Connect with us

Dialuna marduga: Eclipse total luna lo dura un ora y 25 minuut

Aruba

Dialuna marduga: Eclipse total luna lo dura un ora y 25 minuut


E asociacion nacional di astronomia Aruba Astro Research International ta informa cu diadomingo awor dia 15 di mei 2022 lo tuma luga un eclipse total di luna Saros 131 den oranan di anochi y pa habri dialuna marduga di dia 16 di mei 2022.

E eclipse mes lo inicia cu tres fase diadomingo anochi, penumbra, parcial y total na unda cu pa 9:32:05 di anochi, ora local, lo inicia e penumbra cu ta e sombra leve di planeta tera riba e superficie di e luna. Mientras cu pa 10:27:52 di anochi ta inicia e eclipse parcial di e luna y pa 11:29:03 di anochi ta inicia e eclipse total di luna y pa 12:11:28 di mey anochi di dialuna lo tuma luga e parti maximo di e eclipse di luna, cu un magnitud di 1.414. Na e momento ey e sombra di planeta Tera ta cubri e superficie di e luna 100%, loke ta yama Blood Moon.

Pa 12:53:55 di marduga di dia 16 di mei 2022, e eclipse total di luna ta termina y pa 1:55:07 di marduga e eclipse parcial di luna ta termina y pa 2:50:49 di marduga e eclipse penumbra di e luna ta termina. Despues di 2:50 di marduga e luna ta ful liber for di e sombra di planeta tera.

E sombra ta bin for di direccion pabou pa pariba y ta inicia na P4, cu ta e inicio di e penumbra pa 9:32:07 di anochi di dia 15 di Mei 2022 y e sombra completo di planeta tera ta bandona e superficie di e luna completo pa 2:50 di marduga di dia 16 di Mei 2022 aki na Aruba.

E eclipse lo dura durante 5 ora y 19 minuut. E penumbra ta dura 1 ora y 51 minuut; e eclipse parcial ta dura 2 ora y 2 minuut, mientras cu e eclipse total dura 1 ora y 25 minuut.

Areanan for di unda lo por observa e evento di eclipse total di Luna Saros 131 diadomingo anochi pa dialuna marduga ta como lo siquiente: Sur America, Caribe, Centro America, ful parti pariba di Merca, Ocean Atlantico y Ocean Pacifico un parti. Tur cos ta depende di e condicion di e tempo. Sperando cu e tempo por coopera pa por observa un bunita evento di un Eclipse Total di Luna den nos region.





Source link

More in Aruba

To Top