Dentista na Nucleus University keto bay en espera di permiso pa practica y instrui na Aruba

Dr. Kumar Dola, director di Nucleus University School of Medicine y dr. Pallavi Nakka, director interino di dicho scol ta en espera di e permisonan necesari pa nan eherce como dentista y ofrece e formacion clinico na Aruba. Desde 2022 nan a sa di duna les teoretico, pero sin e autorisacion di gobierno, nan no por brinda atencion dental n’e comunidad ni e experiencia practico cu nan studiantenan ta rekeri.

Desde cu nan a yega Aruba na 2022, dr. Dola y dr. Nakka a bin ta hunga un rol crucial den e enseñansa academico na Nucleus University. Sinembargo, aunke nan tin amplio experiencia y ta comprometi cu e formacion di futuro dentista, ta enfrenta un reto importante: nan no ta conta cu e permisonan necesario pa eherce e practica climico ni pa ofrece e formacion practico di nan studiantenan.

Dr. Dola, cu 16 aña di experiencia den odontologia, tabata dunando les di teoria mientras cu e ta spera pa gobierno di Aruba aproba e documentonan necesario. “Nos a presenta tur papel rekeri mas di un aña y  mey pasa, pero no ta sigui warda. Mientrastanto, solamente nos por duna les riba e aspectonan teoretico, mientras cu realmente nos mester atende cu e practica clinico di odontologia (dentistry),” el a afirma.

Di su parti, dr. Nakka, cu un specialisacion den patologia oral, a subraya e importancia di e permisonan aki pa satisface e necesidadnan dental di e comunidad Rubiano.

“Nos kier atende e necesidadnan di e poblacion local y n’e mesun momentom brinda nos studiantenan e experiencia clinica cu nan tin mester pa converti den profesional completo,” el a indica.

E situacion aki ta afecta tanto e profesionalnan como e studiantenan di Nucleus University, kendenan ta spera pa obtene un formacion completo cu ta inclui e practica clinico. E universidad ta pionero riba e isla pa ofrece un enfoke academico integral den odontologia y e permisonan aki ta crucial pa cumpli cu e expectativa educativo y e necesidadnan di salud di e comunidad.

“Nos obhetivo no ta pa competi cu ningun hende, sino mehora e salud bocal di cada persona na Aruba. Nos kier sigura pa tur hende ricibii e atencion dental cu nan tin mester,” dr. Dola a agrega. Dr. Nakka a añadi cu e studiantenan di e universidad a deposita nan confiansa den e institucion pa nan formacion y cu ta fundamental por cumpli cu e responsabilidad aki.

Por ultimo, dr. Dola y dr. Nakka ta en espera di e permisonan cu ta permiti nan practica nan profesion y ofrece formacion clinica na Aruba. Nan obhetivo ta pa mehora e salud dental di e comunidad y forma e proximo generacion di dentista, garantisando cu tanto e Rubianonan como e studiantenan ricibi e atencion y e formacion cu nan merece.

Arubig

Nucleus University a habri un outreach clinic aña pasa haciendo un peticion p’e dos profesornan aki cu nan diplomanan como dentista, ta poni riba Arubig. Arubig a laga sa cu di banda di e universidad tur cos ta na ordo y ta cumpli cu tur regla.

E Universidad a manda carta y e- mail p’e oficina di Minister demisionario Dangui Oduber. Pa un aña largo nan tin ta wardando riba un cita cu e minister. Un biaha mas a pidi Arubig pa por funciona bao di supervision di un otro clinica dental local y registra, tampoco e Minister kier a duna un contesta.

DVG a duna di nan banda y a yuda e Universidad, pero nan ta na altura cu esaki no ta den nan man. Mirando e echo aki, e Universidad ta pidiendo un clarificacion riba esaki, mirando cu esaki ta perhudicando e studiantenan, a pesar cu e Universidad tin tur su documento y rekisitonan na ordo.