Connect with us

E tabata na stuur di e skyline: Nigel Thijsen ta den libertad

Caribe

E tabata na stuur di e skyline: Nigel Thijsen ta den libertad


WhatsApp Image 2024 07 08 at 5.12.41 PM

Den fin di siman a sosode un accidente fatal. Tabata riba 7 di juli, caminda Aruba a conoce su di 7 morto den trafico y pa colmo e victima tabatin 17 aña di edad. E accidente a sosode alrededor di 2:30 am, despues cu e chauffeur a purba di core pa polis pero no a yega leu. Den e bocht skerpi di Malmokweg despues di pasa Tierra del Sol, a perde control, bolter y e auto literalmente a kibra den dos parti. E chauffeur a scapa pero su pasahero a muri, pero ya pa dialuna, e chauffeur por a bay cas.

E situacion a surgi caminda e unidad di polis cu ta controla costa, a topa cu un auto cu por poco a accidenta frontal contra di nan. Esaki a sosode den e area di Arashi. Mesora a mara trot su tras y start un persecucion, segun vocero di Cuerpo Policial, e auto a logra scapa di polis pero algun minuut despues, e mesun unidad a bin topa e auto parti den dos y cu un persona no ta duna señal di bida. Mesora a bati alarma n’e instancianan concerni.

Compara cu antes, un dokter forensico a presenta na sitio y mesora a inicia cu su investigacion. Ey mes a constata morto despues cu ambulance ya no por a haci nada mas p’e victima. No obstante cu e chauffeur no tabata bou di influencia (a supla 0 ug/l), a deten’e pa stuur auto di un forma iresponsabel riba caya. Mas o menos diesdos ora despues di e accidente, famia a constata y confirma cu ta nan ser keri bou di e nomber di: Dariana I. Heredia De La Rosa naci na Republica Dominicana 25 di juli 2006 di 17 aña di edad.

WhatsApp Image 2024 07 08 at 5.06.28 PM

E chauffeur

Na prome instante e chauffeur a conta cu e conoce e victima y cu ta un lift el a dun’e. Despues cu a deten’e y pone tras di tralie, mesora version a cambia. El a conta cu e victima ta su pareha y cu nan a bay dal un buelta. E nunca a spera cu e anochi lo a termina asina. El a keda algun ora tras di tralie djey por a bay cas sin ningun problema.

Bay cas lihe

E chauffeur hoben por a bay cas lihe debi na e cambio di nos codigo penal cu parlamento a aproba y a bay na vigor entrante prome di april ultimo. Tur esaki no obstante cu orden di abogado a duna un conseho negativo riba dje.

Segun e ley nobo, e periodo maximo di detencion lo ta di seis (6) dia. Ora cu e periodo di detencion aki pasa, por ordena e detencion preventivo di e sospechoso. E detencion preventivo ta inclui custodia y detencion. E periodo maximo cu e sospechoso por keda cera ta di diesseis (16) dia, segun ley vigente y diescuatro dia (14), segun e ley nobo.

WhatsApp Image 2024 07 08 at 5.06.30 PM

E victima y famia

Hopi a cuestiona dicon ta te cu merdia famia a confirma cu ta nan ser keri. For di fuente masha confiabel, a conta cu e victima ta biba su so cu e tata. Pero, e tata, riba diasabra anochi a bay weg’i bala, esta Copa America, caminda Brazil a perde contra Uruguay. Parce den un bar, e homber a cuminsa haci fastioso y polis a presenta n’e bar pa cual a deten’e y bay cu ne ward’i polis. Pues ta netamente e motibo ey, no tabatin ningun persona/famia pa constata y confirma cu ta trata di nan ser keri. Ta te cu merdia ora e tata a sali for di ward’i polis y a haya falt’i su yiu. Ora a notifica autoridad, cu su yiu no ta na cas, mesora nan a dun’e e tristo noticia.





Source link

More in Caribe

A2Z ADMINISTRATION

AD

To Top