Grupo di inversionista cu placa y plan realistico ta cla pa desaroya San Nicolas

Posted on 09/7/2023 2:44 pm AST | Updated on 09/7/2023 2:48 pm AST

SAN NICOLAS – Un grupo di inversionista internacional, financieramente solido y cu curazon pa Aruba, ta cla pa haci un cambio serio pa San Nicolas. Ta trata di e grupo cu ta yama nan mes Aruba Economic Development Alliance (AEDA). Diahuebs nan a presenta nan mes na comunidad publicamente pa prome biaha, pa comparti nan plannan cu ta mustra hopi ambicioso, pero mes momento hopi realistico, compara cu otro plannan presenta den pasado. Loke a resalta den e presentacion ta cu un di e tareanan di  AEDA ta cu nan no mester di fondo di gobierno ya cu nan ta solido financieramente y kier solamente pa stimula e comunidad di San Nicolas pa e comerciantenan local di San Nicolas por tin nan mesun negoshi. Esaki por stimula e economia di San Nicolas, ta crea un fundacion economicamente diversifica, ta subi entrada di famianan, trese orguyo pa cu e comerciante y su famia y ta pone ehempel pa futuro generacion cu nan tambe por tin e posibilidad pa tin nan mes un tienda.

MARK LEVINE

Sr. Mark Levine ta lidera AEDA huntu cu un team local. AEDA ta un instancia priva cu su propio fondo. Mark tin experiencia den Desaroyo Economico den Caribe pa mas cu 40 aña. Mark a cuminsa traha na Aruba den añanan 70 y mas cu 30 aña pasa Mark a bin bida na Aruba. Hopi di su tempo na Aruba ela biba na San Nicolas. 

SONDEO EXTENSIVO

Pa identifica kico comunidad di San Nicolas kier, a hasi un sondeo extensivo. For di esaki algun deseo a wordo identifica cu AEDA lo por yuda e comunidad cune. Hunto cu comunidad a crea un proyecto cu lo asisti cu lo siguiente;

– Aruba falta producto di diferente cultura cu ta representa nan Herencia

– Deseo pa por tin propio negoshi

– Conocemento con pa maneha negoshi

– Gasto y huur halto pa por maneha un tienda ta stroba progreso 

– Mas oportunidad pa yega na fondo pa inverti

– Revitalizacion di Main Street San Nicolas

Stimula negoshi chikito ta primordial pa economia por desaroya. Esaki lo yuda cu;

– Boost economia di San Nicolas

– Crea un base pa un economia diversifica

– Aumenta entrada di comunidad di San Nicolas

– Subi e orguyo di e famianan di e doño di tienda

– Ta un ehempel pa fururo generacion tambe bira comerciante

– Crea mas oportunidad den Centro di San Nicolas

Abase di sondeo na San Nicolas, e grupo aki a realisa cu e comunidad ta desea cu lo por tin mas productonan di nan cultura di origen. Esaki a trese tambe pa dilanti cu pa por realisa esaki lo mester tin oportunidad pa e comunidad di San Nicolas por habri nan tiendanan. Abase di e combinacion aki AEDA a crea e proyecto di Aruba Cultural Malls.

CULTURA MALLS 

E proyecto ta ensera cu a cumpra dos edificio den centro di San Nicolas. Esakinan lo wordo renoba y wordo usa como mall pa tienda chikito. Ta den tramite pa obtene un terser edificio. 

E proyecto di Aruba Cultural Malls ta funda priva y Mark ta e unico inversionista. E motibo pa inverti den San Nicolas paso Mark y AEDA ta cere den e potencial di San Nicolas. 

HUUR ABOU

Loke a hala atencion ta e parti unda cu e grupo a dicidi pa pensa y corda riba e comerciante chikito unda cu placa no semper ta rindi. Pa e proyecto por funciona y duna oportunidad na comunidad di San Nicolas, AEDA lo ofrece huur hopi abou pa asina un shop owner potencial por tin oportunidad real por habri su mes un negoshi.  Pa logra di baha e prijs di huur a dicidi di reduci e ganashi pa asina por logra su meta. E proyecto aki lo product ganashi pero den un forma sostenible.   Prijs di huur lo cuminsa na mas o menos Rond di AWG 850,- (excl.).

REACCION DI GOBIERNO

Gobierno di Aruba a responde positivo riba e proyecto y a ofrece pa asista unda cu por.

KI TEMPO TA CUMINSA

Prome cu fin di aña lo cuminsa renobacion riba e prome edificio cu ta ex Cosecha. E main mall lo termina medio 2024 y mas tarda prome cu fin di 2024. Un parti di e Aruba Cultural Malls lo wordo usa como un espacio educacional unda comunidad di San Nicolas por haña curso riba diferente topico, incluso business ownership y financial literacy. 

PLAN REALISTICO

Loke a resalta, ta e forma di pensa di e grupo di inversionista aki, unda cu nan ta actua a base di loke e comunidad kier y mester, envez di bin impone loke e inversionistanan kier of ta kere cu mester tin y kier wak. Tur e ideanan ta puro di e investigacion cuantioso cu nan a haci, pa por haya e informacion y traha riba esaki y desaroye den un idea realistico, sin cu mester  usa placa of fondo publico of asistencia di gobierno pa loke ta placa.