Connect with us

El a dal truck di 2.8 miyon: A suspende Mario Giel na Brandweer

Aruba

El a dal truck di 2.8 miyon: A suspende Mario Giel na Brandweer


Awe diabierna e comandante interino di Cuerpo di Bombero di Aruba, esta ex-polis Emiliano Geerman, a anuncia na su personal cu a suspende e bombero Mario Giel for di su funcion. Pa un tempo di un maximo di seis siman, e no mag drenta ningun edificio di Cuerpo di Bombero debi cu a inicia un investigacion disciplinario contra dje.

Algun dia pasa, pa un motibo of otro, Giel a bay reverse e crash tank na e kazerne di Brandweer na aeropuerto y a dal e den un kolom. E sla a causa daño na e truck relativamente nobo, cu costa alrededor di 2.8 miyon florin. Claro cu no tin seguro pa e trucknan asina aki y ta gobierno mes lo tin cu paga pa drecha e daño. Parce cu mando di Cuerpo di Bombero ta sospecha cu probablemente Giel lo a bin traha betra. Riba su mes, esey ta un acto masha peligroso ora ta traha na aeropuerto, pa cual kier investiga awor.

Di otro banda, bomberonan no a keda contento cu e decision di e comandante interino, pasobra ta sinti cu mas bien esaki ta un persecucion inhusto. Ta menasa di pone trabou abou si no elimina e decision cu e comandante a tuma den nomber di Minister Rocco Tjon, cu ta esun politicamente responsabel pa maneho di Cuerpo di Bombero di Aruba. E reunion ta andando awor na Kazerne Oscar, situa den cura di aeropuerto. Den caso cu no yega na un acuerdo, e trahadonan ta bisa di lo bandona trabou den un accion pa un tempo indefini.

1n62a3bf9bb29467.16349006
Bombero Mario Giel ta na cas desde awe, pendiente un investigacion disciplinario contra dje, relaciona cu e accidente cu el a haya cu e truck di mas caro di Cuerpo di Bombero. E accidente a sosode bou afdak den cura di kazerne Oscar mes na aeropuerto. E ta bisa cu ta un descuido, pero otronan ta insisti cu ta algo “otro” a sosode cu e no a mira e kolom!

Remarcabel ta cu e sindicato SINBA cu ta representa e bomberonan mes no ta presente. Por lo menos e presidente a confirma cu e ta na hospital atendiendo su mama, cu ta sufri un kebrante di salud. Pero asina mes e miembronan y bomberonan general no kier tende di warda y a exigi un reunion cu caracter di urgencia awe tardi na kazerne, sino lo forsa pa cera aeropuerto, te ora baha e tension laboral na pi’i trabou.





Source link

More in Aruba

To Top