Connect with us

E fanaticonan di mas hoben di 24ora.com

Aruba

E fanaticonan di mas hoben di 24ora.com


Awe a clausura e ‘Kinder boeken week’ y e ultimo invitado pa e dia tabata Everlis Tromp di 24ora.com. A invit’e p’e conta di su trabou di tur dia como tambe di su coleganan. E ta forma parti di e ekipo di operacion di Headlines Group, den cual e ta encarga, hunto cu Elizette Croes, pa e procesonan operacional den e organisacion mas grandi di prensa na Aruba. Tambe e ta encarga cu aspectonan tecnico y di contenido durante e noticiero di mas mira y scucha den ora di merdia, esta ENFOKE cu ta pasa riba e website 24ora.com, e pagina di Facebook y di YouTube di 24ora.com. Comosifuera poco, pa esunnan den auto of cu kier scucha e noticiero via radio, tin e opcion pa scuch’e bibo via Radio Bo Guia 88.9 FM. 

Nicole Villada Rivera, maestra di klas 1 na Sint Franciscus College, a sigura cu e siman a bay bon, tur dia tabatin un invitado di diferente profesion. A celebra e amor di e muchanan pa lesamento di buki, como tambe e aprecio cu tin pa e autor y ilustradornan. E studiantenan a traha nan mesun buki. Tur dia a haya un invitado cu a conta e muchanan tocante nan trabou.

Prome cu e invitado yega, e maestra ta conta e muchanan un poco tocante kico lo pasa, di e trabou di e persona, etc. Aunke cu nos ta papia aki di muchanan cu nan edad ta varia entre 5 pa 6 aña, toch tur ta fanatico fiel caba di 24ora.com. Tur conoce e productonan, ta mira nos website frecuentemente y hasta conoce palabranan, ta corda sucesonan cu a mira bibo riba nos website, conoce e caravan di tur dia riba e plataforma di noticia y sin lubida e anecdotadanan di e forma unico y diferente den cual nos ta logra combina informacion y entretenimento.

Tocante Sint Franciscus College

Sint Franciscus College ta existi desde dia 1 di september 1965 den e bario di Madiki. E ta un scol catolico. Antes e tabata solamente pa mucha homber, mientras cu e scol den banda, Colegio Bon Bini tabata pa mucha muhe so. Cu tempo a cambia maneho y ambos scol a bira tanto pa mucha homber como pa mucha muhe. E scol tin un total di 9 klas cu no menos di 200 alumno, 14 maestro y un cabesante cu ta maneha e scol. Di e 14 maestronan trahando eynan, nuebe ta klassenleerkrachten, tin un ayudante permanente cu alabes ta ofrece tambe remedial teaching, un guia separa pa e materia di lesamento, un guia interno, un docente pa Spaño y un docente specialisa den bewegingsonderwijs. 

Tocante 24ora.com

Mark Benson Denz a funda e prome website di noticia na Aruba, 24ora.com (Prome den Noticia) dia 28 di maart 2007. Awendia e ta e medio di comunicacion mas grandi na Aruba. Diariamente mas di 25 mil diferente usuario ta subi online, mas di 4 biaha y ta keda casi 3 minuut cada biaha. Pa siman ta surpasa 75 mil usuario y pa luna e ta mas di 225 mil diferente usuario. Riba Facebook nos ta e pagina di Aruba cu mas “likes” (111K), mas siguido “followers” (142K) y tambe cu hopi mas “engagement”. E mas reciente adkisicion ta e corant digicel TREMPAN, cu mas pagina, mas contenido y hasta video pa lesadonan y usuarionan por disfruta di dje digitalmente.





Source link

Click to comment

Leave a Reply

Your email address will not be published. Required fields are marked *

More in Aruba

To Top