Connect with us

Grupo di studiante di Universidad di Aruba cu fundraising dia 24 di april

Aruba

Grupo di studiante di Universidad di Aruba cu fundraising dia 24 di april


Diadomingo, dia 24 di april, un grupo di studiante di Universidad di Aruba, sector Hospitalidad y Turismo (FHTMS), ta organisando un evento pa recauda fondo como parti di nan vak MICE.

A scoge Fundacion Diabetes Aruba, cu ta dedica na educa y crea conscientisacion riba diferente tipo di diabetes y ta educa comunidad di Aruba con pa biba un bida saludabel y minimalisa diabetes.

E studiantenan a indica cu a scoge e fundacion pasobra nan mes tin miembro di famia cu diabetes y a pesar di esaki a ripara cu falta conocemento di diabetes tipo I riba nos isla.

Mirando esaki, e studiantenan a sinti emocionalmente conecta cu Fundacion Diabetes Aruba, ya cu nan ta comparti e mesun meta cu nan.

Pa yuda crea mas conscientisacion na un manera dibertido, a bin cu e idea pa haci un Trivia Game, esta un hersengymnastiek. E wega lo consisti di 4 tanda cu lo ta basa riba: conocemento di Aruba, farandula di Aruba, salud general y diabetes tipo I.

Lo tin specialista di Diabetes tipo I presente cu lo duna un charla pa educa e hungadonan tocante e malesa aki y tambe salud en general.

E evento lo tuma luga den hofi di Universidad di Aruba mes pa 4:30 pm. Porta lo habri pa 3:30 pm.

Ta invita henter comunidad pa bin hunga, pasa pret, gana premio, siña y mas cu tur cos, yuda Fundacion Diabetes Aruba.





Source link

More in Aruba

To Top