Connect with us

Empleadonan preocupa di NV ELMAR ta denuncia Irausquin y Rojer

Caribe

Empleadonan preocupa di NV ELMAR ta denuncia Irausquin y Rojer


Untitled design 18

Den un carta habri na Parlamento di Aruba, Minister Presidente, Minister Glenbert Croes y na Utilities Aruba NV, un grupo di trahado di NV ELMAR ta keha un lista di asuntonan dudoso y cuestionabel den maneho di e compania nacional di distribucion di coriente. E trahadonan awo kier mira si gobierno ta bay cay aden, investiga y evita ripiticion of si lo laga tur cos sigui normal. Nan ta avisa si, cu si no haci nada, cu lo por spera accion.

No a investiga NV ELMAR

Recientemente ARA a publica resultado di investigacion di seis instancia semi gubernamental. Trahadonan di NV ELMAR ta lamenta cu no a inclui NV ELMAR den e investigacion aki. Den pasado tabatin varios señal y publicacion den prensa relaciona cu presunto iregularidad cu ta tuma luga den NV ELMAR.

Lastimamente e señalnan aki no a wordo tuma na serio. E origen di e problema ta e director actual cu ta hibando un mal maneho, cu un agenda scondi y ta comporta su

mes como Putin na NV ELMAR.

Hunta di Comisario no ta capaz

E “Corpororate Governance Code” ta un documento morto, e no ta wordo aplica y ni implementa den e organisacion. Hunta di Supervision no ta funcionando, ta neglicia nan responsabilidad na un manera flagrante y ta pensa solamente riba nan compensacion mensual. E controlnan interno ta laga di desea, ta sconde informacion y a schuif e internal auditor pa Utilities Aruba NV, den un esfuerso pa stroba control!

Ambiente di trabou toxico

Den NV ELMAR ta reina un ambiente toxico unda e director ta terorisa empleadonan, instiga empleado contra otro y ta fomenta discordia. Alabes ta posicionando friends & family & amante den posicionnan critico al estilo mafia. Tur esaki pa kita atencion for di cierto interes personal y comercial di e propio director. Riba costo di NV ELMAR e director ta biba un bida di luho y tin indicacion cu tin interesnan financiero cu ta wordo efectua den exterior, similar na Setar gate di algun aña atras. Tin prueba y indicacion cu NV ELMAR a bira un capa pa mal uza y enrikece un of mas ehecutivo di NV ELMAR, a costo di e doño di NV ELMAR, kende ta e Pueblo di Aruba.

Trahadonan ta demanda

Pa medio di e carta aki, empleadonan preocupa di NV ELMAR ta urgi na esunnan encarga ehecuta un investigacion independiente, similar na esun cu ARA a haci na e 6 instancianan semi gubernamental.

Mesun director ta e “magazijnmeester”

Adicionalmente, ta urgi pa pa laga haci un investigacion forensico pa cu e siguiente aspectonan: Proceso y funcionamento di purchasing & warehouse. Investiga e motibo pakico departamento di purchasing ta resorta directamente bou di director. Den e press conference director a bisa cu material no ta yega na tempo pa motibo di e supplier y e efecto di Covid. Esaki NO ta berdad! Director ta beheer magazijn, e ta dicidi ki ora y kico ta ordo. Esunnan cu ta traha den purchasing no por haci nada sin aprobacion di director. Pa e motibo di mal maneho di purchasing di e director mes, material ta caba constantemente. No ta descarta cu e situacion aki lo resulta den problema serio pa NV ELMAR su proyecto di mantenimiento.

No tin control pa evita nepotismo

Trahadonan ta spera cu mal tempo no dal nos pida baranca den e periodo di horcan tampoko pasobra nos lo bay plat di berdad y pa basta tempo debi cu no tin material den stock. Mester investiga e motibo pakico, si e director mes cu no tin niun experiencia den e materia di coriente, ta bay den exterior pa cera deal cu supplier su so. Analisa e nombracion di empleadonan y turn over di empleadonan di dicho departamento. Mayoria tin vinculo cu e ‘rancho’ di e director of cu Hospital. Investiga e relacion entre e director y tur purchasing agents den exterior, en particular e compania WorldWide Supply & Export Inc., doing business as Alternative Exports Inc na Florida, USA. Alternative Exports ta specialisa den sector medico. NV ELMAR ta su unico cliente den sector tecnico. E doño di dicho compania ta intimo amigo di e director pa basta aña. E meneer aki ta handle propiedad di director di NV ELMAR na Florida y tabata core y cuida e dos auto di careda di e director na Merca.

Practicanan dudoso

Investiga motibo pakico compra di tur smartmeters a pasa via Alternative Exports, contra e standard industry practice, unda ta ordo directamente na e compania Aclara. Investiga pakico no ta warda e stock di smartmeter na NV ELMAR mes pero ta laga Alternative Export fungi como storage pa e smart meters. Dus mas costo pa NV ELMAR. Verifica si e director tin participacion den negoshi, propiedad y of cuenta bancario den exterior, particularmente na Florida, USA.

Pago di daggeldvergoeding

Investiga uzo di credit card di NV ELMAR y gasto di representacion di e director. Analisa e dienstreizen di e director, e frecuencia, duracion y motibo. Mayoria biaha e dienstreis ta coincidi hunto cu actividad di cabay unda su yiu muhe ta participa. Por link esaki cu articulonan cu a sali den prensa.

Integridad di Anthony Irausquin

Investiga diploma, curriculum y referencia a base di cual e director a wordo nombra. Ta conoci cu e director no a pasa e prome tanda di solicitud. Director a haya su mes den problema serio di integridad na Banco di Caribe y na Hospital.

E auto mas caro paga pa un director

Investiga pakico Utilities y Hunta di Comisario a aproba compra di un auto di 170 mil florin pa e director, contra maneho existente y den pleno pandemia y recorte salarial. Nunca antes a cumpra auto, semper a lease esaki!

Ta duna prioridad na compania Mericano

Intencionalmente e director a trata di perhudica un compania local door di laga su compania preferi na Florida bay acerca companianan den exterior kende tin contacto pa varios aña directo cu e compania local y no ta respeta e derecho di patent di e material y/of producto.

Cultura di miedo

Investiga cultura di e organisacion: tin un cultura di miedo, instigacion y persecucion. E director ta instiga empleado contra otro, laga empleado declara contra otro empleado pa por kita hende for di trabao.

Conflicto di interes

Investiga origen di e palonan di luz instala na Rancho Bello Amanecer, teniendo cuenta cu tin pole di palo, mast di aluminium y luz di led y otro componentenan instala na e rancho. Ta cuestiona si e palonan di luz y componentenan a wordo instala segun maneho di NV ELMAR y na un manera legitimo teniendo na cuenta cu e mastnan di aluminium ta propiedad di Gobierno y tabata unicamente den storage na NV ELMAR. Por check cu Hospital tambe si ta reconoce propiedad na e rancho.

Posicion financiero cuestionabel

Investiga declaracion di impuesto di e director. Investiga comportacion di pago di cuenta di coriente di e mesun director of di su cas, aunke e ta riba nomber di su señora. Check si a yega di aparece riba lista pa desconecta y cu a duna ordo pa “no corta coriente” na su mesun cas. Un director por keda debe su mesun compania? Esey ta integridad?

Si no haci nada lo recluta henter hospital den NV ELMAR

Investiga maneho di personal, particularmente ora recluta key positions. Con por ta posibel cu mayoria empleado nobo ta procedente di Hospital? Ta aplica tur ora e procedura regular pa interne solicitaties? Tur funcion ta conforme e organograma oficial? Investiga e cantidad di HR Managers: tin diferente HR managers cu no ta funciona. Pakico a busca un consultant cu tin un record cuestionabel na diferente instancia na Aruba, entre otro na WEB y Banco Central. A paga e consultant pa guia HR managers y mientras tanto e consultant mes ta fungi como HR Manager y a wordo apunta como Business Consultant.

Ton Rojer no por control’e

Ta parce cu esun cu mester controla e director di NV ELMAR, esta Utilities Aruba NV tin su mannan mara. Dos motibo specifico. E dos directornan ta bon amigo y ta tapa pa otro. Asina por ehempel e director di Utilities Aruba su compania a bay bancarota y a bende su propiedad na findishi. E cuenta habri na NV ELMAR a manera “somenta”. Y comosifuera poco, e mesun director di Utilities ta envolvi den un boutique hotel den e districto di Noord cu regularmente ta sali riba e lista di e mal pagadonan y cu mester desconecta meter. Ta bin ordo di ariba pa no corta coriente, asina practicando abuso di poder entre e companianan y interes comercial personal. Ta manera bo pidi pushi pa controla pisca!

Empleadonan: Nos kier papia

Tin hopi mas punto, pero esaki lo bin na cla na momento cu papia cu empleadonan. Ta recomenda pa ofrece tur empleado e oportunidad pa por expresa nan preocupacionnan na un forma anonimo. Pa e motibo aki nos ta dirigi nos mes na Parlamento, Prome Minister mr. E. Wever-Croes y e minister encarga cu NV ELMAR, Minister G. Croes pa exigi un investigacion profundo den e compania estatal cu algun decada pasa ainda tabata un instituto respeta y pa yega na un solucion positivo.

Tocante N.V. NV ELMAR

Naamloze Vennootschap Electriciteit-Maatschappij Aruba (NV ELMAR) ta existi pa mas di 70 aña caba y ta conta cu un total di 165 empleado den servicio directo di e compania. Siendo nos compania nacional distribuido di coriente, N.V. ELMAR ta inverti alrededor di 20 miyon florin tur aña den mantencion y actualisacion di su red di electricidad. Su contract di distribucion di coriente firma cu Gobierno di Aruba ta vence dia 15 di februari 2026. Cu lansamento di servicio y productonan nobo, ta demostra cu no ta dedica atencion solamente na aspectonan tecnico y di infrastructura, sino tambe na e nivel di servicio eficiente y moderno cu ta brinda clientenan diariamente.

Tocante Utilities Aruba NV

A funda Utilities Aruba N.V na aña 1990 cu Gobierno di Aruba como e unico doño. E ta e “Holding Company” doño di WEB Aruba NV y NV ELMAR. WEB tabata un departamento di Gobierno y e ora ey a bira companianan priva, mientras cu a cumpra mayoria di e accionnan di NV ELMAR. Inicialmente Utilities Aruba N.V. tabata un “liason” entre Gobierno di Aruba y e companianan WEB y NV ELMAR y tabata fungi como garantia ora e companianan haci fiansanan na banco. Despues di aña 2009, Utilities Aruba N.V a cambia pa un rol mucho mas activo, contrario na antes, unda no tabata envolvi den e vision y/of strategia pa produccion y distribucion di energia.





Source link

More in Caribe

A2Z ADMINISTRATION

AD

To Top