Happy Parents Happy Children cu di tres conferencia

E team di Happy Parents, Happy Children ta contento di por anuncia nan di tres evento anual en conexion cu Dia Internacional di Mucha. E aña aki, nan ta presenta un seminario cu e titulo: Co-Parenting den Harmonia, un topico importante pa hopi famia den comunidad. 

Ta importante pa menciona cu co-parenting no ta tuma luga solamente entre mayornan separa of divorcia. Co-parenting ta pa tur mayor, biba hunto, mescla, casa, hasta esunnan cu ta lanta nan yiunan cu nan wela y welonan. E seminario aki ta diseña pa duna informaccion valioso y herment practico pa tur tipo di mayor. 

E seminario lo tuma luga diasabra 2 di november di 9:00 AM te cu 1:00 PM na Occasions Ballroom, Metro Mall. Pa locual t’e oradornan, nan ta contento di tin un biaha mas Johnny Boekhoudt, un psicologo y orador faborito di aña pasa, cu lo bay elabora riba e aspecto emocional y psicologico di co-parenting.  Johnny lo elabora riba comunicacion efectivo, solucion di conflicto, compronde impacto emocional riba e mucha, expresa sentimento y mucho mas! 

Tambe como orador lo tin Nancy Gravenstijn, un abogado conoci, cu lo papia riba e aspecto huridico/legal di co-parenting. Un topico vital, specialmente cu e cantidad halto di divorcio riba e isla. Nunca ta mucho trempan of laat pa sa bo derechonan. Abogado Gravenstijn lo elabora un poco mas riba e areglonan entre mayor, responsabilidad financiero, derecho di bishita, procedura y mucho mas. 

Co-organisado y anfitrion di aña pasa, Laura Tromp, un coach di mayor lo ta biahando for di Hulanda pa bin presenta riba e aspecto proactivo di co-parenting. E lo papia riba e importancia di planea delanta y di ta proactivo ora ta yega na bienestar di bo famia y yiunan. Compronde inteligencia emocional den co-parenting, crea bo propio family values y strategia pa comunicacion efectivo y mucho mas. 

Ademas, e organisadonan a invita e representante di Plan di Mayor y Voogdijraad pa uni den un panel p’asina por ofrece informacion importante cu ta trata sosten pa mayor den co-parenting.

E seminario lo ta uno sigur interesante, informativo, empoderante y importante y lo sirbi sigur pa duna guia na tur mayor, nunca bo no ta perde di siña algo nobo. Ticket ta solamente 50 florin, disponibel via Pay.aw, Van Dorp y Plaza Bookshop. E ticket ta inclui informacion valioso, un workbook, desayuno y light lunch. 

E seminario aki no lo ta posibel sin ayudo di Aruba Bank. E organisadonan ta gradici Aruba Airport Authority, Aruba Tourism Authority, Setar N.V., Elite Productions, Compra N.V. pa nan aporte p’e seminario aki y ta gradicid nan pa scoge pa inverti den comunidad y mas ainda pa bienestar di nos futuro, nos muchanan. 

E organisadonan kier invita tur mayor pa busca nan ticket awe mes p’e seminario aki, pasobra luga ta limita. E seminario aki ta un oportunidad p’e mayornan uni, siña y comparti experiencia, mientras por benificia di strategia duna pa experto p’asina hunto nos crea un siguente generacion mas saludabel y feliz! 

Ban traha pa nos yiunan, no contra nan.