Connect with us

Fraccion di AVP ta contra un presupuesto di TPEF cu ta laat y sin contenido

Aruba

Fraccion di AVP ta contra un presupuesto di TPEF cu ta laat y sin contenido


Tras e reunion publico cu tabatin den Parlamento diahuebs mainta pa aprobacion di e presupuesto 2022 di Tourism Product Enhancement Fund (TPEF), parlamentarionan di fraccion di AVP, mr. Arthur Dowers y mr. Gerlien Croes a argumenta e posicion cu a tuma contra e ley, indicando cu no solamente gobierno ta bolbe presenta un presupuesto despues di a uza e recursonan caba, pero tampoco ta presenta un plan cu ta cuadra cu e importancia di maneho di nos industria turistico.

Dowers a calific’a e documento como un joke mustrando con e ta consisti di apenas un par di pagina y cu esey a tuma e gobierno diesun luna largo pa prepara. Riba dje, segun e parlamentario, e titular di turismo, Dangui Oduber ta bin den Parlamento di Aruba yen arogancia sperando cu AVP lo vota na fabor.

“Nos no ta cheerleader di gobierno. Gobierno tin diesun cheerleader y mi ta kere cu esey ta mas cu basta. Algun ta bin akiden sin lesa mocion, sin lesa ley. Hisa nan a hisa benta y vota voor. Anto bo tin un minister arogante, bin gaba su mes y a splic’e cu e fondo aki, ta danki na e maneho di AVP cu a percura pa tin un fondo,” asina e parlamentario di oposicion a comenta.

Di su banda y den di dos tanda di pregunta Gerlien Croes tabata basta critico. Tras votacion, e parlamentario a comparti su posicion. El a cuminsa na bisa cu basa riba principio e ta contra pasobra a bira custumber di gobierno cu despues di a gasta e placa caba, e ora ey ta bin pidi un OK di parlamento pa duna sosten. Pa Croes esaki no ta aceptabel.

Croes: “No por ta asina cu bo ta bin na final di anja y bo ta pidi un aprobacion. Nos no tin nada contra e proyecto, ni cu e fondo ey mester wordo uza, pero abo como minister y como gobierno mester ta mas responsabel di con ta gasta placa.”





Source link

More in Aruba

To Top