Connect with us

Diabierna awor durante evento na Djiespie’s Place lo duna reconocemento postumo na Etty Toppenberg

Aruba

Diabierna awor durante evento na Djiespie’s Place lo duna reconocemento postumo na Etty Toppenberg


Diabierna awor, esta 31 di Mei 2024, durante e actividadnan semanal cu ta tuma lugar anochi dilanti Djiespie’s Place na final di Caya Grandi, lo tin un ceremonia special ora cu ta bay ofrece un reconocemento postumo na un gran persona.

Hecho ta cu Djiespie’s Place a bira ya e lugar caminda personanan di tur edad, por acudi pa asina disfruta di un anochi di gozo cu musica y tur cos riba e lugar cu tabata conoci antes como ‘Plaza Comercio’, y cu despues a bira ‘Plaza Nikki Habibe’.

E reconocemento postumo ta bay na e gran Etty Toppenberg (d.f.m.), como cu e tabata e persona primordial cu a bin cu e idea pa tene dilanti Djiespie’s Place un encuentro musical tur Diabierna anochi, cu ta converti su mes den un ambiente bailabel.  Como cu a caba di remodela Caya Principal y cu eynan te piso ta tur di klinker, el a pronostica cu e lo bira e lugar ideal pa usa como pista di baile, specialmente pa nos grandinan.

E reconocemento aki tambe lo worde expresa na gerencia di Djiespie’s Place, cu a aporta cu e empresa pa haci e ambiente di Diabierna anochi bira un realidad, y cu ainda aworaki na 2024 ta sigui cu yen ambiente.

Ademas di esaki, varios persona ta expresando nan deseo pa e Plaza aki dilanti Djiespie’s Place cambia di nomber, y bira Plaza Etty Toppenberg.

Igor Hasham di e grupo musical ‘Nos Cu Nos’ ta toca regularmente na Djiespie’s Place riba Diabierna anochi.  E ta mira con en general, nos hendenan di edad grandi no tin realmente otro lugar pa bay.  Porfin riba Diabierna anochi nan a haya un lugar pa sea sinta, goza, y hasta rek pia un poco bao di e tononan musical.

Diabierna awor, grupo Nos Cu Nos lo bay ta animando dilanti Djiespie’s Place.  Segun Hasham, nan agrupacion pesey ta bin cu un repertorio cu ta cay na agrado di nos ciudadanonan aki.  Buscando informacion ta con e ambientenan aki a start na Djiespie’s Place, el a bin haya sa cu ta e conocido Etty Toppenberg a yega di yega eynan, y a pidi permiso pa e sinta dilanti e negoshi y cuminsa toca cu su guitara pa deleite di cliente y esnan canando den Caya Grandi.  Asina e ambiente a start, cu djis un amplifier chikito.  Despues di dos siman, ya nan a haya nan ta saca stul pafo pa acomoda publico cu a cuminsa aglomera pa scucha Etty y su guitara.  E tabata algo chikito cu a bira grandi, y a pone Djiespie’s Place bira e lugar di ambiente dushi cu musica Arubiano y Antiyano, y logico e musicanan cu ta trend tambe.

HOMENAHE: Pa Diabierna awor, e grupo Nos Cu Nos ta planea di presenta algun cancion cu Etty Toppenberg a haci famoso, incluyendo esun cu el a participa hunto cu Trio Huasteca den e famoso evento internacional di Festival OTI.

A prepara dos plaquette special pa haci entrega e anochi aki. Uno ta na casa di Etty Toppenberg pa su gran iniciativa.  Despues señora Toppenberg lo entrega e plaquette aki na viuda di Djiespie’s pa asina colge paden di e lugar.  E otro plaquette ta na famia di Djiespie Franken, kende ta esun cu a sostene e actividad aki di comienso.  E plaquette aki  tambe lo wordo colga na lugar special den Djiespie’s Place.

Publico ta invita pa acudi na e anochi special aki cu lo bay bira uno caminda ta honra tanto Etty Toppenberg, y tambe Djiespie Franken kendenan a uni forza pa asina a crea e ambiente cu ainda tey tur Diabierna anochi den Caya Grandi.

2024 05 29 19 22 11



Source link

More in Aruba

A2Z ADMINISTRATION

AD

To Top