Connect with us

Historia i Kultura di Kòrsou

Korsou

Historia i Kultura di Kòrsou


Akademia popular Errol Scoop

Akademia Popular Errol Scoop e ala di edukashon emansipatorio di Movementu Kousa Promé ta ranka sali 17 di aprel próksimo ku un siklo di konsientisashon titulá “Historia i Kultura di Kòrsou”. E siklo di lès aki ta pa fortifiká e identidat kurasoleño i pa hasi tur esnan ku partisipá mas patriótiko i mas yu di Kòrsou. APES ta pone pa e okashon aki énfasis spesial riba partisipashon di hóbennan. Dikon? Pasobra hóbennan informá ta un futuro garantisá. Futuro di Kòrsou ta den man di hóbennan. Mayornan i adultonan stimulá bo yu òf ñetunan pa partisipá na e siklo importante aki. 

Durante e siklo lo bini dilanti vários tema interesante, duná pa dosentenan universitario baké riba nan tereno. Lo trata p.e. Afrika komo kuna di sivilisashon i di humanidat. Kontinente Afrika promé ku sklabitut transatlántiko. Imperio i Reinadonan afrikano. Komèrsio transatlántiko. Kolonialismo i agreshon europeo na Afrika. Asia i Amérika. Historia kolonial di Kòrsou. Sklabitut na Kòrsou i e lucha di Tula. Represhon i resistensia di e yu di Kòrsou. Presensia afrikano den kultura di Kòrsou. Konsekuensia di sklabitut i kolonialismo riba e yu di Kòrsou.

Pa inskribí por yama òf what’s app na e numbernan 5126216  i 5271577. 

Inskripshon ta kosta FL. 25,-. Lèsnan di e siklo aki ta grátis. Tur djaluna di mitar di shete pa nueb’or e lèsnan ta tuma lugá na Sentro di Bario Santa Maria. E último lès lo ta dia 23 di yüni 2023. Tin posibilidat ku por sigui e lèsnan via livestreaming.

UN PUEBLO INFORMA TA UN PUEBLO KU DEFENSA



Source link

More in Korsou

To Top