Fundacion BOB a bira ABO: Lo realisa tres programa di screening na Aruba

Fundacion BOB Aruba, e fundacion cu ta conduci e Programa Nacional di Screening di Pecho ta cambia nan nomber, cual ta bira Fundacion ABO, esta Stichting Aruba Bevolkingsonderzoek. E cambio den nomber ta refleha e expansion di su mision- y programanan di deteccion.

Ademas di e programa, ya conoci pa cancer di pecho, Fundacion ABO tambe lo ofrece den e proximo aña un programa di screening pa boca di matriz (BOCA) y cancer di tripa (CORESA).

BOCA ta nifica BeovlokingsOnderzoek Cervic Aruba. CORESA cu ta nifica Colorrectal Screening Aruba, ta funda originalmente door di tres pionero, dr. Franca, dr. Ho-Kang-You y dr. Smit, awo ta reintroduci como e nomber oficial di e programa di deteccion di cancer di tripa.

“E cambio di nomber y expansion ta subraya e compromiso cu salud di nos comunidad completo”, Janice Ho-Kang-You-Arends, presidente di Hunta di Supervision di Fundacion ABO a elabora. “Cu nos socionan, nos ta enfoca tur esfuerso na mehoracion di calidad di bida danki na deteccion na tempo.”

E paso aki ta posibel danki n’e colaboracion cu e socionan manera HOH, UO AZV, DVG y e socionan tecnico manera Medical Phit, ITP Caribbean, Eclectic Advisory y RADventure y sin lubida di menciona nan socio den calidad LRCB.

Tocante Fundacion ABO

Fundacion ABO, anteriormente yama Fundacion BOB Aruba, ta comprometi n’e deteccion na tempo di cancer di pecho, cancer di boca di matris y cancer di tripa na Aruba. Desde 2016, e fundacion a realisa mas di 43 mil screening y ta continua traha p’un futuro mas saludabel p’e comunidad di Aruba.

Actualmente e fundacion ta ocupa cu e ultimo preparacionnan p’e inicio oficial di e programanan nobo di deteccion p’aina por cuminsa screen den di dos trimester di 2025.

E fundacion ta determina pa organisa tur cos cuidadosamente p’e programanan funciona di un manera mas optimal posibel. Nan lo tene pueblo bon informa tocante e rekisitonan di cada programa y tambe con por registra pa participa cu e programanan di screening. Keda pendiente pa mas informacion actualisa pa ta bon prepara ora e momento yega cu e servicionan aki ta disponibel p’e comunidad.