Connect with us

Friends Across the Caribbean cu evento di recauda fondo pa yuda otro isla Caribense

Caribe

Friends Across the Caribbean cu evento di recauda fondo pa yuda otro isla Caribense


E destruccion causa pa e furia di horcan Beryl riba e islanan Caribense di Grenada, Carriacou, Petite Martinique, St. Vincent y the Grenadines a laga un comunidad den lamento y desesperacion. Cas destrui, infrastructura kibra y bida cambia pa semper. Sinembargo, for di e tragedia aki a surgi un ola di solidaridad y speransa for di e isla feliz di Aruba, demostrando e forsa di union y resiliencia cu ta caracterisa e pueblo Caribense y e Reino Hulandes.

Un grupo di Rubiano preocupa (Friends Across the Caribbean) no a keda indiferente na e sufrimento di nan rumannan den Caribe. Nan a uni forsa, reconociendo cu den momento di crisis, ta e union y e solidaridad ta locual ta saca e miho di nos como ser humano. Cu e conviccion cu hunto nan por haci un diferencia significante, nan a lansa un campaña di recaudacion di fondo pa brinda ayudo financiero directo na e agencianan di emergencia riba e islanan afecta.

IT5A9197

E iniciativa aki ta un testimonio bibo di e lasonan fuerte cu ta uni e islanan di Caribe y e Reino Hulandes. E ta un muestra di e hermandad cu ta surpasa frontera y ta uni nos como un solo pueblo. E ta un recordatorio cu, maske nos ta biba riba diferente isla, nos ta comparti un destino comun y un responsabilidad pa yuda otro den momentonan dificil, segun Sonny Richardson.

Un yamada pa donacion Urgente

E grupo ta urgi comunidad di Aruba pa haci contribucionnan financiero na un cuenta di banco dedica:

Banco: CMB Bank

Nomber di Cuenta: SNAP/Reculture

Number di Cuenta: 62148305

Descripcion: Hurricane Beryl Relief Fundraising

Lo transferi e fondonan aki rapidamente pa e islanan afecta, permitiendo e organisacionnan local atende e necesidadnan di biaha y inicia esfuerso di reconstruccion.

Solidaridad den Comunidad

Jason Arrindell, tambe conoci como RedMudd, a enfatisa e importancia di solidaridad den comunidad den e tempo di crisis aki. “Nos ta bendiciona aki riba e One Happy Island pa ta leu for di e caminda di horcan aña tras aña, y nos mester reconoce nos habilidad pa yuda ora nos tin e oportunidad”, el a declara. Arrindell ta uzando su plataforma di social media pa conscientisa y curasha apoyo amplio pa e iniciativa.

E lasonan historico

Errol de Freitas, representando e San Nicolas Business Association, a destaca e nificacion historico di e islanan afecta pa Aruba. El a recorda comunidad di e rol crucial hunga p’e migrantenan for di e islanan aki den e desaroyo di e refineria y economia di Aruba. “Awo nan mester di nos”, el a declara, haciendo un yamada tanto na gobierno di Aruba como na e representacion Hulandes riba e isla pa uni na e esfuersonan di ayudo.

Evento pa recauda fondo

Un evento pa recauda fondo ta planea pa dia 14 di juli, incluyendo musica en bibo, DJ’s, y otro entretenimento. Bradley Versprey, envolvi den e organisacion di e evento, a urgi tur cu por contribui, sea financieramente of a traves di nan talentonan, pa participa. “Nos ta un pueblo Caribense,” el a enfatisa. “Awe ta nan, y mañan por ta nos.”

Un esfuerso colectivo

E iniciativa aki ta representa un ehempel poderoso di unidad y resiliencia Caribense den cara di adversidad. E esfuersonan colectivo di e comunidad di Aruba tin e potencial pa haci un diferencia significante den e bida di esunnan afecta pa horcan Beryl.

Mas informacion

Pa mas informacion tocante e evento di recaudacion di fondo y con pa contribui, por fabor bishita e pagina di Facebook di San Nicolas Business Association of tuma contacto cu Sonny Joseph Richardson of Jason Arrindell via nan plataformanan di social media. Hunto, nos por haci un diferencia!





Source link

More in Caribe

A2Z ADMINISTRATION

AD

To Top