Despues di primicia den Enfoke: Stichting Sportsubsidie Aruba ta confirma investigacion riba iregularidad

Diamars merdia diripente Stichting Sportsubsidie Aruba (SSA) a manda un declaracion pa prensa, den cual ta informa cu ta realisando un investigacion relaciona cu un posibel caso di iregularidad den e organisacion. E declaracion aki lo no a sali si no tabata pa e presion cu nan a cuminsa sinti for di comunidad, debi na retironan y suspensionnan cu diripiente a cuminsa cay den e fundacion cu ta maneha miyones di florin cu mester bay na deporte, pero cu hopi biaha ta yega na adres kiboca!

Tabata den e programa noticiero Enfoke di Nelson “Speed” Andrade y Patrick Paskel cu a lansa e “bom di iregularidad” cu lo ta tuma luga den e organisacion menciona. A papia di suma di placa cu no ta cuadra y gastonan excesivamente halto cu no ta cuadra cu realidad of cu no por prueba cu nan tabata asina halto tampoco. Parce cu internamente un trahado a bati alarma ora el a mira cu decisionnan ta cay cu ta hole na un fraude financiero. Mesora a avisa e directiva, cu a opta pa suspende e director di su funcion, pa por investiga e asunto trankilamente y sin presion.

Basha abou

Pero e proceso ey no ta bayendo facil. Pa por a suspende e director, a yam’e aden pa un reunion unda a confront’e cu algun di su decisionnan y asuntonan financiero cu no ta cuadra cu realidad. Aki Kenneth Vrolijk, kende ta liga directamente na Prome Minister Evelyn Wever-Croes, a laga sa cu si e mester bay cera, cu henter e hunta di supervision lo bay cu ne y a cuminsa punta dede ken tambe ta “horta” eyden y cu tur hende ta na altura. El a hasta pidi e secretaria di e reunion, pa e notula tur locual e ta bisando, pa Landsrecherche por tin e ‘preto riba blanco’ di kico tur y kendenan tur ta formando parti di e fundacion fraudulento aki, anto cu placa di deporte! 

Ta evalua pa bay Landsrecherche 

Ta parce cu e miembronan di hunta di supervision di e fundacion, encabesa pa e ex-casa di Minister di Finansa Xiomara Maduro, tabata sigui e programa. Y den pura a core saca informacion riba algo cu tin algun tempo caba andando. Despues di confirmacion cu tin un investigacion andando, SSA ta bisa cu si e resultadonan preliminar indica necesidad pa esaki, lo tuma tur paso necesario. Esaki ta inclui e “posibilidad” di entrega un keho penal. Stichting Sportsubsidie Aruba ta compromete pa implementa tur e medidanan necesario pa preveni cu sorto di iregularidadnan aki, no ripiti. 

ARA a investiga SSA caba

Dia 31 di mei 2024, Controlaria General (Algemene Rekenkamer) a presenta un investigacion cu nan a titula “Op afstand, maar toch dichtbij. Een verdiepend onderzoek naar de instellingen op afstand van het Land.” For di e investigacion ey caba por a deduci cu tin iregularidad den e fundacion y cu por lo menos nan no tin nan reglanan na ordo y no ta atene nan mes na e reglanan ni e statutonan tampoco. Ta parce cu den deporte tin un ‘cartel’ y e placa di SSA ta keda entre “nan cu nan” so.

Mesun ‘modus operandi’ di tempo di Lotto

Locual a hala hopi atencion ta e forma con e mesun actornan di tempo di e fraude den Fundacion Lotto pa Deporte na aña 2009-2010, cu atrobe ta topa cu nan aki den y e mesun practicanan. Ta obvio cu no a siña nan les di e baymento cera e tempo aya ni di a perde nan trabou e tempo aya sin haya ningun cen preto! Atrobe tin indicacion cu ex-coordinador di minister ta den hunta di supervision y cu tin cumpramento di pal’i luz di un compania specifico, cu tin miembro di hunta di supervision ta cobra den banda for di e mesun SSA pa ta supuesto coach di un organisacion deportivo y asina por sigui menciona.

Gasto di mil florin pa “make-up”

Den e recibonan cu a cuminsa lek ta constata cu lo tin un cobransa pa un persona por haci “make-up” di su cara pa ora fungi como maestro di ceremonia na eventonan oficial. E recibo ta indica cu e costo pa pinta cara cu lipstick, rushi, eyeliner, etc. ta alcansa e bunita suma di Afl. 1000,=. Esaki tabata por lo menos un di e recibonan cu a hala atencion y a demostra claramente cu e ‘hortamento’ eyden e bira asina ‘onbeschoft’ cu no tin limite y a para bira cu tur cos ta posibel. 

Gasta sin responsabilisa

Un di e retonan cu a bin afo tambe awo, te cu no tin cuentanan annual aproba ni firma pa un accountant. Esey ta haci cu, mescos Gobierno di Aruba, cu SSA ta aloca y tin acceso na gasta 9 miyon florin sin cu e tin su cuentanan annual na ordo ni aproba pa Fudacion Lotto pa Deporte por ta sigur cu e placa ta bin inverti. E tendencia aki, separa di ta peligroso y ta crea un impresion cu lo por tin cos di sconde den e fundacion, ta haci e hunta di supervision personalmente responsabel pa tur placa cu resulta mal inverti!

Si bin cambio di gobierno, ta hopi cas lo tuma den beslag

Esnan cu a acepta un funcion den e hunta di supervision, tur ta liga na sea Prome Minister, Minister di Finansa of na Minister di Deporte. E ultimo aki a promove su mesun chauffeur pa bira director di IBISA y a hinc’e den SSA tambe. Obviamente no tin un schetsprofiel pa determina rekisitonan pa ta den e hunta di supervision. Ta sinti falta di un accountant of experto financiero, un hurista, etc. A mas bien enfoca riba campañadonan, pa nan por haya un suma extra tur luna como entrada, en bes di enfoca riba un hunta di supervision cu por controla e directiva y evita pa e tipo di bagamunderianan asina por sosode cu placa di pueblo. Ta hopi obvio cu ningun di nan, pa falta di conocemento legal, no ta consciente cu si bin un cambio di gobierno y investiga kico tur a sosode eyden, cu nan tin chens di perde cas y propiedad, pa paga bek tur locual a bay ‘perdi’ bou di nan maneho y supervision.

Con hopi Minister Endy Croes ta meti?

E contesta lo bin solamente di e director, cu awo ta suspendi y bou di hopi presion pa su mesun credibilidad, bon nomber y su libertad. Pasobra un keho oficial pa “diefstal, verduistering in dienstbetrekking, oplichting en heling”, lo por tin consecuencia cu e lo drumi un par di dia riba beton den un cel. Ta keda na dje, primordialmente, si e ta asumi tur e culpa y bay cera pa otro hende, of e ta sali afo y bisa ken a dun’e ordo pa haci e locual cu awo ta investigando e. Tin tur indicacion, cu sea un hoben asina, ta casi imposibel cu e por tin tanto malicia pa mishi cu cos di hende, specialmente di e famia cu e ta bin di dje, cu de facto, e no mester haci e cosnan asina mes. Ta sospecha cu mas bien e lo por a facilita pa otronan den e caso aki. Ken e “otronan” ta, ta keda na dje pa “basha abou” of sino wanta tur e castigo su so. Den e ultimo reunion ya el a laga sa caba di lo no bay cera su so, Awo no sa si e kiermen cu e hunta di supervision ta bay cera hunto cu ne of si e lo kiermen cu e minister tambe lo tin chens di cay den e caso aki.

Di comision di subsidio pa un fundacion

Na aña 2012, Fundacion Lotto pa Deporte (FLPD) a cera un acuerdo di partnership cu e Comision di Subsidio di Deporte (SSC) den cual FLPD ta compromete pa haci un contribucion financiero di Afl. 3.5 miyon pa aña. Ta menciona cu mester paga e suma aki di bon causa, acorda contractualmente cu Canadian Bank Note (CBN), cu ta e organisado di e sorteonan di Lotto na Aruba. SSC, na su turno, lo ricibi y evalua aplicacionnan di organisacionnan deportivo. Pero na aña 2016, a dicidi di crea un structura nobo, a traves di Fundacion Subsidio pa Deporte Aruba (SSA). Asina SSA a tuma e actividadnan di SSC over. Locual Minister Alex Schwengle a considera, e tempo ey, tabata pa reduci e profil di riesgo y e complexidad di e actividadnan relaciona cu otorgamento di subsidio. Pa e motibo aki a dicidi di lanta un fundacion cu un modelo di Hunta di Supervision.

ARA a constata: No ta atene nan mes na nan mesun statuto

Den e statututonan di SSA ta indica cu ta pone fondonan disponibel solamente pa clubnan deportivo y asociacionnan deportivo cu ta miembro di Aruba Sport Unie (ASU) of di Comite Olimpico Arubano (COA). E club cu pidi subsidio mester hiba un maneho cu ta den liña cu e maneho di subsidio cu Minister di Deporte a establece. Sinembargo, no ta existi acuerdonan por escrito entre FLPD y e stakeholdernan ariba menciona tocante e maneho di recursonan cu ta bay pa cierto organisacionnan. Ademas, solamente e grupo cu tin representacion den SSA ta haya subsidio! SSA tin criterionan interno, obhetivonan y metanan basa riba cua ta aloca recursonan na organisashonnan. Sinembargo, e criterionan aki no ta den aliña cu FLPD y tampoko no tin bista riba ken ta haya subsidio ni cuanto y pio si nan ta cumpli cu e rekisitonan pa por yega na fondo procedente di placa di benta di Lotto.

A aumenta e suma cu Lotto ta subsidia SSA 

Pa medio di un acuerdo di cooperacion entre FLPD, SSA y despues Minister di Deporte Alex Schwengle, a determina na aña 2017 cu e cantidad anual di placa pa “bon causa” ta subi di 3.5 miyon pa 4 miyon florin y despues a augment’e atrobe na 4.5 miyon florin. Den e acuerdo a defini tambe cu si e benta surpasa record, cu e subsidio tambe lo aumenta. Asina por menciona cu e aña aki, pues aña 2024, SSA a ricibi un record di 9 miyon florin na subsidio, basa riba varios componente y asuntonan cu a monta na e suma ey.

Tocante SSA

A funda Stichting Sportsubsidie Aruba (SSA) dia 28 di september 2016, bou gobernacion di Minister drs. Alex Schwengle, como Minister di Deporte. Esey pasobra prome tur tempo Fundacion Lotto pa Deporte tabata manda miyones, sin cu nunca a formalisa e “status” di e comision aki. Awo por lo menos nan ta un fundacion, cu un director y Hunta di Supervision. E director, cu awo ta suspendi, ta Kenneth Vrolijk. Presidente di e Hunta di Supervision ta Herve Ruiz, mientras cu e demas miembronan ta Isnardo “Juni” Faro, Kenny Hart, Josephina Maduro y Estefano Croes. Por lo menos un di nan a hay’e den problema di ladronicia ora e tabata traha pa un compania den sector priva. A kit’e y awo a haya trabou den gobierno y ta den hunta di supervision hasta awo.