Connect with us

Cu e mesun Rubianonan cu nos a despecia: Awendia Corsou ta mas avansa cu Aruba den maneho di energia

Caribe

Cu e mesun Rubianonan cu nos a despecia: Awendia Corsou ta mas avansa cu Aruba den maneho di energia


Aqualectra Antilliaans Dagblad

Awe dialuna e compania Aqualectra di Corsou a anuncia un acuerdo nobo cu e compania Wärtsilä. E dos companianan a tuma un paso importante pa yega na un futuro energetico sostenibel pa Corsou. Esaki, pa medio di e firmamento di un acuerdo pa ehecuta un ‘Sistema di Almacenahe di Energia’ pa medio di bateria (Battery Energy Management System). Como parti di e esfuersonan continuo di Aqualectra pa mehora su servicio y sirbi comunidad di Corsou miho, e acuerdo aki ta enfoca pa trece un revolucion completo den e maneho di energia na Corsou pa aña 2030. E Sistema di Almacenahe di Energia aki, lo sigura distribucion di coriente confiabel, pagabel y sostenibel pa nos isla ruman.

Pais Corsou a scoge pa un sistema den cual por almacena no menos di 25 MW di coriente. Cu almacena ta referi cu ta produci coriente via molinanan di biento y ta opta pa warda e coriente den bateria y uz’e segun e demanda ta pidi. Corsou ta yegando, otro aña, na no menos di 67 MW di coriente via molina di biento. Esey, den comparacion ta hopi mas cu Aruba, cu awendia ta na 30 MW di coriente via nos molinanan na Vader Piet y di cual Aruba ta capas pa almacena solamente 1 MW.

E berdad ta cu, hopi biaha, companianan di utilidad sa tin masha reserva pa aumenta produccion di coriente alternativa, pasobra nan tin miedo pa ora biento cay of ora no tin solo, con lo cumpli toch cu e demanda. Pero saliendo for di e punto di bista cu casi semper y tur dia Aruba y Corsou tin solo cayente y un biento stabiel, cu e chens pa keda sin e recursonan natural aki lo ta masha chikito. Pesey, ta opta pa un sistema alternativa di almacenahe, unda por recori si acaso tin scarsedad di coriente banda di un demanda halto.

Na Aruba, ora casnan of edificionan comercial opta pa uza panelnan solar riba nan dak, cu e coriente produci ta bay directamente den e grid di NV ELMAR. Pues no ta cu ta spaar e coriente pa ora cu anochi no tin solo, ta uz’e. De facto, den dia abo ta duna ELMAR coriente y e ta cumpr’e fo’i bo mas barata cu loke e ta bende cu otro y anochi, abo ta bira cumpra coriente bek fo’i dje. Pero na Corsou, nan kier bay un paso mas leu door di haci cu por almacena coriente den dia y uz’e bek anochi. Ta purba pa logra esaki den shete aña di tempo, pues na aña 2030.

Ta bon pa menciona cu na Aruba nos ta uza mas coriente cu Corsou, aunke cu nan poblacion di habitante ta mas grandi cu nos. E diferencia ta cu na Aruba nos tin hopi mas hotel y como tal, hopi biaha ta lubida di inclui tur e turistanan cu t’ey den un dia na Aruba banda di nos ciudadanonan. Cu esey na Corsou nan peak ta 135 MW mientras cu na Aruba nos a alcansa 150 MW caba.

Pa e expertonan na WEB y ELMAR, mira e desaroyo aki pasa nan dilanti ta un sla duro. Esaki pasobra Aruba a cuminsa hopi prome cu Corsou den e trayecto aki y lo a keda cla na aña 2025 pa ta menos dependiente di energia tradicional y opta pa un miho balansa cu energia alternativa. Pero, cu cambio di gobernacion na aña 2017 a bin cambio di maneho y vision, pa cual a para mayoria di e proyectonan aki y pio ainda, a core cu casi tur experto for di WEB. Asina awe por mira cu Joseph Everon, un ingeniero electrico studia na Hanzehogeschool Groningen, cu a traha casi 24 aña na WEB….cu a opta pa core cu ne na januari 2023. Awe e ta conseha gerencia di Aqualectra y como tal a opta pa sigui cana e caminda di desaroyo cu el a inicia na Aruba, awo pa Corsou.

Un otro ehecutivo cu tambe no tabatin suerte pa por a sigui traha na su mesun pais ta Francis Ras, un ingeniero mecanico studia na Universidad di Antias. El a traha na Coastal, El Paso y Valero. Desde aña 2009 el a cuminsa na WEB y a crece te na Dvision Manager Maintanance. Pero na maart 2022 nan a core cu ne y desde e tempo ey a lanta su mesun compania, MAFR Industries VBA y ta consehando Aqualectra pa e ultimo dos añanan den forma exitoso.

No mas cu siman pasa, dia 17 di mei 2024, e compania Wärtsilä, estableci na aña 1834 na Finlandia, a celebra cu a entrega WEB Aruba NV e trabou completo di e motornan Recip fase IV. Esey ta encera e fase di 102 MW di produccion di coriente. E celebracion tambe ta encera final di e proyecto di 20 aña largo den cual Wärtsilä a entrega plantanan den e modelo “Engineering, Procurement and Construction” (EPC). E planta di coriente di WEB ta totalmente di e marca Wärtsilä y ta capas pa produci un total di 194 MW.

Cu esaki por mira cu WEB y Aqualectra ta uza e mesun compania pa nos planta di produccion di coriente. Cu e diferencia cu Aqualectra a sigui desaroya, mientras aki no a scoge pa e caminda di almacena coriente.





Source link

More in Caribe

A2Z ADMINISTRATION

AD

To Top