Connect with us

Gobierno a anuncia cu BBO lo bira BTW entrante aña 2023

Aruba

Gobierno a anuncia cu BBO lo bira BTW entrante aña 2023


Tabatin varios opcion, pero manera cu nos a informa den forma di primicia simannan pasa caba, awe Gobierno di Aruba a confirma cu a opta pa cambia nos sistema di belasting di directo pa indirecto. Cu esey, lo elimina e cobransa di BBO, BAZV y BAVP cu hunto ta suma 6% na momento di un transferencia. Na su luga lo bin un belasting nobo, cu ta prome biaha ta introducie na Aruba, esta BTW (Belasting over de Toegevoegde Waarde) of tambe conoci como “Value Added Tax” (VAT).

Prome Minister mr. Evelyn Wever-Croes a sigura awe cu Gabinete Wever-Croes II a tuma e decision cu lo reforma nos sistema fiscal door di introduci BTW na Aruba, no aki dos luna, sino dia 1 di januari 2023. Bisando esey, e mandatario a aclaria cu tin 14 luna pa prepara su introduccion. Binmento di BTW lo elimina e BBO di 6%, lo elimina e efecto cumulativo cu e tin awo y tambe lo baha algun otro belasting mas, manera esun di ganashi pa negoshinan. Esey gobierno kier introduci pa por atrae mas inversion y pa comerciantenan sigui inverti den nan negoshi, den un esfuerso pa crece, desaroya y crea mas empleo.

Cuanto e BTW lo bira, ainda gobierno no a menciona. Fuentenan ta sigura cu e lo ta por lo menos dobel di BBO, pues mas cu 12%, pero ainda no tin confirmacion di esey. Cu introduccion di BTW na frontera, tur hende lo contribui na e impuesto aki, solamente un bes. Pues no tin cumulacion door di pag’e mas di un biaha, manera si ta existi awo cu BBO. Pero, por ehempel si bo importa un producto cu bo a cumpra riba Amazon.com na Merca, te awo bo ta paga solamente impuesto di importacion y no BBO. Cu e cambio na 2023 si lo bo mester paga BTW pa tur importacion y tur servicio brinda, den caso cu e negoshi no ta bende producto sino servicio.

BTW ta un impuesto cu ta existi na 136 diferente pais rond mundo, di cual mayoria ta den e continente Europeo. Hulanda a introducie dia 1 di januari 1969, despues di a introduci e ley Wet op de omzetbelasting di aña 1968. Na Belgica e ley aki ta existi desde 1 di januari 1971. Prome cu esaki mayoria pais tabata conoce sistemanan di omzetbelasting cu un efecto cumulativo. Historiadonan ta sigura cu e concepto fiscal den forma di un omzetbelasting a nace for di Athenas, Grecia, algun siglo pasa caba.

Na Hulanda y na Belgica, e sistema aki di BTW ta hopi halto, esta 21%. E tabata hopi aña na 17% pero a bay ta subiendo. Pero tin expepcion riba cierto producto y servicionan, den cual e tarifa ta baha te na 9% of tambe hasta 0%. E tarifa di 9% ta conoci entre otro pa productonan conoci como “levensmiddelen” y riba buki. Tin algun excepcion cu no ta cay bou di e areglo fiscal aki y tin producto y servicio na 0%. Tin un diferencia entre esun na 0% tarfief y esunnan cu ta forma parti di e grupo di excepcion.

Na Hulanda, na aña 1997, e cobransa di loonbelasting tabata e entrada principal di Gobierno Hulandes. Pero, 10 aña despues, desde 2007, BTW a bira e componente di impuesto mas importante di Reino Hulandes, mas cu e cobransanan di loonbelasting. El a bira 32% di e entradanan di impuesto di Hulanda mientras cu loonbelasting ta alcansa 29%. Na Aruba e ta lo contrario, e impuestonan directo, maneta ta loonbelasting, winstbelasting y grondbelasting ta e componentenan mas grandi den e presupuesto di DIMP. Belasting indirecto, esta BBO, BAZV y BAVP ta bin na di dos luga, menos compara cu e otronan. Cu e cambio na 2023, ta spera un cambio den e entradanan, di cual BTW lo por bira e entrada principal, pasobra mas hende lo aporta na dje (incluyendo turistanan) y cu tarifa mas halto tambe, si compara cu e BBO.

Pa awo, Gabinete Wever-Croes II a tuma nan decision caba cu ta comunica awe na Gobierno di Hulanda. Pero, awor lo cuminsa e reunionnan cu partnernan social, comercial y sindical pa splica di e detayenan rond di e cambionan. Tambe DIMP lo mester cuminsa prepara e plannan di ehecucion, comunicacion y informacion na comercio, na comunidad y na e accountantnan, cu lo mester acesora clientenan ora di cambia e sistema fiscal cu BBO, cu nos ta uzando desde aña 2007.





Source link

Click to comment

Leave a Reply

Your email address will not be published. Required fields are marked *

More in Aruba

To Top