DOW a cuminsa kita e ultimo pal’i luznan den Van Leeuwenhoekstraat

N’e cruzada di Van Leeuwenhoestraat, direccion Caya Betico Croes y Adriaan Lacle Boulevard, ta tumando luga varios trabao significativo pa kita e luznan di trafioc cu tabata para ey pa varios decada, pero cu pa algun aña a stop di funciona. E cruzada aki, tabata un testigo silencioso di e paso di tempo, cu luz di trafico cu algu  biaha a regula e trafico den e zona, pero bandona p’a Departamento di Obra Publico (DOW) debi n’e dificultad pa mantene nan.

E sistema di maneho di trafico na Aruba a bin ta evoluciona y DOW a opta den e ultimo añanan pa traha rotonde na luga di mantene e luznan di trafico. Ehempel di esaki por a mira den Wilhelminastraat, como tambe na e interseccion di Avenida Milio Croes y Verbindingsweg y tambe n’e cruzada di De La Sallestraat y Caya Betico Croes, caminda cu a implementa varios rotonde chikito. Sinembargo, p’e crusada specifico aki, parce cu no tin un plan defini pa un rotonde, aunke den pasado DOW a expresa interes pa explora e opcionnan manera un rotonde of un T weg pa mehora e fluho di trafico sin mester di luz di trafico.

Recientemente a reporta cu e structuranan bieu aki, awo deteriora, a cuminsa representa un peliger. E tubonan di hero cu ta sostene e luznan a cuminsa frustia y laga bay, loke por tin consecuencia grave, manera cay riba un peaton of un auto.

N’e riesgo aki, DOW a dicidi di actua y elimina e infrastructura di e luznan di trafico n’e crusada aki. E comunidad ta spera cu atencion pa mira si tambe lo retira e tubonan grandi di hero cu ainda ta representa un peliger tanto p’e peatonnan como p’e conductornan.

E decision aki ta marca fin di un era den e maneho di trafico na Aruba, cerando e capitulo den historia di e infrastructuranan urbano di e isla.