Connect with us

Frederick Nuboer ta candidato pa bira director di Arubus

Caribe

Frederick Nuboer ta candidato pa bira director di Arubus


Untitled design 19

Awe Minister Ursell Arends lo reuni cu trahadonan di Arubus pa anuncia na nan cu ta bin cambio den gerencia di e compania. Algun siman pasa caba presidente di e hunta di supervision, esta abogado mr. Demis Illes a tuma su retiro. Siman pasa a anuncia na e director, Edwin Mohamed cu gobierno no tin confiansa mas den dje y cu e tin cu bay. Probablemente lo ofrece un pakete, estilo “golden handshake” pa e bay su cas. Na su luga lo kier pone Frederick Nuboer

E ultimo aki tabata den noticia ora cu na october 2021, burachi den un restaurant di cuminda rapido, Nuboer lo a haci fastioso te cu a yama polis p’e. A deten’e pa e bay sosega su curpa. E echo aki a causa cu Fraccion di MEP den Parlamento a cuestiona su integridad, cu a pone cu e mester a pidi su retiro for di Controlaria General di Aruba (Algemene Rekenkamer). Tres aña despues, awe e mesun gobierno cu a core cu ne, ta busc’e pa ocupa un puesto di director den un compania estatal.

Siman decisivo

Tur cos ta mustra cu e siman aki lo bira decisivo pa Arubus, den cual Minister Ursell Arends lo mester haya aprobacion di Conseho di Minister pa introduci cambionan cu no necesariamente ta placentero na Arubus. El a sigura e trahadonan den un accion di protesta algun dia pasa cu lo tuma medida y cu e trahadonan no ta culpabel di e situacion precario cu e compania ta aden. Cambio di director sinembargo lo no drecha e situacion financiero di e compania y tampoco lo trece e pasaheronan bek, pero por lo menos lo kier cambia e direccion den cual e barco ta nabegando.

IMG 0175 edi scaled 1

Cambio ta costa placa

For di fuentenan cerca di e asunto, ta sigura cu pa papia ta masha facil pero pa por logra c cambio real ta costa placa. Den caso cu kier reduci e cantidad di trahado den Arubus, lo mester ofrece e trahadonan paketenan atractivo pa nan bay, loke ta traduci den un presupuesto adicional. Ideanan nobo tin pa parti, pero no por ehecuta ningun pasobra Arubus ta sali bisa cu no tin fondo. Gobiernonan tur ta keha cu Arubus ta perde placa, pero ningun di nan ta yuda den forma structural pa trece cambio duradero pa e compania por lanta cabes.

MEP lo aproba?

E pregunta ta si e ministernan di MEP lo aproba den Conseho di Minister pa nombra Frederick Nuboer den e puesto di director di Arubus. Fuentenan yega na e asunto ta sigura cu den seno di e partido color geel lo no tin mucho confiansa den Nuboer y pa a lag’e bay di ARA pa awo trece bek via porta di patras den Arubus ta mustra mahos pa gobierno mes, pero awo tambe pa e coalicion. Di otro banda, esaki lo no ta e prome nombracion di Raiz cu no ta un hende cu MEP lo prefera, pero e ta keda un decision cu Minister Ursell Arends di Raiz mester tuma. 

Arubus ta den problema serio

E modelo di negoshi bou cual ta maneha Arubus ta bou hopi presion. Desde cu a duna e prime consecion na Arubus na aña 2012, awe na 2024 nan ta transporta 70% menos pasahero pa aña. Nan ta opera den un mercado masha competitivo den cual otro servicionan, manera taxi y autobus of compania di transporte ta competi cu nan. 

Perde placa tur aña

E analisis financiero di Arubus ta mustra un situacion precario. A pesar cu Arubus ta conta riba un contribucion nacional substancial (promedio di 62% di entrada), toch cu excepcion di aña 2018, tur aña tabatin perdida. Su propio entrada entre aña 2017 y 2020 a baha cu mas di 50% debi na bahada di e cantidad di pasahero y door di cambio den mescla di producto pa carchi relativamente mas barata, mientras cu e base di costo a cay cu 18% den e mesun periodo. Den aña 2020 e entrada propio di Arubus tabata cubri solamente 25% di su gastonan. Pa ley, nan mester cobra Afl. 12.20 pa cada trip pa por cubri tur gasto, pero den realidad, uzando smard card, e tarifa cu ta cobrando awendia ta un promedio di Afl. 2.60. Na aña 2016, Arubus a perde 0.5 miyon, na 2017 a perde 3.7 miyon, na aña 2018 a gana 1.3 miyon, na 2019 a bolbe perde 0.5 miyon y na 2020 a perde 1.6 miyon florin. Anto esaki contando cu Gobierno di Aruba ta subsidia Arubus cu mas di 10 miyon florin pa aña!

Tin mas bus cu mester

Despues di Covid, e cantidad di pasahero a baha drasticamente, cu a conduci cu a elimina y adpata varios ruta. Nunca mas a cambia nan despues di covid pasobra e pasaheronan nunca mas a bin, sea pasobra nan a cumpra un auto di nan mes of ta uza transporte alternativo. Consecuentemente, Arubus a sigui cumpra bus, te cu nan tin mas bus cu nan mester. Asina nan tin un flota di reserva grandi eyden, cu ta pone presion riba e situacion financiero.

Buscando un culpabel

Cu e realidad riba mesa y un investigacion conduci door di PricewaterhouseCoopers Advisory N.V na Hulanda riba ordo di Ministerie van Binnenlandse Zaken en Koninkrijksrelaties di Gobierno di Hulanda, awor tur hende sa con Arubus ta para. Y pa soluciona e retonan, mester cambia henter e plan di negoshi y adapta e vision di compania. Mester dicidi ki servicio lo sigui cu ne, tarifa y gastonan interno. Pasobra e berdad ta cu Gobierno lo no por sigui subsidia miyones asina den un bari sin fondo. Den esey awo ta insinuando cu e director, Edwin Mohamed, nombra pa Gobierno di MEP mes, lo ta un posibel culpabel di mal maneho. Nan kier pa e bay y asina pone un otro hende cu lo ta capas pa bolter e compania y hacie manehabel y pa por tin un miho control di gasto.

Arubus N.V. Aruba 122400435 3295937513858814 5151031545964206826 n

Kico ta conseha

PricewaterhouseCoopers Advisory N.V di Hulanda ta conseha pa formula un vision di mobilidad y determina e rol di Arubus den esaki. Defini un vision di futuro riba mobilidad y transporte na Aruba, den cual e necesidadnan di mobilidad di Aruba ta bira cla. Maneha e grado te na cual trafiko di auto, infrastructura, maneho di parkeer, transporte publico y decisionnan riba transporte por contribui na cumpli cu e vision aki di futuro. Tambe mester determina e rol desea di Arubus (incl. Arutram y Aruparking) den mobilidad na Aruba, por ehempel si kier pa Arubus sigui opera un red nacional of djis e fluhonan grandi di transporte di biahe. Pa Arutram mester verifica te na ki grado transporte turistico ta wordo mira como un tarea publico dentro di mobilidad. Y pa Aruparking trece un balansa entre accesibilidad di centro di ciudad y pago di facilidadnan di parkeer.

Crea condicionnan operacional entre Arubus, AruTram y AruParking

Traduci e rol desea ora di duna consecion cu e obhetivo pa promove mas accesibilidad, confiabilidad, di tin forma di pago y sostenibilidad, caminda e enfoke ta riba ‘kico’ ta destina y no ‘con’ ta alcans’e. Percura pa ehecucion di e consecion pa preveni competencia indesea. Crea precondicionnan legal y opcionnan di enforsamento pa asina Aruparking por opera bon. Reintroduci un fluho di entrada pa Arutram (p.e. via Cruise Passenger Fee, of via un prijs di carchi, pues e no por keda un servicio gratis mas. Pa AruTram y AruParking ta desea pa cuminsa cobra dentro di e aña aki mes ainda!

Adapta e vision pa aña 2026

Ta conseha pa, a termino corto, redefini e strategia di aña 2026 y recalibra e operacion di Arubus. A base di e vision di futuro di mobilidad y consecion, redifini e plan strategico di negoshi 2026, incluyendo pone obhetivonan strategico pa e rol pretende y e rekisitonan di consecion y desaroyá KPInan structura pa monitoria y determina balornan di meta y momentonan di midimento. Desaroya un grafico organisatorio/plan di formacion nobo cu ta den liña cu e posicionamento strategico aki. Prepara un pronostico financiero pa duna un miho bista riba e caminda pa operacionnan eficiente y sostenibel.

Tocante Arubus

A funda Arubus N.V. na aña 1983, cu meta pa maneha un compania di transporte publico, cu ta inclui busnan grandi y autobus. Na aña 2015 a funda dos compania nobo resortando bou di Arubus mes, esta Arutram y Aruparking, di cual Arubus ta 100% doño. Arutram ta responsible pa maneha y explota servicio di tram den Oranjestad, uza den su mayoria parti pa turista. Aruparking ta encarga cu maneho di e infrastructura di parkeer y mantencion di ordo den maneho di parkeo den Oranjestad. Gobierno di Aruba ta duna via un consecion, cu a caba na aña 2022, direccion di kico ta e servicio cu ta desea pa Arubus brinda na e publico. Awendia Arubus tin 50 bus na su disposicion, tin 98 trahado den servicio y ta cobra Afl. 4,50 pa cada trip. 

Tocante Frederick Nuboer

Frederick Nuboer a studia entre aña 1985 pa 1987 na HU University of Applied Sciences Utrecht (Hogeschool Utrecht). Entre aña 1987 y 1990 el a studia ley Hulandes y leynan notarial na  Radboud University na Hulanda. Y entre aña 1992 pa 1997 el a studia ley y derecho fiscal na Leiden University. Despues di a caba di studia na aña 1997 el a bira Tax Advisor  na KPMG Aruba. Di aña 1999 pa 2005 el a torah na Departamento di Impuesto como inspector di impuesto. Di aña 2011 pa 2017 el a traha como CEO di Insel Air Aruba. Di aña 2008 te 2022 el a fungi como presidente di Algemene Rekenkamer Aruba. For di juli 2005 te awe e ta doño di su mesun compania, Nuboer Tax Solutions, den cual e ta conseha cliente riba asunto di impuesto.





Source link

More in Caribe

A2Z ADMINISTRATION

AD

To Top