Connect with us

Gobernador a reuni cu henter Conseho di Minister

Aruba

Gobernador a reuni cu henter Conseho di Minister


“No ta algo nobo. Ta for di dos aña pasa caba, for di 2019, cu Gobernador y Conseho di Minister ta reuni riba base regular. Normal Gobernador ta reuni cu tur minister individualmente tur luna. Pero un of dos biaha pa aña, ta reuni cu henter Conseho di Minister y awe tabata esun pa e aña aki”, asina minister-president mr. Evelyn Wever-Croes a bisa na salida di e reunion, cu a tuma luga den e sala di reunion na Hyatt Place, situa net banda di aeropuerto. “Nos a trata temanan general, mirando cu nos ta apenas na comienso di nos gabinete…y e tabata un bon reunion”.

Na salida di e ministernan, a indica cu ta minister-president lo hiba palabra riba contenido di e reunion. Aunke cu, manera ta conoci, contenido di reunionnan cu Gobernador semper ta kieda secreto y no por divulga pafo. Asina mes e prome mandatario, alabes e politico cu mas voto individual durante e ultimo eleccion, a conta cu e reunion awe tabata riba temanan general. Pregunta riba landspakket y sosten di likides a haya como contesta cu eseynan ta topico cu gobierno mes ta atende y no ta pasa via Gobernador.

A puntra e lider di Gabinete Wever-Croes con a para cu e formalisacion di e funcionnan di e ministernan nobo, pasobra esey no ta cla ainda. Manera ta conoci, asina cu cambia e ministerionan, mester bay Parlamento pa cambia e ley, specialmente pa acomoda e presupuesto. Ora haci e cambionan ey memey di aña e ta un dolor di cabes, pesey tin biaha ta prefera di cambie cu aña nobo, pa e core parelelo na e presupuesto anual di gobierno. E ley, conoce como Landsverordering instelling ministeries, ta stipula cua ministerio y departamentonan ta resorta bou di cada minister. E ultimo tabata di aña 2013, di gabinete Eman II, cu a adapta na 2016 ora Otmar Oduber a sali fo’i gobierno y cu a adapta na april 2018 ora cu Gabinete Wever-Croes a asumi poder.

“Ta tratando riba e LIM awor aki. Semper e ta algo cu ta tuma su tempo pa trah’e. Otro añanan tambe el a tuma tempo pa keda cla. Den un luna di tempo bo no ta keda cla cu e LIM y nos kier pa e wordo haci bon. Tabatin otro aña den cual mester a warda hasta te ora cu aña a cambia, of ora aña bolter, pa no tabatin nodi cambia ful e presupuesto”, asina e mandatario a aclaria den su entrevista exclusivo cu 24ora.com.

“Loke si nos a bisa Parlamento ta cu pa fin di e luna aki nos lo ta na Parlamento pa presenta e programa di gobernacion y e ora tambe nos lo por duna mas informacion di con e reparticion exactamente lo bay ta di e departamentonan, pasobra esey ta un pregunta cu Parlamento a haci mi tambe. Nos lo bisa nan na e momento ey cua departamento ta cay bou cua. Y tambe nos ta bay duna un reporte financiero di e prome mita di e aña aki. Esey lo bira fin di e luna aki den Parlamento”, segun minister-presidente Wever-Croes.

Na final, e mandatario di cual e gabinete ta carga su nomber no por a contesta si e presupuesto 2022 lo yega parlamento e aña aki ainda. El a referi nos na minister di finansa, cu ta esun encarga cu e presupuesto. “Nos ta trahando duro riba e ultimo detayenan pa e por bay parlamento prome cu bay CAft. E lo yega parlamento si prome cu dia 15 di december pero nos no por pone presion riba parlamento con lihe nan mester trat’e. Esey mi ta laga den man di mi colega minister di finansa”.





Source link

Click to comment

Leave a Reply

Your email address will not be published. Required fields are marked *

More in Aruba

To Top