Connect with us

FLIP FLOP FESTIVAL TA MUDA PA HARBOR ARENA DIASABRA AWOR

Caribe

FLIP FLOP FESTIVAL TA MUDA PA HARBOR ARENA DIASABRA AWOR


Elite Empire Entertainment, Cerbes Chill, ydemas sponsors a informa diaranson atardi durante un rueda di prensa cu a tuma e decision pa voluntariamente muda e festival pa Harbor Arena for di Bushiri Beach Arena. E fecha lo keda mescos esta diasabra dia 1 di Juni proximo.

Locual a transcuri

Durante cu Flip Flop Festival a cuminsa traha na Bushiri Beach a bin tuma nota cu posiblemente lo tin un neishi di shoco riba e tereno. Inmediatamente a tuma contacto cu esnan cu ta encarga cu e proteccion di shoco pa asina por tuma medida pa proteha e bestianan. Aruba Conservation Foundation a dicidi di cera e area cu cabuya y tambe despues a pone un borchi. E organisadornan a haya e conseho pa adicionalmente pone heki halto y tapa esaki rond di e area durante di e evento mes. Un otro alternativa cu a keda presenta ta pa evalua si lo por muda e neishi. Sinembargo pa cu esaki no lo tabata tin suficiente tempo mirando cu esaki tin un proceso complica cu ne.

Apesar di tur e medidanan cu a pone riba e tereno,  den bon colaboracion y combersacionan cu varios ‘stakeholders’ a dicidi voluntariamente pa muda e evento for di Bushiri Beach Arena. E decision aki no tabata uno facil mirando cu e stage, luznan, sonido y pantayanan tabata poni caba na Bushiri. E cambio lo trece hopi gasto financiero y complicacion logistico. Sinembargo e ekipo di produccion tin e confiansa den e team cu lo logra di termina tus cos pa diasabra awor y Elite Empire Entertainment hunto cu su sponsors ta mira e importancia den preserva nos flora y fauna.

 

Durante e rueda di prensa e presidente di Aruba Convervation Foundation Sr, Tyson Lopez a duna un danki na e organisacion pa mira e importancia den cuida nos naturalesa.

 

Diasabra 1 di Juni 2024

 

Pa loke ta e evento mes, esaki tin un reaccion sumamente positivo di publico. Miles di persona ja a cumpra nan carchi. Esaki ta debi na e mas di 10 atraccion musical tanto local como internacional cu lo ta presente durante e e anochi.  Entre otro lo tin presentacion di e banda di soca Kes The Band’ for di Trinidad, tambe e artista di dembow Angel Dior di Republica Dominicana, Mical Teja di Trinidad, Alex Sensation di USA. Tambe lo tey presente Dj Latu di Hulanda, Ziggi Recado & The Nayamari Band y Tsunami, Mystical Connection y mas. Portanan ta harbri pa 5’or di atardi caba.

 

E evento lo tin su food court” tambe unda cu diferente tipo di cuminda lo ta disponibel pa asina e publico por disfruta di dje. Esaki ta forma parti di ful un experiencia pa cada persona cu ta parti di e festival cu ta conoce su regreso despues di mas di cinco aña. 

 

Carchi general ta disponibel na na Citgo Boulevard y Citgo Essoville. Tambe na Tropical Bottling Carry Out LG Smith Boulevard y Tropical Bottling Carry Out San Nicolas. Digitalmente por cumpra riba Pay.aw y Eliteempire.events.

Flip Flop Festival ta un presentacion Cerbes Chill, CMB, Setar NV, Coca-Cola, Bacardi, Kini Kini Transfers & Tours, Embassy Suites, Renaissance Wind Creek Aruba Resort, Ecotech, ATCO, Elite Empire, Rayo, Elite Productions y XFM 102.7. 



Source link

More in Caribe

A2Z ADMINISTRATION

AD

To Top