Connect with us

Dia Mundial di Diabetes: Lo bin cu un clinica di obesitas

Aruba

Dia Mundial di Diabetes: Lo bin cu un clinica di obesitas


Diabetes ta categorisa como un malesa no transmitibel (NCD’s). E malesanan aki tin e tendencia di un duracion largo y ta e resultado di un combinacion di varios factor. Diabetes por ta genetico of por desaroya pa un estilo di bida no saludabel (‘unhealthy lifestyle’). Diabetes ta causa problema cardiovascular, ceguera, problema cu riñon y amputacion di pia. Segun cifra di AZV den 2020 tabatin 8.5% di e poblacion di edad entre 25 aña pa 64 aña den registro di censo cu ta sufri di diabetes tipo 2 na Aruba. 

TEMA PA 2021

Tur aña Dia Mundial di Diabetes ta enfoca riba un tema specifico. E tema e aña aki ta ‘E acceso na e cuido di diabetes’. Aki Ministerio di Salud Publico conhuntamente cu e stuurgroep di e plan nacional di prevencion di NCD’s ya caba ta trahando riba un plan di accion pa reduci e factornan di riesgo cu ta ocaciona entre otro obesidad cu ta un di e causantenan di diabetes. 

P’esey Minister Oduber ta bay bin cu un clinica di obesitas cu lo ta situa den hospital mes. Minister Oduber ta haciendo su maximo esfuerso pa logra habri e clinica pa december di e aña aki. Na e clinica aki personanan cu ta sufri di obesidad lo haya un guia profesional pa yega na hiba un bida mas saludabel y preveni asina tur e malesanan NCD’s cu obesidad por trece cu ne.

Banda di esaki Aruba ta conta cu Centro Diabetico cu ta specialisa den e cuido di e pashent diabetico. Ademas tin un Fundacion Diabetico cu tin como meta pa crea conciencia den e comunidad di Aruba tocante diabetes y mehora e calidad di bida di e persona diabetico.

E mandatario ta splica cu den cuadro di prevencion, e ta haya cu ta di sumo importancia pa conscientisa comunidad riba por ehempel e consumo di sucu y e efecto cu e tin riba salud. Sucu ta un producto cu hopi lihe ta contribui na sobrepeso y tambe na malesanan cronico. Tin estudionan hopi extenso haci cu ta demostra con esaki por causa cancer y hopi otro malesanan NCD’s mas. “E problema mas grandi ta cu sucu ta practicamente den tur cos cu nos ta come y bebe. Ta yega momento pa nos para keto y realisa kico nos ta alimenta nos curpa cu ne”. 

E mandatario a sigui bisa cu a keda demostra cu pa mantene un peso saludabel, participa na actividad fisico y un alimentacion saludabel bo por baha e risico pa haya diabetes tipo 2. Tambe ta un hecho cu un persona diabetico por logra regula e nivel di sucu den su sanger y consecuentemente baha e risico pa complicacion, door di haci cambionan na estilo di bida y uzando su remedinan manera prescribi.

Minister Oduber a expresa cu lo sigui traha conhuntamente cu e stakeholdernan den ehecucion di e plan nacional di prevencion di malesanan di NCD’s pa haci cu prevencion ta bira parti di nos cultura, aportando asina na un Aruba mas saludabel. Finalmente e mandatario ta gradici tur e dunadonan di cuido cu ta esnan cu ta hunga un rol crucial den prevencion y maneho di diabetes.





Source link

Click to comment

Leave a Reply

Your email address will not be published. Required fields are marked *

More in Aruba

To Top