Connect with us

Departamento di cultura a sostene e obra memoria ancestral

Aruba

Departamento di cultura a sostene e obra memoria ancestral


Diabierna siman pasa, un delegacion di Departamento di Cultura a presencia e Obra ‘Memoria Ancestral’ na Cas di Cultura. E obra aki a ser presenta en conexion cu e conmemoracion di abolicion di sclavitud na Aruba 160 aña pasa. Esaki ta un obra y proyecto multidisciplinario y multifacetico cu a wordo crea entre november 2023 y juni 2024 riba peticion di Cas di Cultura, pa nos artista multidisciplinario y contemporaneo Natusha Croes, pa asina conmemora y refleha riba pasado, presente y futuro den conexion cu Aruba su historia di sclavitud. E proyecto a conoce envolvimento di varios artista, educador, historiado y institucionnan cu a aporta pa crea un obra, video y material informativo, artistico y inspirativo.

E temanan cu a ser treci dilanti den e obra Memoria Ancestral ta con nos por para mas fuerte den nos sapatonan, enfretando un futuro cu mas siguransa, cu un autoestima mas grandi y asina por ta completamente orguyoso di nos identidad. Kico ta e storianan silencia den nos comunidad, nos raiznan, berguensanan inhusto, custumbernan keri. E obhetivo di esaki ta pa duna e publico e espacio pa expresa su mes vulnerablemente, lagando e berguensa un banda y desmantela loke ta oprimi nos expresion total. Cu esaki tambe cu e obra Memoria Ancestral kier crea mas conscientisacion tocante e topico aki pa asina por compronde miho con Aruba su pasado ainda ta y por influencia nos presente y futuro.
Ademas e obra a revela kico colonialismo ta encera, mirando cu sclavitud transatlantico ta un producto colonial. E proceso di un nacion dominante imponiendo poder militar, economico, religioso riba e pais cu nan kier conkista, pa nan por haya recursonan cu por ser cumpra, bendi of intercambia y asina por trece rikesa y prosperidad pa nan mesun reino. Esclavitud transatlantico ta significa cu un grupo di persona a ser captura, bendi y transporta via barco for di costa di Africa pa labora den forma obliga. Pero tambe e pueblonan indigena, den nos caso e Caquetionan, a ser desplasa, mata, deporta y esclavisa. Esaki ta un crimen contra humanidad di cual su efecto ainda ta ser experencia den forma di e.o. racismo. E dolor cu a ser provoca a causa diferente trauma, miedo inseguridad y desigualdad cu a keda den nos comunidad di generacion pa generacion. Cu e obra aki ta hasi uzo di arte como un medio di comunicacion pa por retira cualkier taboo cu ta stroba nos di expresa nos mes completamente. Cu arte nos por comunica nos pensamento, uzando diferente medio di expresion. Arte ta duna nos e espacio y curashi pa expresa y procesa nos emocion. Ultimo dos siman a tuma luga varios presentacion pa scol-, maestro-, mayor-, empleado di fundacionnan y publico.
Departamento di Cultura tambe a forma parti di e instancianan cu a sostene e proyecto aki. Un pabien y danki na tur esnan cu e colabora pa realiza esaki especialmente Cas di Cultura, Natusha Croes, Darwin Winklaar, Layzmina Emerencia y tur esnan cu a coopera.





Source link

More in Aruba

A2Z ADMINISTRATION

AD

To Top