Connect with us

Hopi a rindi respet durante despedida di abogado Chris Lejuez

Aruba

Hopi a rindi respet durante despedida di abogado Chris Lejuez


Un cantidad di hende a yega Aurora Funeral Home diaranson mainta pa despedi di e conocido abogado mr. Chris Lejuez. Su señora, yiunan, nietonan y su famia a haya hopi palabranan di sosten, anectodanan y storianan real den cual publico a expresa nan aprecio pa Chris Lejuez.

E abogado a haya sa, no mucho tempo pasa, cu e tin cancer. E enfermedad a cana lihe y den un tempo masha cortico a apodera di e curpa di Chris Lejuez y no obstante tur esfuerso di dokter na Aruba y Colombia, toch no a logra cura di e enfermedad. E tabata na tino durante henter e proceso, te dia cu el a fayece.

Chris Frans Karel Joseph Lejuez a bay na edad di 74 aña. Na bida e tabata un di seis ruman, casa cu Laraine Lejuez Pappers; matrimonio for di cual a nace tres yiu y welo pa ocho nieto. Ademas di un cabes ehemplar di famia, Lejuez a hiba un carera hopi exitoso como abogado.

El a practica ley penal, pero tambe civil y a dirigi un bufete renombra ubica net otro banda di caminda di edificio di Corte na Playa. Den transcurso di e ultimo aña, el a desmantela e bufete pa asina gradualmente prepara pa su periodo di merecido hubilacion. 

Mr. Lejuez tabata un bon amigo di 24ora.com y Trempan, semper dispuesto pa coopera cu un entrevista, informacion, pero tambe conseho y critica constructivo si tabata necesario. Nos ta extende nos mas sincero palabra di condolencia y forsa na henter famia Lejuez cu e perdida aki. Cu Chris sosega na paz.





Source link

Click to comment

Leave a Reply

Your email address will not be published.

More in Aruba

To Top