Fundacion Orguyo: A corona e lucha di cinco aña pa comunidad LGBTQ+

Egmar Irausquin (Secretario di Fundacion Orguyo) ta un di e activistanan pa derecho di e comunidad LGBTQ+ y e tambe tabata den sala di Corte Supremo pa biba e momento cu a ratifica e derecho di miembronan di e comunidad LGBT pa no wordo discrimina. Y cu nan por casa cu otro. “Esaki ta e prome paso ora cu ta papia di igualdad. Awo mester sigui traha riba aceptacion, respet y comprondemento den pueblo. Hopi hende no ta compronde e situacion bon y ta kere cu e ta un peligro pa hopi otro cos si permiti casamento di pareha di mesun sexo.”

Un otro representante di e fundacion Orguyo presente tabata e presidente Bruce Ponson, kende a expresa cu nan ta sinti un alegria, pasobra ta un lucha di cinco aña cu nan a bin ta hibando. Mas cu tur cos, el a bisa, derecho humano a triunfa. Y di e forma aki ta garantisa cu e discriminacion contra e comunidad minoritario di LGBTQ+ no ta bay sigui na Aruba. “Por lo menos e derecho igual cu nos a cuminsa lucha p’e na 2019, awe nos a logr’e.”

Aunke pa hopi e lo mustra un periodo largo, pero e organisacion mes a kere cu nan lo mester cana un caminda mas largo, of por lo menos cu e proceso di reconocemento lo a tuma mas tempo. Principalmente pa loke ta e trayecto legal. SI e ta admiti cu tabatin contratiempo, discusion y apoyo tambe. “Na final di dia loke cu nan a cuminsa lucha p’e, cu ta e matrimonio di mesun sexo, a logr’e awe.”

Rol di fundacion Orguyo lo keda como un herment pa yuda e grupo minoritario y awo ta bay traha pa logra yega na e aceptacion social pa e grupo aki.