Connect with us

Deteni pa buracheria: Su tanki tabata ful pero di e auto bashi

Aruba

Deteni pa buracheria: Su tanki tabata ful pero di e auto bashi


Un chauffeur hopi burachi awe ta na bida pasobra gasolin di su auto a caba. E tabata riba caminda coriendo iresponsabel y otro chauffeurnan responsabel a bati alarma. Polis a bay busca su drechi y a topa cu e chauffeur mal cansa na altura di Morgenster.

A atend’e riba su comportacion den trafico y riba e peliger cu e ta forma pa su mes y pa otro. E chauffeur, cu ta biba na Moko, a expresa su mes na Hulandes.

Den e auto a topa cu algun compras cu el a cab’i haci na supermercado y no por a falta e boter di rom ‘longneck’.

Como cu por a mira cu e tabata burachi, a opta pa deten’e na e sitio mes. Un investigacion na e sitio a conclui cu ta gasolin di e auto a caba. Danki Dios esey a sosode y e auto a no por a sigui.

A constata na e sitio cu polis conoce e sospechoso pasobra parce cu a yeg’i topa cu ne bebi caba. Den transporte policial a hib’e ward’i polis pa ey sub-fiscal atende cu ne riba su comportacion y posiblemente lo regla un ‘cuarto gratis’ p’e sigur pa ocho ora, pa por “pasa su wayaba”.

Djey e lo mester bay cumpra gasolin pa e pickup por start bek y sigui su destino. Pa e momento ey su productonan ‘frozen’ lo a keinta caba den e pickup. Loke ainda lo keda bon ta su boter di rom.





Source link

More in Aruba

To Top