Connect with us

Gerlien Croes (parlamentario): Discrepancia entre e candidatonan no tabata asina grandi

Caribe

Gerlien Croes (parlamentario): Discrepancia entre e candidatonan no tabata asina grandi


Aunke cu e tin su critica riba e proceso pa yega na nombra un Ombudsman, toch parlamentario independiente, Gerlien Croes,  no ta haya cu mester cataloga esaki como un dia scur pa Aruba. Dialuna den oranan di merdia a vota den Parlamento di Aruba riba e dos nombernan a keda di e candidatonan selecciona door di un comision, pa bira e prome Ombudsman di Aruba. E dos nombernan, segun e secuencia duna door di e comision tabata na prome luga Kathy Paskel sigui pa Jurima Bryson. E di dos a wordo scogi cu diesdos voto na fabor.

Pa cuminsa, el a expresa cu e proceso pa nombra un Ombudsman tabata uno largo. Uno cu a cuminsa prome cu e mes a drenta politica. El a recorda cu na aña 2021 a trata e tema aki atrobe, pero e partidonan no a logra yega na otro. A presenta amienda, unda ta pidi pa nombra e persona den e funcion ey cu votacion di dos tercera parti di Parlamento.

Como cu no a yega na otro riba e punto, a bini cu e iniciativa pa pasa e ley aki den forma di un Landsverordening, den cual ta determina e caminda pa cana. “Te awe mi no ta di acuerdo cu e proceso ey, e forma cu a trata e ley. Principalmente pasobra un nombramento no tabatin mester di votacion di dos tercera parti di miembronan di parlamento. Y tabatin mester di solamente un mayoria. Esey mi no ta di acuerdo cu ne.”

E miedo cu lo politiza e situacion aki, a keda confirma. EL a expresa di ta lamenta masha hopi mes cu hopi di e informacion aki a bay publico. Esaki pa motibo cu mester respeta e trabou di e comision apunta pa busca e miho candidatonan, pero tambe mester a mustra respet pa e tres candidatonan considera di tin e cualidadnan pa haci e trabou di Ombudsman.

Mester menciona cu ta solamente nuebe persona a solicita pa e puesto di Ombudsman. E comision a presenta e lista di tres nomber. E comision mes tabatin problema pa yega na un secuencia, mirando cu tur tres tabata candidato fuerte, cu hopi conocemento.

Pa loke ta e votacion, el a bisa cu aunke e no a apoya e proceso cu a inclui e ley pa nombracion di Ombudsman, e no ta kita cu e ley a pasa cu apoyo di e partidonan cu ta apoya coalicion. “Mi tin e deber como miembro di Parlamento pa haci mi trabou, den cuadro di e ley cu a pasa. Na final di dia no tabatin secresia. Mi ta kere cu den e comision di CHA (comision di asuntonan interno di Parlamento), mester ta hopi mas discreto y profesional ora cu ta yega na nomber di profesionalnan. P’esey mi a abstene di duna comentario personal di e candidatonan.”

Analisando e splicacion cu Parlamento a haya, e ta bisa cu e discrepancia entre e candidatonan no tabata asina grandi. “Aunke tin ta papia di dia scur pa Aruba, pasobra e tabata politiza, pero no mester lubida cu Aruba porfin, como e ultimo pais den Reino, tin su Ombudsman.”

Na final e parlamentario a felicita Jurima Bryson como e persona nombra den e puesto.  





Source link

More in Caribe

A2Z ADMINISTRATION

AD

To Top