Connect with us

E beneficio di temor di Dios

Aruba

E beneficio di temor di Dios


Hopi hende ta puntra kico ta nifica temor di Dios?

Awel temor di Dios ta nifica ora bo ta respeta y bo ta stima Dios. Bo kier agrada Dios den tur cos y bo ta nenga bo mes deseo pa bo haci Dios su boluntad.

Bo ta stima bo prohimo manera bo mes y den tur cos, den tur situacion. Bo ta pone Dios na prome luga.

Salmo 128 ta bisa: “Bendiciona ta tur esunnan cu ta teme Señor cu ta cana den su caminda. Tene bon cuenta cu bo no tin temor di Dios ora bo no ta cana den su caminda y esey bo ta nota na comportacion di hopi. Nan tin bon estudio, bon posicion, nan tin placa, pero nan no tin temor di Dios.

Caminda tin temor di Dios eynan tin integridad. Nos kier duna un ehempel berdadero pa cada ken por bay dilanti di Dios y drecha asunto cu Dios y haya temor di Dios.

Pasobra nos ta biba den un mundo cu un hende ta prefera bisa cu bo ta husga en bes di e pone su curason pa arepenti. Awel lo siguiente lo yuda bo sigur pasobra bo ta bay husga pa bo mes.

Lesa Galationan Capitulo 5:19, 20 y 21 y 1 Corintionan Capitulo 6:9 y 10 y wak si e palabra di Dios no ta cende un luz den bo mente. Si bo tin di arepenti of no pasobra nos tur tin cos di drecha cu Dios.

Ora bo come di e trabao di bo mannan lo bo ta feliz y lo bay bo bon. 

Tur locual ta corupcion, benta di droga, baho mundo, ta aleha hende for di temor di Dios. Den e cosnan ey  no tin progreso y por causa bo destruccion.

Bo esposa lo ta manera un mata di wendruif fructifero den e parti mas paden di bo cas. Bo yiunan lo ta manera palonan di oleifi rond di bo mesa. Esaki ta nifica felicidad den famia.

Mira asina e homber cu ta teme Dios lo ta bendiciona.

Temor di Dios ta e principio di tur sabiduria, pasobra temor di Dios ta trece sabiduria, pa bo bida.

Laga hende hari, chercha, rechasa, manipula, rebaha, pone tur clase di trampa pa bo. Pero e temor di Dios lo libra bo for di e boca di leon (Daniel Capitulo 6:21 y 22).

Ora bo no tin temor di Dios, bo ta tarda pa tuma un decision, pasobra bo orguyo kier tene bo mes na prome luga. Abo kier cosecha fama y bo no kier duna Dios e gloria.

Hende cu no tin temor di Dios, kier sclavisa otro. Uza tur tipo di maldad, manipulacion y seduccion pa domina hende.

Pa falta di temor di Dios hende no ta respeta matrimonio, tampoco laso familiar, ni tampoco un bon amistad.

Colga temor di Dios manera un cadena na bo garganta y lag’e biba den bo curason. Pasobra esey ta e berdadero guia pa bo bida y bo famia.

No tin grandesa, ni rikesa, tampoco fama, cu por supera e temor di Dios.

Skirbi pa pastoor Marcel Balootje





Source link

Click to comment

Leave a Reply

Your email address will not be published. Required fields are marked *

More in Aruba

To Top