Connect with us

Fundacion Pa Nos Muchanan: Siña bo yiu pa ta agradecido

Aruba

Fundacion Pa Nos Muchanan: Siña bo yiu pa ta agradecido


Siñando nos muchanan tocante gratitud por ta un desafio pa mayornan pero ta un di e calidadnan mas importante cu un mayor por siñanan. Haciendo esaki, ta siña nan con pa ta mas sensitivo y con pa mustra empatia cu otro persona. Expertonan ta bisa cu ora bo tin e actitud di gratitud bo ta mas contento en general (y esaki ta conta pa nos adultonan tambe).

Aunke e comprondemento di con pa ta agradecido ta un proceso di bida largo, tin hopi maneranan simpel pa cuminsa introduci e calidad aki den e bida di bo yiunan. E actividadnan simpel aki lo yudabo cuminsa e combersacion cu bo yiunan y planta e simia pa lanta un mucha cu ta contento y agradecido den su bida.

  1. Modela gratitud

Muchanan ta siña hopi for di locual mayornan ta haci y bisa. Nan tambe ta siña di locual cu mayornan NO ta haci y NO ta bisa. Si concientemente bo no ta practica aprecio y gratitud diariamente den e manera cu bo ta papia, tin un bon chens cu lo ta mas dificil pa muchanan siña e concepto di aprecio y gratitud.

Pa practica aprecio y gratitud den e manera cu bo ta papia ta simpel. Djis tuma un momento pa bisa e cosnan cu bo ta aprecia. Por ehempel:

  • “Wak con bunita e solo ta, mi ta contento mi por comparti e momento aki cu bo”
  • “E lama di Aruba ta asina bunita, mi ta agradecido cu mi ta biba akinan”
  • “Wak con yen nos garoshi ta cu cuminda, nos ta asina afortuna pa por cumpra tur e cuminda aki pa nos famia”

E no ta tuma hopi – Bisando e cosnan aki ta haci’e mas facil pa bo yiunan compronde gratitud y siña e diferente cosnan cu e por ta agradicido p’e. 

  1. Traha un caha di gratitud

Muchanan gusta cosnan visual. Un caha di gratitud ta un manera facil pa mantene gratitud y aprecio riba e mentenan di bo famia. E caha aki por wordo decora y pinta. E meta di e caha ta cu tur dia tur persona di e famia ta skirbi un cos cu nan ta agradecido pe riba un pida papel y ta pone e papel den e caha. Esaki por wordo lesa na fin di siman of di luna. Asina por comparti cu henter famia e cosnan cu tur persona ta agradecido pe. 

Otro alternativa: Pinta un mata grandi, y riba cada blachi di mata ta skirbi e cosnan cu bo ta agradecido pe. 

  1. Haci donacion cu bo yiunan

Si esaki ta algo cu bo famia por haci, por haci un donacion di paña y co’i hunganan. Esaki ta un manera simpel pa haci un diferencia grandi. Yuda bo yuinan pasa door di nan pañanan y co’i hunganan y aparta algun cos cu por haci un otro mucha felis of cu un otro mucha lo por uza. E actividad aki no solamente ta un oportunidad pa haci e cas mas limpi y ordena, e tambe ta un actividad unda ta cuminsa introduci e aspecto di generosidad. Si bo yiunan ta na un edad mas grandi, por hasta inclui nan den e proceso di scohe un lugar pa haci e donacion. Un otro manera pa haci donacion ta door di haci trabou boluntario unda bo ta haci un donacion di bo tempo. Tin diferente instancianan cu semper mester di ayudo. 

  1. Papia tocante gratitud

Sea habri pa papia cu nan tocante nan experencia cu gratitud. Un manera pa haci esaki ta door di uza e modelo di NOTA-PENSA-SINTI-HACI:

  • Kico nos ta NOTA di nos bida cu nos ta agradecido pe?
  • Con nos ta PENSA tocante dicon nos a wordo duna e cosnan eynan?
  • Con nos ta SINTI tocante e cosnan cu nos a wordo duna?
  • Kico nos ta HACI pa expresa nos aprecio pa locual cu nos tin?

Door di puntra e preguntanan aki durante combersacionan cu bo yiunan, bo por aumenta nan capacidad mental y emocional pa cu aprecio y gratitud. 

  1. Haci gratitud parti di bo dia, tur dia

Hopi famia ta comparti algo cu nan ta agradecido p’e mientras nan ta come atardi. Otro,prome cu nan bay drumi. Pero kico cu bo famia ta scohe di haci, percura cu e ta keda algo consistente. Haciendo esaki tur dia lo yuda bo yiunan crea un rutina unda regularmente ta pensa riba di e importancia di gratitud.





Source link

Click to comment

Leave a Reply

Your email address will not be published. Required fields are marked *

More in Aruba

To Top