Connect with us

Gobierno hungando cu su suerte: “Si no tuma decision, Hulanda ta tum’e p’abo”

Aruba

Gobierno hungando cu su suerte: “Si no tuma decision, Hulanda ta tum’e p’abo”


Durante pandemia ora cu entradanan di Pais Aruba a cay cu casi 60% y economia tabata plat, Hulanda a extende ayudo financiero y sosten di likides na nos isla, pa nos por keda cumpli cu nos obligacionnan interno y externo. Di mesun forma a duna sosten na Corsou y Sint Maarten. Como condicion, Den Haag a stipula un pakete di reforma, e asina yama landspakket, pa percura cu e recuperacion economico ta sostenibel y duradero. Ademas lo institui un organo (COHO) di Reino pa percura pa esaki sosode. Mester menciona cu e COHO y den gran parti e contenido di e landspakket ta aplicabel pa tur tres pais den Caribe. E unico diferencia cu Corsou y Sint Maarten ta cu e supervision financiero di Aruba ta eleva na nivel di Reino, algo cu nos dos islanan ruman tabata conoce caba ora a desmantela Antias Hulandes y a absorba e debe existente na 2010.

Ken a bin cu COHO?

Ken a firma cu Hulanda pa acorda e contenido di e landspakket?, kico ta bon y kico ta malo den e landspakket? Ken ta para cu pueblo? Ken lo mester tuma medida? Esaki ta solamente parti di tur e opinionnan di e ultimo simannan aki. E realidad ta cu holoshi ta marcando cinco pa diesdos (11:55 pm) y no tin mucho espacio mas pa maniobra mirando cu e proceso di institui COHO ta basta avansa. Mirando cu e ta un ley di Reino, ta parlamento Hulandes – Tweede y Eerste Kamer – lo mester aprob’e. Preguntanan cu Parlamentonan tin ta incorpora den e preguntanan haci na Gobierno Hulandes y durante e tratamento den Tweede y Eerste Kamer, e parlamentonan por participa. Sin embargo, nan derecho ta limita na entrega di mocion, pero nan no tin derecho di voto. 

Importante pa menciona si cu e landspakket – e pakete di reforma – ta un acuerdo politico pa ehecuta cierto reforma structural y a scoge COHO como instancia pa supervisa. Irespectivo di e futuro di COHO, e landspakket ta keda valido y enforsabel via otro instrumentonan manera un areglo mutuo (onderlinge regeling) of un instruccion na Gobernador di Aruba (KB).

AVP y MEP

AVP lo culpa MEP y MEP na su turno lo culpa AVP, pero echo ta cu e dos partidonan aki a goberna nos pais desde 1986 te awe. Ambos a realisa bon proyecto y tabatin vision pa nos isla y a contribui na e desaroyo economico cu awe nos por ta orguyoso di dje y cu nos tur tin probecho di dje di un manera of otro. Perfecto? No. Specialmente si bo analisa cu e desaroyo economico aki a bay a costo di un maneho financiero sostenibel evitando di tuma decisionnan dificil. Mester menciona si cu, cu binmento di CAFT a logra desvia e tendencia negativo, pero esaki no a dura pa largo.

Ken tin culpa cu CAFT a bin Aruba?

Pero awo, kico nos lo gana cu esun culpando e otro. Esey lo drecha e situacion economico? Esey lo pone cu Hulanda lo “lubida y likida” e debe di riba un biyon (1.000.000.000) cu nos a fia den pleno pandemia? Esey lo haci cu prijs den supermercado lo normalisa? Esey lo haci cu prijs di gasolin y diesel lo baha? Esey lo haci cu salarionan den e aparato gubernamental lo normalisa? Si e contesta ta “no”, pakico sigui gasta tempo valioso cu nos no tin mas, pa purba mehora y trece solucion concreto pa nos pais. Specialmente mirando cu institucion di COHO ta den su pleno proceso legislativo – e discusion si e mester ta un ley di Reino si of no, of si e consenso pa yega na e instrumento legal tabata obliga si of no, no ta relevante na e punto cu nos ta aworaki – y e contenido di e landenpakket ta acorda for di dos aña pasa caba. Ta un pakete di 46 medida parti den ocho diferente area di gobernacion.

Pueblo fada den politica

Kisas ta bon pa e dos forsanan politico, encabesa di un banda pa famia Eman y di otro banda pa famia Croes, pa ambos realisa cu e actitud aki mes di tira culpa riba otro tin e pueblo disgusta den politica y ta prefera pa Hulanda tuma over. Un grupo demasiado grandi den comunidad a fada di e constante debate constante entre geel y berde sin un causa berdadero caminda cu pueblo pagado di belasting no ta bay ni un stap dilanti cu discusionnan egocentrico. Encuesta haci recien ta mustra cu mayoria den comunidad ta OK cu Hulanda y cu e medidanan cu ta bin como condicion pa tur e fiansa haci. Awo, si tin algo cu nos ta di acuerdo cu e dos organisacion politico aki ta: pueblo no ta consciente ainda kico e condicionnan aki ta y con nan lo afecta nos calidad di bida.

Tur hende a drumi den luz berde

Nos no tin un contesta riba kico ta e motibo di e falta di conocemento aki. E condicionnan tabata conoci pa tur gremio for di e tempo aya y den transcurso di e dos añanan aki tabata tin eleccionnan parlamentario na Aruba tambe unda cu e contenido di e paketenan di reforma tabata topico di discusion den debatenan politico y esaki a resulta den un continuacion di e signatura den gobernacion. Pero ken su culpa esey? Di e ciudadano cu no ta busca pa sa miho, of cu a lubida? Of di e mesun politiconan tambe, en bes di a uni y forma un solo frente riba e tema aki di negociacion cu Hulanda, a opta pa purba piki un punto politico. Anto awo cu “el tiro le salio por la culata”…awo ambos AVP y MEP ta contra COHO. Siendo cu e ultimo menciona a haya luz berde pa sigui cu e caminda di negociacion cu Hulanda na maart 2021.

No tin boluntad politico

Mester menciona cu e conceptonan inicial di COHO y di landenpakket ta diferencia riba algun punto tecnico solamente cu e version cu a entrega na parlamento Hulandes, pero e esencia a keda mescos. Politico ta alergico pa critica y ta prefera di keda sin tuma decision si e mester bay a costo di su popularidad. Tur ta bisa di tin e mesun vision pa mehora finansa publico di nos pais, pero ningun tin e boluntad di berdad pa hacie pasobra mehora finansa publico lo rekeri pasonan cu lo haci dolor. Y t’e dia di awe esey t’asina. Ni AVP ni MEP tin un plan concreto con ta baha gasto di gobierno y aumenta entrada. Dicon? Pasobra den ambos caso mester kita ambtenaar di trabou, corta den e seguro medico general inpagabel cu nos tin, haci nos fondo di pensioen mas solido y regula salario di empleadonan semi-publico den companianan priva di gobierno.

Dialogo social

Den pasado, durante gobernacion di AVP, a haci uzo di Dialogo Social pa crea sosten den sindicato- y gremionan pa e medidanan cu mester a tuma luga. Tabatin un concenso den e participantenan di e retonan cu nos pais tabata enfrenta a causa di e falta di tumamento di decision di e Gobierno anterior bou signatura di MEP. E vehiculo Dialogo Social a funciona sigur te cu 2012, pero ya caba e efecto di e reformanan aki a caduca.

Nos a cumpli cu CAft?

Durante gobernacion di AVP a cumpli cu algun condicion di CAft y a sa di cambia e direccion di algun tendencia pa loke ta trata entradanan di impuesto y cantidad di personal, pero esunnan crucial y mas importante, pa garantisa finansa publico sostenibel y duradero, a evita di cumpli. Manera nos ta bisa na Hulandes “de krenten uit de pap pikken”. Ora MEP a drenta na aña 2017, nada a cambia. No solamente no a corta den gasto di personal, sino a hacie mas grandi ainda. A siña nan coordinadornan pa lanta nan mesun compania y en bes di drenta servicio di gobierno, ta cera un contract cu nan compania pa brinda servicio na gobierno. Kico esey a haci? Mas empleado publico ainda, pero ta schuif entre e gastonan di ‘Personal’ pa gastonan di ‘Producto y Servicio’. A crea fundacionnan, cu kisas no ta aparece como empleado publico, pero cu ta depende completamente di fondo di gobierno of companianan estatal pa por paga nan trahadonan. 

En bes di baha a subi gasto

Con cu bo bir’e, e gastonan di operacion no a baha structuralmente y Hulanda no a mira ningun intencion y maneho solido riba e tereno ey tampoco. Al contrario, gobierno ta haci varios maniobra, kisas den un formula di desesperacion, pa ainda aumenta e gastonan mas! Mira por ehempel den cuido. Mester corta cinco miyon florin pa luna den AZV. Mester fuseer Hospital y ImSan pero mesora a start un guera y politica no ta keda afo. Di otro banda, mientras ta corta hospital, nos ta nota cu un laboratorio masha yega na Gobierno, ta habriendo un edificio grandi cu plannan pa competi directamente cu hospital den testnan medico. Esey na Hulandes nos ta yama “dwijlen met de kraan open”. 

Tanten cu no cumpli, no tin mas sosten financiero

Gabinete Wever-Croes a bay Hulanda, a firma un acuerdo como e prome den Caribe Hulandes y awo ta e prome pa no cumpli tambe bou pretexto di no ta di acuerdo cu e condicionnan. A tuma tur e placa di Hulanda den pandemia y ainda ta pidiendo pa mas. E realidad ta: E presupuesto aki no lo ta balansa sin sosten financiero di Hulanda. E sosten aki ta colga na un hilo pasobra si nos no cumpli, nos no lo hay’e tampoco. Y pio ta: Gobierno sa tambe y no ta haci mucho intento pa por yega na un solucion structura. Aña pasa ainda a subi e presupuesto di empleado publico cu algun miyon, en bes di bah’e. E ora ta cu ki cara nos ta pidi Hulanda pa fia nos mas placa?

No por bay shelo sin muri

E realidad ta: Bo no por bay shelo sin muri! E por ta zona duro pero asina ta. Si no tuma medida, si no baha gasto, nunca Aruba lo por ta riba pia y semper nos lo keda pidi limosna na Hulanda. Y no laga ningun politico gaña bo cu nos por soluciona tur problema sin baha cantidad di empleado publico, sin elimina algun departamento di gobierno, sin privatisa algun otro y sin bende accion den algun compania estatal. Gobierno y politica Oranjestad mester realisa cu nan no ta comerciante y no por maneha nada. Mester laga compania priva den man di sector priva pa nan maneha bon, pa tin hopi dividendo pa cobra impuesto di dje. Tur biaha cu Gobierno a purba hunga comerciante, a sali fo’i panchi cay den candela, e storia a caba na malo, pa no lubida Air Aruba. Of mira awendia Arubus, Post Aruba N.V y Aruba Free Zone cu ta costa e pagado di belasting mas di dos miyon florin pa aña pa e por existi. 

Sea ta tuma decision of Hulanda ta tum’e pa nos

Pa awo, e politiconan mester compronde un cos: Sea boso ta tuma accion of Hulanda ta bin tum’e pa boso. Atrobe un siman ta transcuri unda cu decisionnan clave pa futuro di Aruba a keda posponi. Decisionnan importante riba tereno di maneho financiero, reforma fiscal, reduccion di gastonan y aumento di efectividad den aparato gubernamental y reformanan economico. E falta di decision aki, cu ya caba ta wordo aplasa den cada plan di ehecucion, ta hustifica binmento di un organo na nivel di Reino pa haci esakinan. E pensamento cu por bay Hulanda y cambia e “deal” den algo cu nos no mester corta gasto ni sufri, no ta existi.

Sin union politico lo no tin decision

Ta ora pa tur uni y bay Hulanda cu un oferta concreto, den cual ningun ta culpa otro pero ta papia habri cu pueblo riba kico mester sosode y bay cu sector priva, cu ta esun cu lo mester tuma e trahadonan publico cu sali di gobierno. Ta bon pa gobierno sa, cu tin varios Arubiano biba na Hulanda of den e municipionan den Caribe, trahando pa Gobierno di Hulanda den varios departamento, cu ta cla pa bin Aruba pa y traha den departamentonan di Gobierno di Aruba pero den servicio na Gobierno di Reino y raportando na e ministerionan encarga na Hulanda. Nos mes no tin berguensa? Nos mes hendenan ta bin yuda gobierno di Aruba crea curashi con pa bisa NO y con pa tuma decisionnan no-popular. 

Ban salba e pais aki!

Y pa e fanaticonan di politica, e problema cu Aruba ta aden awe no tin un color. E ta di nos tur y ta nos tur lo mester pone schouder bou di e causa y hunto salba e pais aki. Nos a yega di hacie caba den pasado y nos ta convenci cu nos lo por atrobe. Pero sin espacio pa politica y “friends and family” sino reforma henter e pais pa awo y pa futuro. Y reforma di tal forma cu ningun politico den futuro no lo por mishi cu ne, ni cambi’e, ni dañ’e pa nos atrobe.





Source link

More in Aruba

To Top