Gobierno a celebra Dia di Prensa sin minister di Partido Raiz

Prensa di Aruba den fin di siman a celebra nan dia pa cual Gobierno di Aruba dialuna mainta a convoca un rueda di prensa pa di e manera aki celebra e dia importante aki cu nan.

Mientras cu di partido MEP, por a nota presencia di tur minister, cu excepcion di Minister Glenbert Croes, e dos ministernan di partido Raiz, tabata notabelmente ausente. Riba e remarca e pakico e dos ministernan aki ta ausente, Prome Minister, mr. Evelyn Wever-Croes a indica cu, como gobierno nan tabata kier a reconoce prensa, manera tabata e ultimo 7 añanan.

E mainta aki, tur prensa tabatin e oportunidad di haci cualkier pregunta na cualkier un di e ministernan, no tabatin manera un “draaiboek” manera lo tabata e caso durante un conferencia di prensa comun, di tur siman. Esun di e siman aki tabata uno c’un toke diferente.

Pa gobierno, ta importante pa tin bon relacion cu prensa.. Y si ripara bon, no semper tur minister ta presente. Esaki ta debi cu hopi biaha tin ministernan cu ta den exterior, otro biaha ta haya ministernan cu ta ocupa cu nan diferente compromisonan, manera tabata e caso e biaha aki.

Prome minister a enfatisa cu, como gobierno, semper ta importante pa resalta e importancia di prensa, pa informa e pueblo di tur loke ta pasa riba nos isla.

Algun dia pasa partido Raiz a anuncia un rueda di prensa na San Nicolas pa dialuna, 1 di september. Y coincidentalmente, Gobierno tambe a manda yama un conferencia di prensa rib’e mesun dia y na e mesun ora.

Hopi biaha, den ocasionnan asina ta pone e pueblo pensa, si e dos partnernan den coalicion ta riba bon termino cu otro. Cada biaha cu puntra e dos lidernan, e contesta semper t’e mesun cos: “Coalicion ta stabiel.”

Asina pues, e aña aki tambe Gobierno di Aruba a celebra Dia di Prensa hunto cu e reporteronan di nos dushi pais, Aruba.