera tres pashent pa recobra nan oido


Siman pasa e team di camber di operacion di Dr. Horacio E. Oduber Hospital conhuntamente cu un team di Hulanda y di compania MED-EL a haci implante cochlear. Pues loke a logra ta duna hende oido bek pa medio di operacion. E cooperacion aki ta sosodiendo pa casi 10 aña caba y por mira bek unda a logra pa 40 pashent recobra nan oido. Pa haci e operacion aki ta conta cu yudansa di profesor dokter R. Stokroos di Universidad di Utrecht como tambe ingeniero di MED-EL, esta L. Lehning. 

Ta haci esaki un bes pa aña cu ta inclui e ‘after care’ tambe, yudando 3 pa 4 pashent, incluyendo pashent entre otro di Boneiro, Corsou y region. 

Dr. Steve Cabenda, KNO arts, a duna di conoce cu recientemente e prome fase di implante di orea a tuma luga cerca tres pashent. E prome fase ta encera loke ta implanta e parti interno den e orea, pues e operacion pa por hinca e aparato cu su electrode paden den e orea.  Aki seis siman ta bay pone e parti di pafo y esaki lo traha hunto cu esun di paden. E aparato pafo ta manda  e señal di frecuencia na e parti paden y esey ta converti e señal  pa asina e persona por scucha. 

Prof. dr. Robert Stokroos, Hoogleraar & medisch afdelingshoofd KNO di UMC Utrecht, a duna di conoce cu e cooperacion aki ta pa por haci e operacion na Aruba di cochlear implant  (implante di orea), pa yuda pashentnan di tur edad recobra nan oido y sin cu nan mester bay Hulanda pa opera. Na comienso dr. Stokroos a guia dr. Cabenda y aworaki dr cabenda ta hacie y en caso surgi cualkier problema nan dos por soluciona esaki hunto.

Na Hulanda e team ta existi desde 1986 y a mira mas di mil pashent caba pues nan ta trece nan experencia y conocemento tambe Aruba y comparti esaki door cu e team na Aruba ta mas chikito y tin menos pashent. 

Dr. Cabenda ta splica tambe cu e team local hunto cu AZV ta selecta pashent cu por bin na remarca p’e operacion aki. Y haciendo e operacion na Aruba ta mas comodo pa e pashent, pero tambe ta menos costoso, pues e gastonan ta mas abou. 

Ing. Lucas Lehning, Senior Regional Manager di compania MED-EL, a duna di conoce cu nan rol den henter e proceso ta pa midi cu e aparato interno ta traha y cu e conexion cu e nervio ta optimal. E implante ta consisti di un coil y ‘receiver/stimulator’ cu electrode cu ta wordo hinca den e cochlear. Cu e coil nan ta stimula e parti paden y asina haya feedback di e nervio si e ta funciona. Esaki mester haci na final di operacion prome cu e parti di ‘stitch’ tuma luga.

E implante tin un parti interno y tambe externo, despues di operacion si tur cos a cura, ta programa e ‘processor’ den e instituto di dr. Cabenda. E ta programa e implante na un manera cu e pashent tin su oido optimal. 

E pashent e ora ey tin di siña pa interpreta e stimulacion nobo cu ta tuma poco pasenshi y tempo pero cu resultado tremendo p’e pashent. Aplauso grandi pa e operacionnan exitoso aki cu tin balor inmenso pa nos pashentnan y nan calidad di bida.





Source link

Click to comment

Leave a Reply

Your email address will not be published. Required fields are marked *

More in Aruba

To Top