Connect with us

Eduard Tromp y Millie de los Santos ta resalta entre e empleadonan na RIU Hotels & Resorts

Aruba

Eduard Tromp y Millie de los Santos ta resalta entre e empleadonan na RIU Hotels & Resorts


Empleado y supervisor di kwartaal. Pa reconoce su empleado di prome kwartaal, RIU Hotels & Resort a organisa un lunch na trabou cu tur nominado. Den un ambiente ameno e coleganan a bini hunto pa cera conoci cu e Empleado di Kwartaal y Supervisor di Kwartaal.

Pa celebra esaki gerencia a gradici tur empleado personalmente. Barbara Canales, relacionista publico di RIU Hotels & Resort Aruba, a splica cu tabatin 28 empleado nomina pa Empleado di Kwartaal y Supervisor di Kwartaal, inclui direccion y hefe di departamento.

Eduard Tromp, cu tin hopi aña caba trahando cu RIU Hotels & Resorts, a resulta e prome Empleado di Kwartaal. Gerencia di e hotel ta consider’e un empleado ehemplar. Eduard ta un persona cu ta dedica na su trabou y cu no tabata pone un ‘pero’ pa keda na pia di trabou. Esaki a sorprende gerencia hopi y a demostra di ta un di e empleadonan strea. RIU Hotels & Resorts ta gradicie p’esey.

E Supervisor di Kwartaal ta Millie de los Santos. E ta un supervisor hopi energetico y semper c’un bon actitud, cu gana di yuda tur hende y semper ta motiva su team. P’esey a dicidi di nomin’e y a scog’e tambe como e Supervisor di e prome Kwartaal.

Empleado y supervisor nomina pa e premio special aki no ta simplemente bon trahado, pero tambe ta semper inspira nan coleganan y yuda nan hefe den e departamento pa hiba e trabou padilanti. RIU Hotels & Resorts ta conta c’un bon team y esey ta haci cu nan huespednan ta conta riba un servicio superior y sin igual.

Tocante Riu Palace Aruba

RIU Hotels & Resorts a habri Riu Palace Aruba na aña 2007. Debi na e gran exito di su prome hotel riba nos isla, e compania a dicidi di adkiri un di dos propiedad na 2014, esta Riu Palace Antillas. Hunto e dos hotelnan aki ta maneha mas o menos 27 mil huesped pa luna, aproximadamente 700.000 pa aña. Entre e dos hotelnan RIU na Aruba, nan ta emplea riba 800 trahado, brindando huespednan e miho nivel di servicio.

Tocante RIU Hotels & Resorts

A funda e cadena internacional RIU na aña 1953, na Majorca, Spaña, como un hotel chikito pa pasa vakantie y ainda e compania ta pertenece na e di tres generacion di famia Riu. E compania ta specialisa den hotelnan pa pasa vakantie y riba 70% di su establecimentonan ta ofrece e servicio di “All Inclusive by RIU”. Cu inauguracion di su prome “City Hotel” na aña 2010, RIU ta expandiendo su productonan awor cu su mesun liña di City Hotel yama “Riu Plaza”.

RIU Hotels & Resorts awendia tin 95 hotel den 19 pais, incluyendo Spaña, Portugal, Irlanda, Alemania, Bulgaria, Turkia, Morocco, Merca, Mexico, Jamaica, Bahamas, Aruba, Costa Rica, Republica Dominicana, Panama, Cabo Verde, Mauritius, St. Martin y Sri Lanka.

RIU Hotels ta yama bon bini na riba 4 miyon huesped anualmente y ta ofrece trabou na un total di 28.867 empleado. Actualmente e compania ta clasifica na number 29 di e lista di cadena di hotelnan y ta un di e cadena di hotelnan mas popular den Caribe, e di dos mas grandi na Spaña den termino di entradanan y ta di tres mas grandi den cantidad di cambernan.





Source link

More in Aruba

To Top